Matoosixxa Wengeele 24
24
Bariinke Muuxamika Beessisuwwa
(Mar. 13:1-2; Luq. 21:5-6)
1Yessuusi woyyichchi galmi giddii'n fuleexxi me'a'naa woyyichcha galma iso'ni leelishatee hordofeeyye Yesuussixxi Yesuussibaa shiqqe. 2Isi kinni insa'ne'n, «Konnee duuchcha uudina'nee? Ani dhugaate ha'no'n haaso'annen, weli hana hedhemmaba hedheemmashshanni diigemebaak gataak mitti kinjinna hedhabaan» hiyye.
Goottiinxe Daga Edo kaddaaxxa Rakkonna Shorrichcho
(Mar. 13:3-13; Luq. 21:8-19)
3Yessuussi Debire Zayitixxe kooba hana ofo'le'naa hordofeeyye isixxi qofinni isibaa daggeexxi, «No'o'n kul, tinni yaane duuchchi kaddaak haanote? Atike dagikinna bariinke muuxamik beessis maachcho?» hitte isoo qorte. 4Yessuusinna insa'nee hiise hiyye haaso'ee qici, «Ayyinna ha'noo dedhisabaashsha heqqedhdhe! 5Heddi manni, ‹Ani Kiristoositen› hiyya'n summa ankenni dagaan; heddo mannanna dedhisaan; 6Bagedokanna bagediinxa odo laqqinaan; tinni duuchcha kada hassissammaxxee mee sodaatte; kaddo malee'e iitti muuxaminxi yanna geltebaan. 7Ardi ardake'n, mootummatinna mootummate'n kexxaan; gargar gargar hedheeke booncho'n solo'okinna buttatixxi lele'ma kaddaan. 8Kunnichchi duuchchi ciniintotixxe abaraxxe safan.
9«Ookkonee wodda manni ha'noo rakkotee sa'isse uwwaan, shiyatanna shiyaan; anke summixxeenna arduwwa duuchcha'n jibbendinaan.#Mat. 10:22. 10Ookkonee wodda heddi manni amana ifixxe'n guggufataan; welinna sa'isse uwwaan; welinna gibaan. 11Heddo dhariyye wabeekonna kexxeexxi heddo mannanna dedhissaan. 12Fuggotixxe bira sa'nenaa'n kexxeexxa heddi mannixxi jaalala qiddaan. 13Muuxamiin qico'n jabaate ossaak isi kinni anjirema.#10:22. 14Ardi duuchchi'a dhugaa kulate kaddo'a tennee Mageniinxe mootummaxxi wengeele butta duuchcha'n lallabendan; ookkonechchi udumanna iikki muuxami daga.
Jabaxxa Rakko
(Mar. 13:14-23, Luq. 21:20-24)
15«Wabeeka Daani'eel darree'n iitti kulendemmaxxi ba'ne iyyedagaaxxi diqachchiisaaxxi yaane woyyitte bakka'n uurritee'naa affinaa wodda haaseessalli qalbeeffatowwaal!#Dan. 9:27; 11:31; 12:11. 16Eettenee yanna Yihudake boga'n hedheek manni koobuwwate'n baajowwal. 17Ifike minixxe heellichcho hana hedheek ayyinna mine ifikee'n mittechcho adhdho'a butti'a dirroqqe'e.#Luq. 17:31. 18Fichchi giddo hedheek seema ifixxa adhdho'a udumi'a higoqqe'e! 19Eetenee yanna siila'witeexxeeri'aanna unuunisita'neexxeeri'a aanne'e! 20Baaja ha'nooxxi haarso yookaan Edi Sanbatixee barra kaddabaashsha soodatte! 21Eettenee yanna butta dadendeexxe barranaa'n techchi qico'n kaddebaaxxi edi'aanna kaddabaaxxi lumoxxe rakko kaddaan. 22Tinni barruwwa haru'ma gophphee'ya mitti manjinna silaat gatamabaan; yaane kinni ookkone filemeeke mannixxee itti barruwwa harumitaan. 23Eettenne yanna ayyinna ha'no'n, ‹Kunse, Kiristoosi kaba hedheen› yookaan ‹Ookko hedheen› hiyyoole addatinoqqe'e! 24Dhariyye Kiristoositonna dhariyye wabeeko kexxaan; insa'nenna dandeessisseele ookkonee filemeeka manna midde dedhisatee lumolla beesisuwwanna masuwwa assinaan.#Dan. 12:1; Wal. 7:14. 25Kunse, ani ha'no'n ediseen kuleennen.
26«Tennexxee ha'no'n ‹Kunse, qiilla gammaoojje giddo hedheen› hinoole fuldinoqqe'e; ‹Kunse, gaadi giddo hedheen› hinoole amandinoqqe'e.#Luq. 17:23-24, 28. 27Balaqi borotenaa'n balaqeexxi dhidhimii qico'n leellammashsha, Manjiinke Beltixxi daganna iittande kaddaan. 28Renshi hedheeba'a allaattuwwa bukki hita.#Luq. 17:37.
