Matoosixxa Wengeele 3
3
Xammaqallo Yohaannisixxa Lallaba
(Mar. 1:1-8; Luq. 3:1-18; Yoh. 1:19-28)
1Eettenee yanna xammaqalli Yohaannisi Yihudaxxe qiilla gammoojjebaa lallaba'n dage. 2Lallaba woddanna, «Iimixxi mootumma shiqqeemmaxxee aadde aagge!» hiyya'neman.#Mat. 4:17; Mar. 1:15. 3Wabeekichcha Issayaasi darree'n,
«Qilla gammoojje'n
Goottinka ora giise;
‹Hodhdhichakanna isi'a toggi asse!› hiyya'n raarramak hafuuri» hiyyeme kuleme'eemmak isoten.#Isa. 40:3.
4Yohaannisixxi seemma gaaliinxe ordaxxeman; hidhake'ninna gogiinxa hiito ka'le'eman. Ita isixxinna, awwaanessakenna badda'atike maleboman.#2 Moy. 1:8; Zek. 13:4; Lew. 11:22. 5Eettene yanna Iyyerusaaleminaa'n, Yihudake bogi duuchchinaa'ninna Yordanoosike qarqara'n hedheek bogi duuchchanaa'n manni Yohaannisiba'a daga'aman. 6Cubbo ifi ifixxanna faaci'wa'n Yordanoosike galaan giddo Yohaannisixxe anga'n xammaqema'nemman.
7Heddo Feerisitonna Seduuqito isi xammaqammabaa dagaa'naa'a affeexxi insa'nee'e, «Ha'no buutetixxi oose! Dagga'neexxe aarenaa'n baajjinaashsha ayyete ha'noo'n kule?#Mat. 12:34; 23:33. 8Yoona aadde aaggo ha'nooxxa leellishshaaxxa gumma gummisse. 9‹Abirihaami no'oke annani› hitina'n ifi sobbinoqqe'e! Mageni tenne kinonaa'n Abirihaami'a oose ke'issa dande'aaxxa ha'no'n kula'ennen.#Yoh. 8:33. 10Ta'a kunse qoce haqichchuwwinke hiddi bira hexxeen; tennexxee eloxxa gumma gummisabaak haqichchi duuchchi woxemee giirate'ni hunemaan.#Mat. 7:19.
11«Ha'no aadde aagineexxa ege'nishate kadaashsha ani ha'no wode'ik xammaqaannen. Yaane kinni kophe isixxa duka dande'abe'nok, ane'e sa'aak hunnaamessi ani uduma dagaan; isinna ha'no Woyyichchi Hafuurinninna giirati xammaqaan. 12Midhatik isik diidallisanjinna anga isixxe'n hedheen; isinna aldu'me ifixxa ca'a asaan; ifixxa dinnenna gootarake'n assaan; huurakanna xoxxabaaxxe giira'n gubaan.»
Yessuusixxa Xammaqensha
(Mar. 1:9-11; Luq. 3:21-22)
13Ookkone wodda Yessuusi Yohaannisixxe anga'n xammaqemo'a Geliilaa'n Yordanoosike galaaniba'a dage. 14Yohaannisi kinni, «Ani atixxe anga'n xammaqema hasissaa wodda ati hitta anbaa daggatto? Hiyya'n iso'o hoyyo'aa wo'laane» 15Yessuusi, «Qullumma duuchcha wonshatee no'o tennee assa hasissaammaxxee ta'a yoona eettii ani'a uwwi» hiyye hisse haaso'e. Eettenee yanna Yohaannisinna konne yaada'ni weli aageexxi Yessuusii xammaqe. 16Yessuusinna xammaqemeshanni wode'ekenaa'n fule; ookkone hirba'ninni iima bannedee'naa'a, Mageniik Hafuuri guugenjotisha dirreexxi Yessuusi'n dagaa wodda afe. 17Eettene yanna'ninni, «Ani iso'n gammadaannek eeyyaannek ank belti konneten» hiyyaak haaso'i iimitenaa'n laqeme.#Dada. 22:2; Far. 2:7; Isa. 42:1; Mat. 12:18; 17:5; Mar. 1:11; Luq. 9:35.
Currently Selected:
Matoosixxa Wengeele 3: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia