Laakosinka Maxaafa 19
19
Luqqi Assatika Wode'e
1Duuchchi Woddik Gootti Muuse'ninna Aarooni'n hiyyee qici: 2«Duuchchi Woddik Gootti ajajeeke seeri'a hasissaaxxi aada konneechchi butta hexxeexxen: fafa yookaan busha affebaaxxanna qanbari ise hana fee'eme ege'nemebaaxxa mitte diimmoxxa raada iyyedangaashsha Isira'eelitote'n kuli. 3Eettene raaddanna qeesichcho Ali'aazaari'ni uwwi, isenna aadhendeexxi kaanbeti gadhi darre isi edo gora'endowwaal. 4Ookkoneechchi uduma qeesichchi Ali'aazaar qubichcho ifika isexxe munde'n cuupha'n afenshatike duunkaani edi darre'n torbaanele fixowwaal. 5Isi udda'naa iitti raada gubendowwaal; isek gogi, maali, mundetinna cumi iseki gubemowwaal. 6Qeesichichchiikinna birbirsiinka haqichcho, hisoophenna diimmoka shimala aadheexxi raada gubatta'eemaxxe giira giddi'a darbowwaal. 7Ookkoneechchi uduma iikki qeesichchi seemma ifixxa wodi'ik borcedha, biso ifikanna wodi'ik anshedha hassissaan; ookkonechchi uduma kaanbe giddi'a higa dande'aan; kaddo malee aadatishsha galgali qico'n isi batto'eeke kadaan. 8Isee gubeek manjinna iitanni seemma ifixxa borcedha, biso ifikanna wodi'ik anshedha hassissaan; isinna galgali qico'n batto'eeke kadaan.
9«Ca'ichake kadeek manjinna eettene raadaka bululo gure'e kaanbeti gadhi darre iyyemareexxi aadatike seersha ca'ittete kaddeexxe bakka'n uggurowwaal. Kunninna Isira'eelixxi tuuta luqqi assatika wode'e qophpheessatee la'o uwwaake kadaan; tinni aadanna cubbotenaa'n luqqi assatee kaddaan.#Ibr. 9:13. 10Eettene raadaka bululo guraak manjinna iittanni seemma ifixxa borcedha, biso ifikanna anshedha hasissaan; iikki manji galgali qico'n batto'eeke kadaan. Tinni Isira'eelike ardi'a insa'ne giddo hedhaake alagi'aanna duuchchi woddixxe aada kaddaan.
11«Reyeeke manjika rensha tuqaak huuni manjinna torbaane barra qico'n batto'eeke kadaan. 12Isi sakkaxxenna torbaxxe barra'n biso ifika duuchcha wode'ik luqqi assedhowwaal; ookkoneechchi uduma isinna luqqi hiyyaan. Sakkaxxenna torbaxxe barra'n ifi luqqi assa gophoole kinni isi luqqichchake kadabaan. 13Reyeeke manjika rensha tuqeexxi ifi luqqi assebaak huuni manjinna Duuchchi Woddike Goottika Taabotiinka galduma battoossaan; iikki manji Isira'eelike ardi giddii'n fugussemowwaal. Iso'n luqqi assatik wodi'i fixema gopheemmaxxee isi batto'eeken. Battummatenaa'n fulebaan.
14«Manji mitti duunkaani giddo reyaaxxa yanna assemaak seer konneechchi butta hedheeken: ookkene duunkaani giddi'a e'yaakenna kado'o ookko giddo hedheek huuni manjinna torbaane barra qico'n batto'eeke kadaan; 15iittanni tuphemebaang haanni hiyyeexxi hedheek huuni mi'inna batto'eeke kadaan.
16«Gadho wolaantichchik shiyeemeek yookaan iittanni reyeeka yookaan reyeeke manjixxa miqe yookaan hirreessa tuqaaki huuni manjinna torbaane barra qico'n batto'eeke kadaan.
17«Batto'eeka manjo, luqqi assatike cubboti tolchi'a gubendeemmaxxe eettene diimoxxe raadake bululinaa'n odolcho giddo uggat muummetik wodi'i isi hana woremowwaal. 18Ookkoneechchi uduma aadatike seerishsha luqqi hiyyeek manji hisoophixxa dame aadheexxi wodi'i giddo cuupheechchi uduma ookkone duunkaana'n, ookko giddo hedheeka mi'a duuchcha'n, ookkonna hedhemmake manna duuchcha'n fixowwaal; iittanni reyeeke manjixxa miqe yookaan hirreessa yookaan shiyemeeka yookaan ifitti reyeeka manjo tuqeeke hoone manjo'ninna fixowaal. 19Luqqi hiyyeek manji luqqi hiyyebaake manjo'n sakkaxxenna torbaxxe barra'n fixowwaal; torbaxxe barra'n isoo luqqi assuun; iikki manjinna seemma ifixxa borcedhowwaal; biso ifikanna wodi'ik anshedhowwaal; isinna eettenee galgala luqqi hiyyeeke kadaan.
20«Yaane kinni batto'eek mitti manji ifi luqqi assebaang gatoole Duuchchi Woddike Goottixxa woyyitte bakka battoossammaxxee tuuta giddii'n fuggussemowwaal; luqqi assatik wodi'i iso'n fixema gophemmaxxee isi batto'eeken. 21Tinni insa'ne'a duuchchi woddixxe aadan; luqqi assatika wode'e fixeek manjinna seemma ifixxa borcedhowwaal; ayyinna luqqi assatika wode'e tuqaak manji galgali qico'n batto'eeke kadaan. 22Battoo'eek manji tuqaaxxi hiini yaanenna battooteexxe kaddaan; iseenna tuqaak manjinna galgali qico'n batto'eeke kadaan.»
Currently Selected:
Laakosinka Maxaafa 19: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
