Matoosixxa Wengeele 5
5
Yessuus Koobate'n Hedheexxi Barachiiseexxa Barachcho
(Mat. 5:1—7:29)
1Yessuusi arda lumoka afee wodda kooba qabateexxi ofo'le; hordofeeyye isixxinna isibaa dage. 2Yessuusinna insa'ne'e hiyya'n barachiisa safee qici;
Dhugaatixxa Eebba Alfaaka Manna
(Luq. 6:20-23)
3«Iimixxi mootumma insa'nexxe kaddeemmaxxee ifixxe hafuuriinxe hedhonni
hiyyeeyete kada insa'ne'ni laqendaake mannixxa wodo.
4Dayyeeffata alfa'ammaxxee
yaadaakiirixxa wodo.#Isa. 61:2.
5Butta dhaalaammaxxee
ifi heeshshi assaakiirixxa wodo.#Far. 37:11.
6Goddaammaxxee
qulluma solo'waakiirixxanna dhebo'waakiirixxa wodo.#Isa. 55:1-2.
7Mararte insa'ne'a assendaammaxxee
mararaakeerixxa wodo.
8Mageno uudaammaxxee
luqqitte qalbekeerixxa wodo.#Far. 24:3-4.
9Mageniinxe oose hiyyemmaammaxxee
manjiixxe oddo'n nage'i dirraashsha assaakeerixxa wodo.
10Mootumma Magenxi insa'nexxe kaddemmaxxee
qullumatee'e shorremaakirixxa wodo.»#1 Phex. 3:14.
11«Ha'no anke kaddineemmaxxee buutoxxe'e manni ha'noo yowwa wodda, yookaan ha'noo shornsha wodda, yookaan fuggoxxenni dhark ha'noo summa balleesina wodda ha'nooxxa wodo.#1 Phex. 4:14. 12Hiri ha'nok iimate'ni lumoke kadeemmaxxee ha'nooxxa wodo; fananaqqe! Ha'no edi darre hexxemmaxxa wabeekkonna iittanni shorrinshe'een.»
Maxinetanna Ifa
(Mar. 9:50; Luq. 14:34-35)
13«Ha'no tenne buttaxxe maxinen; maxine kinni xe'me ifixxa bellessexxoole langaxxa xe'ma dandeettaa? Gadho hunendeexxi lekkati hirbesendaa malee edi'a mittechchi'anna la'o affaba'a.#Luq. 14:34-35.
14«Ha'no tenne butta duuchchike ifani. Koobate'n hedheek qachchi sho'oma dande'abaan.#Yoh. 8; 12; 9:5. 15Mannikinna xassa xasseexxi mine hedheeke duuchchi'a ifaashsha qephphi hiyyeechi hana uggaa malee'e qoreti hunda uggabaan.#Mar. 4:21; Luq. 8:16; 11:33. 16Iittanni manni eloxxa ha'nooxxa huje uudeexi iimate'n hedheeka ha'noka Anna saadaashsha ifi ha'nook manni edo ifowwaal!»#1 Phex. 2:12.
Seera Muuxatixxee
17«Ani seerakanna wabeekkotika hiyyichcho diigonaa'a dageenechcho ha'no'n labboqqe'e! Wonshonate malee'e diigonatebaan. 18Haaso'aanexxi dhugaaten; iimatinna butta saxxaaxxee'e seer duuchchi wo'maa malee'e seerakenaa'n mittechchinna yookaan mitte beddo midde baxxaba'a.#Luq. 16:17. 19Konne ajajuwwanaa'ni shiixoke kadeeka midde diigaaka, diigo'a wele barachiisaak iimixxe mootumma'n jalete kadaan; yaane kinni ajajuwwa konne wonshaakinna welikinna wonshaashsha barachiisaak iimixxe mootumma'ni lumoke kadaan. 20Qulluma ha'nooxxi Feerisitotixxenaa'ninna Muuseke seerixxe barachchiisalluwwixxe qullummanaa'n sa'a gophphoole haranga iimixxa mootumma e'yitinabaan.»
Manjo Anga Sa'a Hasisabaaxxa
(Luq. 12:58, 59)
21«Edike manna'n ‹Shiltoxxe shiyeeke duuchcha'n murte murendaan› hiyyendeexxa laqqine'een.#Fula. 20:13; Lew. 5:17; 16:18. 22Ani kinni hiyyanee qici dayyo ifike'ni mufataake duuchcha'n murte murendaan; dayyo ifika, ‹Gowwi kunni› hiyye yowwaak songote'n murte iso'n murendaan. ‹Hawwawwi kunni!› hiyye yowwaake duuchcha'n gehaannemixxe giiraxxi murte iso'n murendaan.#5:22 Dayyo ifike'n mufataak Mitti mitte birexxi borrowwa Tolanga hiyyaaka hiyyecho lebbaan.
23«Tennexxee tolcha atika tolchimalchoke'n shiqishattoxxa yanna dayyi atik ate'n qoxxo hiyyeexxi yaane hexxeexxa kassi hito'ottole; 24Tolcha atika ookkone tolchimalchi edo uggite marte edise atike dayyinni araarem; ookkonechchi uduma dagge tolcha atika shiqishi!
