Matoosixxa Wengeele 2
2
Borotenaa'n Dageeka Urje Uudamma Manna
1Moyanjo Heerodisike baro'n Yessuus Yihudake bogi giddo Beeteliheemike qachcha'ni ileme; ookkonne wodda beekkole borotinaa'n Iyyerusaalemi'a daggeeexxi, 2«Ilemeek Ayihudiink moyanji haba hedhee? Borote'ni urje isixxa anfennexxi iso'n sagandona'a dangeennen» hina'n qorre.#Erm. 23:5; Zek. 9:9; Lak. 24:17. 3Moyanji Heerodis tennee laqee wodda weekkeme; Iyyerusaalemik manni duuchchinna isinni welti weekkeme. 4Isinna qeesetika sooreessuwwanna ardiinka seeriinka barachiisanjuwwa duuchcha mitteba ye'eexxi Kiristoosi haba ilemaaxxa insa'nee qore. 5Insa'nenna, «Yihudake bogi giddo Beeteliheemi ilemaan hine iso'n hissine haasonne; tenneenna wabeek hiyyeexxi borreesseemma qici,
6« ‹Ati Yihudake bogixxe tee Beeteliheemii!
arda anka Isira'eelii'i allalaake galchallo kadaak atenaa'n dagaammaxxee
wele Yuhudake galchalluwwinaa'n mayikinna shiixxexxabexxo.› »#Mik. 5:2.
7Tennexxe'e Heerodisi eettene beekkole maqo ye'iseexxi, iitti urje leeliteexxa yanna insa'ne qoreexxi wo'me. 8Iinsa'ne Beeteliheemi'a hiyya'n ergee qici, «Martineexxi eettenee ilendemmaxxe annoxxa yaane xexe'achoti qortineexxi wo'me! Iso'o affineechchi uduma aninna marennexxi isi'a sagadonaa daggineexxi ane'ni kulle!» hiyye.
9Insa'nenna moyanji hiyyeexxa tenne lanqeexxi fule me'ine. Kunse borotinaa'n fulle dangeema wodda uunda'ni dangeemmaxxi iitti urje anno iitti hexxemmaxxe bakka'n dagge uurritaa qico'ni insa'nee akeeka'emman. 10Urje eettene anfee wodda lumo qico gammande. 11Mini'anna e'yinee woddanna annuyyo ama isixxe Maaraminni welti hexxe'na'a anfe; insa'nenna guluffante isi'a sagande; ookkonechchi uduma ififixxa saaxine ba'nineexxi worqe, hixxanakanna karibe isi'a shiqinshe. 12Heerodisibaanna ille ima hinge marabaashsha oojjoti wo'mineexxi wele ora ifike bogiba'a illeema hinge.
Eetene Anno Gibtse'a Aa'ne Baanjeexxa
13Iikki urijuwwa uudammak manni me'eechchi uduma Goottiink iimik erganji hashsha oojjoti Yooseefi'ni leelleexxi «Heerodisi annuyyo shiyo'a hasaammaxxe'e, kexxettexxi annuyyo ama isixxeninn welti aaxxe Gibtse'a baaji! Ate'n kulanno qici'anna ookkonni tur!» hiyye. 14Yooseefinna hashsha ke'eexxi annuyyotanna ama annuyyootixxa aadhdheexxi Gibtse'a me'e. 15Ookkonna Heerodisi reyaa qico'n ture. Tennenni «Belto anka Gibtsee'n ye'enne» hiyyeexxi Gootti wabeekii darree'n haaso'emmaxxi muuxende.#Hos. 11:1.
Heeroodis Annoole Shilchiseexxa
16Heerodisi iikki urje uuxxedhdhammak manni iso'o sobeexxa afeexxa yanna lumo qica aare; ookkonee urje uudammake manninaa'n wo'memmaxxe yanna'n lame woggaxxanna ookkenechchi butti'a hexxeexxa Beeteliheemi'ninna iseke qarqarke olla'uwwa'n hexxeexxa annoole duuchcha erge shilchiise. 17Eetenne yanna'n wabeeka Ermiyaasi darree'n kulememmak konneechchi butti'a hedheek raagi muuxeme:
18«Raaheeli oose ifixxee ooxxa wodda
oodhishshatinna lumoxxi hunbaashsha
Raamake qachchi giddo laqende;
oose isexxi duuchchanna muddeemmaxxee
dayyeeffachchonna dandeetteba'a.»#Erm. 31:15.
Gibtsee'n Naazireti'a Higa
19Heerodisi reyeechchi uduma iimik Goottiink eganji Gibtse Yooseefi'n oojjoti lelleexxi, 20«Annuyyo shiyo'a hasaammakir reyeemmaxxee kexxe annuyyotanna ama isixxa aaxxe Isira'eelike bogibaa me'i» hiyye. 21Yooseefinna ke'eexxi annuyyotanna ama isixxa adhdheexxi Isira'eelike bogibaa me'e. 22Yaane kinni Heerodisixxe bakka'n belti isik, Arkelawoosi Yihudake boga'n moyeexxa laqqee wodda, Yooseefi ookko'a me'a sodaate; oojjotinna xexe'achiisa isi'a uwwendeemmaxxee Geliilake bogiba'a me'e. 23Naazireeti hiyyemaake qachcha'ninna mareexxi ofo'le; Tininna kaddeechchi wabeekoti darree'n, «Naazireetike manjo hiyyemaan» hiyyeme kulememmak raagi muuxemaashshaten.#Isa. 11:1; Mar. 1:24; Luq. 2:39; Yoh. 1:45.
Currently Selected:
Matoosixxa Wengeele 2: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia