Matoosixxa Wengeele 16
16
Beessisa Uudatee Shiqeeka Qortuma
(Mar. 8:11-13; Luq. 12:54-56)
1Feerisitonna Seduuqito Yessuusibaa daggeexxi isoo hega uuddo'a beessisa insa'ne'n iimatenaa'n leellisho'a isoo qorte#Mat. 12:38; Luq. 11:16. 2Isi kinni insa'ne'n hiyye hiisse haaso'ee qici, «Hashsha wodda ‹Iima diimmatte'een xeeni ganabaan› hitinaan. 3Gorsanna ‹Iima diimmatte duumanchiteemmaxxe techcho xeeni gana ganaan› hitinaan. Ha'no iimitika beessisa gargar hiissa egendinaan; yaane kinni bariinka beessisa gargar hiissa dandetinabaan#16:3 Mitte mitte mirqisanjo maxaafuwwki borreessi laakkosa 2ke'ninna 3ke'n hedheeka Yessuusika haaso'a leellishshaba'a. 4Fuggittenna Mageno egendebbaaxxi ila beessisa yortaan. Yaane kinni wabeeka Yoonaasik beessisa malee'e wele beessisi isi'a uwwemabaan» Ookkoneechchi uduma Yessuusi insa'nee waale me'e.#Mat. 12:39; Luq. 11:29.
Feerisitotikanna Seduuqotika Gamama
(Mar. 8:14-21)
5Hordofeeyye abbaayyati widi'a fooffee wodda buddeena iyyedha deete. 6Yessuusinna hordoffeeyyete'n, «Qalbeeffatte; Feerisitotikenna Seduuqitoti gamaminnaa'n ifi heqqedhdhe» hiyye.#Luq. 12:1. 7Insa'nenna «Yessuusi tennee iitta hiyyeechchi buddeena iyyedaqqa gonpheennaxxeete kaddaan» hina'n weli'aa weli haasonne. 8Yessuusinna insa'nee haasonneeka haaso'a ege'neexxi insa'nee hiyyee qici «Ha'no amana xe'ite'ek manni ‹Buddeena iyyedaqqa gonpheennexxeten› hitinexxi maye'a weli'aa weli haasottina? 9Ta'i qico'ni yaane ha'no'n aaggebaan hiyyotebaata? Ondi buddeeni onde kumi manni'a geye gatee'naa me'e wo'maa qore hanba aaxxineexxa kassi hitinna'neba hiyyatebaata?#Mat. 14:17-21. 10Iittanni torbaani buddeen shoole kumi manni'a geyeexxi gate'naa me'e qore aaxxineexxa kassi hitinna'neba hiyyatebaata?#Mat. 15:34-38. 11Yoona ani ha'noo'n haaso'ennek buddeeniinxeete kaddebaaxxa hittataa qalli hiyya gophphina? Ta'anna Feerisitokenna Seduuqitoti gamaminnaa'n ifi heqqedhdhe» 12Hordofeeyyetinna Yessuusi insa'ne'n kuleexxi yaane Feerisitotixxenna Seduuqitotixxe barachchiissaxxe malee buddeeniinxeete kaddebaaxxa eettene yanna egende.
Pheexiroosi Yessuusixxa Ayyumma Haaso'eexxa
(Mar. 8:27-30; Luq. 9:18-21)
13Yessuusi Filphoosi Qiisaariya hiyyemaake bogiba geyee wodda hordofeeyye ifixxa, «Manni Manjiinka Belto ayyete hiyya'ne?» hiyye qore. 14Insa'nenna «Mitti mitti ‹Xammaqallo Yohaannisiten› hiyya'neen; weli ‹Eelyaasi› hiyya'neen; welikinna ‹Ermiyaasi› hiyya'neen yookaan ‹Edixxe wabeeko giddii'ni mitteken› hiyya'neen» hite.#Mat. 14:1-2; Mar. 6:14-15; Luq. 9:7-8. 15Yessuusinna insa'nee, «Ha'noota anee ayyete hitinna'ne?» hiyye qore. 16Pheexiroosi hiyyemmeek Simi'ooni, «Ati Kiristoosi hedhaake Mageniink Belton» hiyye hiisse haaso'e.#Yoh. 6:66-69. 17Yessuusinna iso'n hiyye haaso'ee qici, «Yoonake belto koo Simi'ooni, ati eebbisendeetteken; tennee ate'n leellisheek iima hedheeke anke anna malee'e manjokebaan. 18Tennexxee ani atee Pheexiroosi#16:18 Pheexiroosi hiyya rassa hiyyaten hiyyaannen; tennee rassa'ninna Mageniinxa tuuta ijaarannon. Reyotixxi hunnanna tennee Mageniinxa tuuta injiffattabaan. 19Iimixxe mootummaka mafachcha ate'n uwwannon; buttate'n usurtettek duuchchi iimate'n usuremeeke kadaan; buttate'ninna tikkeettek duuchchi iimate'ninna tikemeeke kadaan.»#Mat. 18:18; Yoh. 20:23. 20Ookkoneechchi uduma isi Kiristoosite kadeexxa ayye'ninna kuldabaashsha hordofeeyye ifixxa ajaje.
Yessuusi Iso'n Geltaaxxe Rakkoxxeenna Reyoxxee Haaso'e
(Mar. 8:31-33; Luq. 9:22-27)
21Eettene barranaa'n safeexxi Yessuusi Iyyerusaalemi'a me'a'neexxa, ookkonna geedhetenaa'n qeesetike sooreessuwwanaa'ninna Muuseke seerike barachchiissalluwwinaa'n iso'n rakko geltee'naa shiyema'neexxa, sakkaxxe barra'ninna reyotenaa'n ke'a hasisa'neexxa ifixxe hordofeeyye'n kulate'n ke'e. 22Pheexiroosi kinni Yessuusii'i qofibaa aadhe me'e'eexxi, «Goottaa tinni ate'n haranga geltoqqe'e» hiyya'n isoo xixe. 23Yessuusi kinni wirri hiyyeexxi Pheexiroosii'i, «Ati koo durriisa bayyati kabaan; manjiinxa malee'e Mageniinxe yaanek yaadi ate'n hedhagopheemmaxxee ani'a gufote kaddeetten» hiyye.
Kiristoosii Hordofa Laqqaaxxa Tolchema
(Mar. 8:34—9:1; Luq. 9:23-27)
24Ookkoneechchi uduma Yessuusi ifixxe hordofeeyye'n «Anee hordofo'a hasaak duuchchi ifi huneexxi fanno ifixxa dulke anee hordofowwaal.#Mat. 10:38; Luq. 14:27. 25Hedho ifixxa anjidhdho'a hasaak duuchchi ifinxe hedho gophaan; Ani'a hiyyeexxi ifixxa hedho balleessaak duuchchi kinni hedho ifixxa alfaan.#Mat. 10:39; Luq. 17:33; Yoh. 12:25. 26Manji tennee buttaxxa la'o duuchcha alfoole ifixxa lubbo kinni gophoole isi maa la'o alfa? Yookaan lubbo ifixxee maa hira uwwa dande'a? 27Manjiink Belti ifike annike ulfinninn, isixxe ergananni qoqqobemee dagaan; ookkone wodda mitte mittengee'e huje hujetishshanni hira uwwaan.#Mat. 25:31; Far. 62; 12; Rom. 2:6. 28Dhugaate ha'no'n haaso'annen, Manjiink Belti ifixxe mootummanni dagaa qico'n kaba uurreeke manninaa'n reyo uudabaak mitti mitti hedheen.»
Currently Selected:
Matoosixxa Wengeele 16: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia