Laakosinka Maxaafa 21
21
Moyanji Araadi Injifatemeexxa
1Araadik moyanji, Negeebi hedhammak Kenaanichchi, Isira'eelik manni Ataarimika ora daga'neexxa laqee wodda, insa'ne lole miidheexxi heenoka mannanna booji'e.#Lak. 33:40. 2Eettene yanna Isira'eelik manni, «Konne arda no'oxxe anga'n sa'issite uuttottole, qachchuwwaka insa'neka bakka balleessinnannon» hiyya'n Duuchchi Woddike Gootti'a wereege. 3Duuchchi woddiki Goottinna Isira'eelixxa kadha laqeexxi Kenaanika manna anga insa'neexxe'n sa'isse uwwe; Isira'eelik manninna insa'neenna qachchuwwa insa'neeka bakka balleesse. Tennexxee ookkone bonchiki summi Horimaa#21:3 Hormaa hiyyaa Ibrititotike laagadinni bakka balleessan hiyyaten hiyyeme.
Sageettoti Sibiljika Bofa
4Isira'eelik manni Eedomii'i doweexxi me'a haseemmaxxee'e Horexxe Koobaa'n ke'eexxi Eritiriinxe Abbaayyaba'a me'ammaka ora me'e; kaddo malee ornge'n ardiinxi ossa mudde.#Lew. 2:1. 5Ardikinna Duuchchi woddika Goottanna Muuse'e aallata'n, «Qiilla gammoojje'n rennonna'a mayee no'oo Gibtsee'n fulchitine? Ha'watee wodi'i hedheba'a! Indaachi hedheba'a! Tinni woyi fuldabaaxxi ita no'oo diqqachchiisseen!» Hiyye haaso'e. 6Eettenee yanna Duuchchi Woddik Gootti ha'latika bofa ardake'n wocci asse'naa arda idde; heddi Isira'eelik manninna reye.#1 Qor. 10:9. 7Ardikinna Muusebaa dageexxi, «No'o Duuchchi Woddika Goottanna atee'e aallante haasonnennaxxee'e balleessineennen; bofuwwi no'onaa'n bayyato'a Duuchchi Woddika Gootta no'aa soodati» hiyye; Muusenna ardakee'e soodate. 8Duuchchi Woddik Goottinna Muuse, «Bofa giisiteetexxi haqichchoke'n fannis; iddemeek duuchchinna isiba'a uudeexxi fayyaani» hiyye. 9Tennexxee Muuse sageettoti sibiljika bofa giisseexxi haqichchoke'n fannise; ookkoneechchi uduma bofi iddeek huuni manjinna sageettoti siblijke bofibaa uudeexxa yanna fayya'nemman.#2 Moy. 18:4; Yoh. 3:14.
Moo'abiba'a Assemeeka Me'injo
10Isira'eelik manni me'e mareexxi Obootimi kaanbe abixxe. 11Ookkoneechchi uduma Obootimii'ni ke'neexxi Mo'aabike arsho fuldama darreke kallachcha'n hexxeexxe qiilla gammoojje giddo Iyye'abaaremi'n kaanbe abixxine. 12Ookko'ninna me'ineexxi Zaareddixxe Dhooqa'n kaanbe abixxine. 13Ookko'ninna me'ineexxi Amoorke mannik bogixxe gabala qico'n gelteexxe qilla gammoojje'n hedheeke Arinoonike wodi'i bira kaanbe abixxine; Arinoonik wodi'i Mo'aabitonna Amoorike ardike bogixxe oddo'n hedheeke Mo'aabixxe gabalan. 14Tennexxeetemman Duuchchi Woddike Goottike loliinke maxaafa'n:
«Suufa giddixxi Waaheebi'n,
Arinoonike lagixxe dhooqa'n; 15Eeri'i marte gelteexxe
Mo'aabixxe gabalaba hexxeexxe,
dhooqa giddixxe koobuwwa» hiyyendeexxi borreessendemmashshaten.
16Ookkoo'n ke'neexxi Duuchchi Woddik Gootti Muuse'e, «Arda bukki assi wode'e insa'ne'a uwwannon» hiyyeemmaxxee'e Bi'eer hiyyendaaxxe wode'iinxe balebaa me'ine.
17Ookkoneechchi uduma Isira'eelik manni konneechchi butta hexxeexxa faaro hiyya'n faarsee qici;
«Tee muumee wode'e pu'isi!
ha'nonna isi'a faarse.
18Eettenee ja'laabuwwi qotemmxxa
ardink akeekisanjuwwi ifixxe bokkuwwanninna ifike bageduwwinni,
umeemmaxxa wodi'iinxa bale faarsine.»
Ookkoneechchi uduma insa'ne qiilla gammoojjenaa'n Mateena me'ine. 19Mateena'a Nehali'eeli'a, Nehali'eelinaa'ninna Baamoti'a, 20Baamotinaa'ninna Pisikaxxe Kooba hanii'n qilla gammoojje adadde leellitaaxxe Mo'aabixxe dhooqaba'a me'ine.
Seewoonixxanna Aagixxa Injifatema
(Lan. 2:26—3:11)
21Isira'eelik manni Amoorake moyanjo Sewooniba'aa hiyya'ne manna erge qici,
22«Boga atik giddii'n sa'nennexxi me'inonnaa no'a eetii uwwi; hoone fichchi giddi'aanna kaddo'o hoone woyinetike hiddichchiba'a e'ynabe'non; yookaan hoone baletike wodiinaa'ninna ha'winabe'non; galcha atixxi giddii'n fullanno qico'n moyanjiinka lumoka oranaa'n elqe kayya gorrabe'non.»
23Sewooni kinni Isira'eeli galcha ifixxi giddii'n saxxe'e me'iteaashsha eeti'i uwwebaan; sannachcha ifika duuchcha bukki assedheexxi Isira'eeli'i lolo'a qiilla gammoojje giddi'aa mare; Yahatse geyeeshshanni Isira'eelinni lola gence hiyye. 24Isira'eeli iso'n midditte adhdhiteexxi Arinoonik wode'inaa'ni saffe'e middi darree'ni Amoonitotik gabalaanaa'ni Yaaboqi galaani qio'n hedheeka isika boga abixite; kaddo malee'e Amoonike mannixxi gabala jaba qicinni heqqendeexxe kaddeemmaxxe'e insa'ni Yabooqika galaana edi'a sa'nebaan. 25Isira'eeli Haseebonen qarqarake'n hedheeka qachchuwwinninn Amoorake mannika qachchuwwa duuchcha mitteba abideexxi ookkonni offo'le. 26Haseeboni edi woddik Mo'aabike moyanjo lole injifateexxi Arinooni qico'n hedheeka isika boga isinaa'n adhdhe'emake, Amoorake mannike moyanjo Sewoonike qachchamman.
27Tennexxeenna genceti meellaammaki manni hiyyeemma qici:
«Haseeboni'a amme, higgeeni qamachenduu;
Sewoonik qachchinna haaroba ijaaremuun.
28«Giira Haseebonii'n fulde;
buubenikinna Sewooni qachchinaa'n bubeexxi
Eerite hiyyemaaka Mo'aabika qachcha,
Arinoonixxe gooruwwa'n hedhamakaranna itte.
29Koo Mo'aabii ati'a aane'e!
Koo Kemooshike arda ha'no'a mudanden!
Isi labbaxxa ifixxa oose baajjotee'e,
meyyaaxxa ifixxa oose booji'otee'e,
Amooraka moyanjo Sewooni'n sa'issee uwwe'een.»#Erm. 48:45-46.
30«No'o kinni insa'nee muxxuqqi assine'eennen;
Haseeboni Dibooni qico'n kutti hite;
Noofam qico'ni hedheekaara,
Mediibaa qico'ni ba'late hedheekaara he'neeshanni alagantenne.» 31Tennexxee Isira'eeli Amooritotike boga'n offo'le.
32Muuse dooyyaaka manna Iyyazeeri ergeechchi uduma Isira'eelik ardi qachchakanna qarqarake'n hedheeka shiixxaramma qachchuwwa abideexxi ookko hedhammaka Amooraka manna shorre. 33Ookkoneechchi uduma Isira'eelik ardi higeexxi Baasaani'a me'ammaka ora'n fule me'e; Baasaanik moyanji Ooginna isik sannachchi duuchchi Edire'i insa'nee lollo'a fulle.
34Duuchchi Woddik Gootinna Muuse'n, «Isoo'o, isika duuchchiinga sannachcha iske boginninni welt anga atixxe'n sa'issee uwweenneni mee sodaati; Haseeboni hedha'n galchaammaka Amooraka moyanjo Sewooni'n assennexxa duuchcha iso'ninna assannon» hiiyye.
35Tennexxee Isira'eelik manni Ooggii'i isixxa oosenna isike duuchchiinge sannachchinninni mittikinna gatebaang duuchchiinga bire; boga insa'neekanna dhaale.
Currently Selected:
Laakosinka Maxaafa 21: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