Kiristoosixxa Langaxxa Daga
(Mar. 13:24-27; Luq. 21:25-28)
29«Eettene rakkotixxe barran uduma hirbange'n arishsho dukkandaan, agenjikinna ifa uwwaba'a; urjuwwatinna iimi'ni ibba, iimixxi hunnuwwanna lele'mitaan.#Isa. 13:10; 34:4; Hiz. 32:7; Iyu. 2:10-31; 3:15; Wal. 6:12-13; Dan. 7:13; Zek. 12:10-14; Wal. 1:7.
30«Ookoneechchi uduma Manjiinke Beltik beessis iimate'n lellaan; ookkone wodda buttatik arduwwi duuchchi oodha. Insa'nenna Manjiink Belti iimatike duumanchinni, hunnatinna lumok gaachchanninni daga'naa anfaan. 31Isinna lumoka malagatiinka hafuura laqisaaxxa ifixxa ergana ergaan. Ergannatinna buttike shooliinge kasuwwinaa'n, mitte iimatike kasinaa'n welii qico'n hedheeka isi'a fileemeeka manna bukk assitaan.»
Balasetika Haqichcho
(Mar. 13:28-31; Luq. 21:29-33)
32«Balasetika haqichchonaa'n tennee baracho adhdhe: ise damuwwa qacceexxi shiffuwwa quuffa wodda boni#24:32 Boni Kunni hiyyichchi leelishaak insa'nek boga'n haqqe qacca woddinna shafuwwi qufaa woddi bon shiqaa wodda kademaxxeeten. shiqeexxa egendinaan. 33Iittanni ha'no tennee yaanuwwa duuchcha afinaa wodda, manjiinke Beltixxi daga hara shiqqe'eexxa ege'ne! 34Dhugaate ha'no'n haaso'aannen, tinni yaane duuchcha kaddaa qico'n tinni ila saxxabaan. 35Iimanna butta saxxaan, hiyyichchi ank kinni haranga sa'abaan.
Goottinxe Dagaxxi Barranna Yanna Ege'nedabaaxxa
(Mar. 13:32-37; Luq. 17:26-30, 34-36)
36«Eettenee barranna eettenee yanna Aabii malee'e, iimixxi ergannanna kaddo'o Aabike Beltokenna kado'o ayyinna ege'naba'a. 37Nohike baro'n kaddemma qicishsha Manjiinke Beeltixxi daganna iittande kaddaan.#Dada. 6:5-8. 38Ookkone barruwwa'n balleesamak wodi'i edi ga'ma, Nohi ookkone markabi giddi'a e'yeexxe barra qico'n manni ita'n ha'wa'n, aadha'ninna heerunsiisa'nee hedheemman. 39Balleessamak iikki woddi'i dageexxi duuchchinga fiyeexxi adhdha qio'n egenneemmabaashshanni Manjiinke Beltixxi daganna iittande kaddaan.#Dada. 7:6-24. 40Eettenee yanna lami manji fichchi giddo hucca, mitti adhdhema, mitti gata. 41Lame melaalle daamma dalta, mitte adhdhenda, mitte gatta.
42«Yoona Gootti ha'nook heene barra dagaaxxa egendinammabaaxxee dammaqineexxi heqqedhdhe! 43Tennee qalbeeffatte, miniink anni moodhachchi hashsha heene yanna'n dagaaxxa ege'neele silaat dammaqe mini ifik umemabaashsha heqqedhamman. 44Manjink Belti keekkattinebaaxxe saate'n daggammaxxee ha'nonna iittanni qixxeeffattineexxi heqqedhdhe!#Luq. 12:39-40.
Xurameesiinxeenna Fuggichchi Erganjixxee Mamaassaa
(Luq. 12:41-48)
45«Yannate'n mini hadixxa ita insa'ne'a uwwaashsha gootti mini hado ifike'n baalloonseek iikki xuurameessinna qalbaamessi erganji ayyete? 46Isik gootti illeema higeexxi dagaa wodda iitta huja'n afemaak iikki erganji eebbisemeeken. 47Dhugaate ha'no'n haaso'aannen, gooti ookkone erganjo, ifixxe karra duuchcha'n baalloonsaan. 48Yaane kinni iikki fuggichchi erganji fuggichchake kadoole, ‹Gooti ank dagebaang turaan› hiyya'n, 49welti hujammaka manna ganete'n ke'oole, machcho'alluwwik weltinna ite ha'woole, 50isi heqqebaaxxe barra'ninna ege'nebaaxxe saate'n gootti isik dageexxi 51isoo mura woxisaan; ifi uggudhdhammake manni mura woxamaba'aanna me'aashsha assaan; ookkonna oodhishshanna isso qadhdhate kadda.»
Currently Selected:
Matoosixxa Wengeele 24: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia