Laakosinka Maxaafa 11
11
Duuchchi Woddike Goottibaa'n Dirriteexxa Giira
1Eettene yanna Isira'eelik ardi insa'ne'n gelteexxe rakkonaa'n kexxeexxa Duuchchi Woddike Gootta'n adhdhemme; Duuchchi Woddik Goottinna adhdhuma insa'nexxa laqeexxi yo'oshsha mufate; ookkoneechchi uduma Duuchchi Woddike Goottixxi giira oddo insa'nexxe'n bubbeexxi kaanbeetika kasa heenoka itte. 2Ardikinna Muusebaa raare; Muusenna Duuchchi Woddika Gootta soodate'na'a giiratinna xoxxe. 3Tennenaa'ni kexxeexxa Duuchchi Woddike Goottixxi giira oddo insa'nexxe'n bubbemaxxee eettene bakkak summi Tebeera, #11:3 Tebera hiyya Ibrititotike laagadinni giira bubbeen hiyyatishate. hiyyeme.
Duuchchi Woddik Gootti Isira'eelike Ardi'a Uwweexxa Gogorre
4Isira'eelike aridinni welti me'aammak alagi manni wele ita ito'a heene. Isira'eelik ardinna «Maala habaa'n alfine'e indunnu; 5Gibtse he'neenaa wodda mitte hirbelo hansenne qico qulxu'me indaanaxxa qaabbantaannen; ookko'o he'nenne wodda indaannachchi baaqula, oyyuu baaqula, diimmoxxa shunkurtenna qullubbe qalli hinaannen. 6Ta'a kinni ita no'oo cufeen; konne menna hiyyema'neechcho malee wele ita illet anfaabe'non.»
7Menni dinbilaaletixxe gummashsha shiixxoke kadeexxi muucciinsha baaxxotixxe bifa afe'emman. 8Ardikinna mammareme qocedhee daammake'n da'wa'n yookaan mooyyeke'n tu'meechchi uduma meshete'n galifa'nemman yookaan ra'isedha'nemman; xe'me isixxinna ejersiinxe zayitenni qushshendeexxe kebboshshatemman.#Fula. 16:31. 9Hashsha kaanbe giddo qorri ibaa wodda mennikinna iittanni iba'nemman.#Fula. 16:13-15.
10Muuse ardi duuchchi ifi ifike mini mini hadi ifi fike duunkaanixxe huddume'n hedheexxi oodhaa'na'a laqe. Duuchchi Woddik Goottinna lumoo qica mufate; Muusenna yo'oshsha wixxirri hiyye. 11Muusenna Duuchchi Woddika Gootta, «Iitta hexxeexxa tennee rakko anee garbichcho atike'n mayee'e iyyedaggette? Maa ate'e qoxxi assannalete konne ardi duuchchixxa ko'o ane'n ba'issettek? 12Ba'anjo manjichcho laatto anno hanqalfite luu'mexxammashsha konnee arda anga hanqalfennexxi edike insa'neeke annuwwi'a uutota'a addachchiissetteke boga'n geessissonnaa ane'n kuldaattechchi mayeete? Konne arda isi ante siila'wenne? Yookaan ante ilenne? 13Konne ardi duuchchi'a maala habaa'n aadhanno? Duuchching, ‹Indonna'a maala uwwi› hiyya'n ane'n oodha'neen. 14Konne ardi duuchchixxa ko'o ani calli dande'e fulchabe'non; ane'n yo'oshsha ha'urtaan. 15Tinni rakko ane'n geltaashsha assitetexxi mannii'n ate'n elle alfo'onnole konnee abara uudabe'noshsha ta'anni anee shiyi.»
16Duuchchi Woddik Goottinna Muuse'e hiyyee qici: «Arda akkeekatixxanna ajajatixxa dande'a affeexxa egendettexxa Isira'eelike ardixxa torbaane tomme geedhe ani'a iyyedagi; insa'nenna atinni welti uurrino'a afenshatike duunkaani edo dangaashsha assi. 17Aninna dirrennexxi ookko atinni welti haaso'annon; ate'n hedheeke Hafuurinaa'ninna aadhennexxi insa'ne'n uggurannon; ardiinxa ko'o ati calli ba'exxabexxoshsha insa'ne atee qarqarraan.
18«Ardake'n: ‹Soodo maala ittina'emmaxxee ifi woyyoonsati qophpheefatte; «Maala calla alfine indenele! Gibtse he'nannaxxa wodo!» Hitina'n ooxxineexxa oodhishsha Duuchchi Woddiki Gootti laqeedheen; tennexxee Duuchchi Woddik Gootti maala ha'no'a uwwa uwwaan, ha'nonna maala ittinaan. 19Iitinaakinna, mitte barra calla yookaan lame barra, yookaan onde, yookaan tomme yookaan lame tomme barra callabaan; 20Yaane kinni ha'nooxxe sanonaa'n fuleexxi ha'noo dingidingi assaa qico'n wo'ma agenjo duuchcha ittinaan; tinni kaddaachchi oddo ha'nooxxe'n hedheeka Duuchchi Woddika Gootta tuffattineemmaxxeenna Gibtsee'n fula gonphuunnatu hitina'n ooxxinemmaxxeeten.› »
21Muuse kinni hiyyee qici, «Kunse ani jaane dhibba kuma lekkatike manninni welti hedhennen; atik kinni, ‹Wo'ma agenjo indaaka maala insa'ne'a uwwannon› hiteetten. 22Lali gedhebiink me'i horta duleme insa'nee goddisa? Abbaayya giddo hexxeexxi qulxu'me duuchcha abidendeechcho kaddeelenna insa'nee geltaata?»
23Duuchchi Woddik Goottinna Muuse «Duuchchi Woddike Goottixxi anga isi harumaxxee? Ate'n kulennek ank hiyyichchi dhugo'aaxxanna dhugo'abaaxxa ta'a tennee uuddaton» hiyye hisse haaso'e.
24Tennexxee Muusenna gadhi'a fuleexxi Duuchchi Woddik Gootti hiyyeexxa duuchcha ardake'n haaso'e. Ardiinxe geedhe giddii'ninna torbaane tomme manna mitteba bukki asseexxi duunkaanixxe dowwe'n uurrinaashsha asse. 25Ookkoneechchi uduma Duuchchi Woddik Gootti duumanchik dirre isinni haaso'eexxi Muuse'n hedhemmake Hafuurnaa'n aadheexxi eettenne torbaane tomme geedhe'n uggure; Hafuurkinna insa'ne'n galee wodda insa'nenna raaga raange; kaddo malee kinni ookkoneechchi uduma langaxxa raangeba'a.
26Insa'ne giddii'n Eldaadinna Modaadi hiyyemaak lami manni kaanbe giddo gate'emman; kunni lami manni torbaane tomme manninni laakko'emmeenni hedheexxi duunkaani giddo mareemmabaan; kaddo malee Hafuur insa'ne'ninna galeemmaxxee insa'nenna he'neemaba kaanbe giddo raaga raange. 27Mitti dargaggees gonga'n mareexxi Muuse'n, «Eldaadinna Modaadi kaanbe giddo raaga raanga'neen» hiyye kule.
28Dargaggeesumandenaa'ninni Muuseke gargaaranjo kade'emak Newek belti Iyyaasu, «Koo anke gootta Muusee! Haassonnabaashsha hoyyi!» Hiyye.
29Muusenna «Ati ani'a quuqendette? Duuchchi Woddike Goottiki ardi duuchchii silaa wabeeko kadeele, Duuchchi Woddik Goottinna Hafuura ifika insa'ne'n uggeele hittatta gammadanna'a!» Hiyye. 30Ookkoneechchi uduma Muusenna Isira'eelixxi geedhe kaambe giddi'a ille iima hinge.
31Eettene yanna diidallo Duuchchi Woddike Goottibaa'n daggeexxi gogoretishsha hexxeexxa ci'a abbaayyatenaa'n kaambetibaa iyyedagge'e kaanbetixxe dowwe'n buttii'n iimi'a lame ciqile, bayyinekanna mitte barraki ori bayyataa qico duuchcha'n tuulde. 32Eettenne barranna hashsha duuchcha langaxxa wo'ma barra ardi fuleexxi tenne gogorretishsha hexxeexxa ci'a gudhdhe; mitti manjinna ha'urre tomme tomme kiilograaminni#11:32 Ibrititotike lagadanni mitte homer 220 liitiren,butti'a hexxeexxa gudhdheek ayyinna hedhemmabaan; gudhdheek manninna tennee ci'a ifixxe baxxe baxxeke qarqara'ni fa'we. 33Yaane kinni maali reefi insa'nexxe isso giddo hedhenaann corqine liqiinsinebaang Duuchchi Woddike Goottixxi mufe ardake'n bubbe; isinna arda jabake dhukkubinni gane. 34Wele ita heenemmaka manna ookko moongemaxxee eettenne bakka summl «Heenatike Hirreessa» hiyyeme.
35Ardikinna Heenatike Hirreesibaa'n me'eexxi Hatserooti hiyyemaaba ookko offo'le.
Currently Selected:
Laakosinka Maxaafa 11: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