25«Atee ku'leeke manjinni murtetiba'a me'ita'etexxa yanna rakkettexxi isinni weli aagi; iitta kada gophphoole ate'e ku'lamak murammake'n sa'isse uwwaan; iikki murammakinna usuraammake'ni ate'e sa'isseexxi uwwaan; usuriinke mi'ne'ninna darbendatton. 26Dhugaate ha'no'n haaso'aannen, iitti enqemalcho saante gattebaang uute birtato qico'n ookko'ni fula dandeettabexxon.»
Yabaabula Hasisabaaxxa
27« ‹Yabaabuldoxxe'e!› hiyyendeexxa laqqine'een.#Fula. 20; 14; Lew. 5:18. 28Ani kinni ha'no'n hiyyaane qici dubarte gaabbeti uudeek duuchchi eettene yanna qalbe ifixxi giddo isenni yabaabule'een. 29Middixxi atixxi ille ate'e cubbote'n e'yisha'noole, ise fulchite ifinaa'n huni! Manjumma atixxi duuchchi gahaannemi hunemati mannii'n atixxe manjummanaa'n mitte gophetexxa woyyan.#Mat. 18:9; Mar. 9:47. 30Middixxi atixxi anga atee'e cubbote'n e'yishsha'noole, ise kutte ifinaa'n huni! Wo'ma atixxi manjumma gahaanemete'n huneddeexxi mannii'n manjumma atixxenaa'ni mitte gophphettexxa woyyan.»#Mat. 18:8; Mar. 9:43.
Weli Tika Hasisabaaxxa
(Mat. 19:9; Mar. 10:11-12; Luq. 16:18)
31« ‹Are ifixxa walaak duuchchi isee waalatixxa borro ise'a uwwowwaal!› hiyyende'een.#Lan. 24:1-4; Mat. 19:7; Mar. 10:4. 32Ani kinni ha'no'n hiyyaane qici Yabaabulletixxe buuto belo are ifixxa tikaak duuchchi ise'e yabaabulndaasha assaaken, tikendexxanna adhaak duuchchi yabaabulaake.»#Mat. 19:9; Mar. 10:11-12; Luq. 16:18; 1 Qor. 7:10-11.
Kakotixxee
33«Edike manna'n, ‹Dhark kakatinoqqe'e, yaane kinni Gootti edo kakatineexxa kako asse› hiyyendeexxa laqqine'een.#Lew. 9:12; Lak. 30:2; Lew. 23:21. 34Ani kinni ha'no'n hiyyaane qici haranga kakatinoqqe'e; iima Mageniixxe mootte kaddemmaxxee ise'n kakatinoqqe'e.#Ya'i. 5:12; Isa. 66:1; Mat. 23:22. 35Isixxe lekkake hadhisanjo kaddeemmaxxee buttate'ninna kakatinoqqe'e; Lumoke moyanjike qachcha kaddeemmaxxeenna Iyyerusaalemi'ninna kakatinoqqe'e.#Isa. 66:1; Far. 48:2. 36Atike umika ordichcho golaloke yookaan xilloke assa dande'a gophphataxxee ifi'n kakattoxxe'e. 37Tennexxee haaso'i ha'nook ‹Eeti› kadoole ‹Eeti› yookaan ‹Waawwo› kadoole ‹Waawwo› kadowwaal; tennenni gadhi'a hedheek ookkone fuggichchinaa'niten.»#Fula. 19:12; Lak. 30:2; Lew. 23:21.
Halo Fula Hasissabaaxxa
(Luq. 6:29-30)
38« ‹Illetee ille, issotee isso› hiyyendeexxa laqqine'een.#Fula. 21:24; Lew. 24:20; Lan. 19:21. 39Ani kinni ha'no'n hiyyaane qici fuggoke manjo'n mee iso'ni halo fulle! Yaane kinni middixxa atixxa boqo ganaakee bita'ixxanna isi'a wirri assi. 40Mitti manji atixxa shamize adhdho'a haseexxi atee'e ku'loole koote atixxanna adhdho'a isi'a waal. 41Mitti manji atee, Aninni welti heenoka ora me'i! Hiyye hunnatoole, ookkone qicika dachcha'a ora isinn welt me'i. 42Atee kadhataakee uwwi! Atenaa'ni liqesedho'a hasaakanna hoyyexxoxxe.»#Lew. 15:8; Mam. 24:29.
Naapha Eeyyatixxee Uwwendeexxa Barachcho
(Luq. 6:27-36)
43« ‹Jaalo atika eeyyi! Naapha atika jibbi› hiyyendeexxa laqqine'een.#Lew. 19:18. 44Ani kinni ha'noo hiyyane qici: naapha ha'nooka eeyye! Ha'no shorraakeeri'anna soodatte.#Mam. 25:21-22. 45Tenne assitinoole iima hedheeke ha'nooke annixxe oose kaddinaan; Isi arishsho ifixxa fuggaaleeyyeteenna eloke manni'a fulchaan; isi qulliyeteenna cubbaaleyyetee xeena ifika gansiisaan. 46Ha'no'o eeyyaakaara calla eetinoole, maa hira affine? Cubbaaleeyyetinna assita'neexxi tennendebaata? 47Dayyuwwa ha'nooka calla nage'a aaxxinoole welekenaa'n saxxeexxa assitineechchi maachcho? Mageno ege'nebaak manninna tenne assa'neenexebaata? 48Tennexxee iimik ha'nook Anni wo'make kaddeemmashshanni ha'nonna wo'make kadde!»#Lew. 19:2, 18; Lew. 18:13.
Currently Selected:
Matoosixxa Wengeele 5: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia