Matoosixxa Wengeele 14
14
Xammaqallo Yohaanisixxa Reyo
(Mar. 6:14-29; Luq. 9:7-9)
1Eettenee yanna sholgaxxe kutak galchalli Heeroodisi Yessuusixxa odo laqeexxi 2erganjuwwa ifike'n «Eega iittate kaddoole xammaqammake Yohaannisi reyotenaa'ni ke'eedheen hiyyoten! Tennexxee'e isi darree'ni kunni maso mambe'uwwa duuchchi assema'neek» hiyye.
3Heeroodisi dayyo ifike Filiphphoosixxe are Heerodiyaadaxxe buuto'a Yohaannisi'i abidise'e usursiisse'na usuriinke mi'ne'n hedhemman.#Luq. 3:19-20. 4Yohaannisi Heeroodisii'i, «Atike dayyixxa are aadhiyotee'e seer ati'a uwwabaan» hiyya'n moroma'emman. 5Tennenaa'n kexxeexxa Heeroodis Yohaanisi'i shiyo'a hasa'neman; Yaane kinn ardi duuchchi Yohaannisii'i wabeekiinsha uudaammaxxee'e arda sodaate.
6Heeroodisi ilenshatixxi barra ulfeesendaamma barro Heerodiyaadaxxi belto oddo insa'nexxe'n sirbite iso'o gammachchiisse. 7Tennexxe isoo laqqaaxxa yaane duuchcha ise'a uwwo'a kakot addachchiise. 8Isenna ama ifixenaa'n gorsa laqqeexxi iso'o, «Xammaqallo Yohaannisika umo qorete'n uggitettexxi ani'a uwwi!» hite 9Moyanji Heeroodisinna tenne yaanexxe'e yaade. Yaane kinni aageemmaxxe kakoxxeenna isinni welti hedhemmake mannixxe hiyyeexxi qorteexxi yaane ise'a assendaashsha ajaje. 10Tennexxee ergeexxi usurink mi'ne'n Yohaannisika gooba kutise. 11Kutemeek uminna qorte'n uggemeexxi beltichotee uwweme'na'a beltichchotinna ifixxe ama'n uutte. 12Hordofeeyye Yohaannisixxi daggeexxi Yohaannisika rensha aaxxe mooggeexxi Yessuusi'n kulde.
Yessuusi Onde Kuma Manna Itise
(Mar. 6:30-44; Luq. 9:10-17; Yoh. 6:1-14)
13Yessuusi Yohaannisixxa reyo laqee wodda hedhemmabaa'n ke'eexxi qofinni qoonne bakkaba'a hoboloti me'e; ardikinna tenne laqeexxi qachchuwwakenaa'n fule lekkati isoo herdofe. 14Yessuusi hobolotenaa'n dirre wodda heddo arda afeexxi insa'ne'a marare; insa'neka elagophe'eka mannanna fayyise. 15Bogi galgalo'e wodda Yessuusixxi hordofeeyye isibaa daggeexxi, «Kunni boonchi qiilla gammoojjen; bogikinna hashsha'neen; olla'uwwibaa marreexxi sagale hidhdhino'aa arda konnee me'ashsha assi» hine. 16Yessuusi kinni insa'ne'a, «Ha'no indaachcho insa'ne'a uwwe male'e insa'ne me'a hassisabaan!» hiyye. 17Hordofeeyye kinni «No'o kaba anfeenchi onde budeenanna lame qulxu'me callan» hite. 18Yessuusinna «Ookkone hedheengechcho anibaa iyyedagge!» hiyye. 19Okonnechchi uduma ardi ansote'n ofo'laashsha ajaje. Ookkone onde buddeenanna eettene lame qulxxu'me aadhee iimi'a uuda'n galateeffate buddeenakanna kukkuteexxi hordofeeyyete'n uwwe; hordofeeyyetinna ardakee uute. 20Duuchchinngi iteexxi godde. Ardi ite'na'a gateexxa hanaba tommenna lame qore wo'ma hordofeeyye aaxxe. 21Iteeki manninna melaaletinna ooseti gadhi darre onde kuma mannibaatemman.
Yessuussi Wodi'i Hana Lekkati Me'e
(Mar. 6:45-52; Yoh. 6:15-21)
22Ookkone hirba'ni Yessuusi hordofeeyye hobolotte'ni guluffeexxi isi'a edisse widdi'a fooffaashsha ajajeexxi isi arda me'iso'a uduma gate. 23Isi arda me'iseechchi uduma soodachchote qofittinni kooba qabate. Hashshe woddanna qofittinni ookko'o hedhemman. 24Eettenne yanna hobolo iitti me'ita'ni abbaayyatixxe oddo'n hexxee'na'a edi darree'n iseba'a diidallo ganda'na'a danbala'ik elqeenna kayya raasende. 25Hashshixxe sallaane saate uduma Yessuussi abaayyati hana me'a'n hordofeeyyetiba'a dage. 26Hordofeeyyetinna Yessuusi abbaayyati hana me'a'na affee wodda, «Tinni geelate» hita'n sodaatte raarte. 27Hirba ookkoe'ne'ninn Yessuusinna insa'ne'e, «Mee co'o! Anenden; sodaattinoqqe» hiyye. 28Ookkone wodda Pheexiroosi, «Gootta atete kaddotole wodi'i hana atiba'a dagonna'a ane'e ajaji!» hiyye hisse haaso'e. 29Yessuusinna «Amo!» hiyye. Pheexiroosinna hobolotenaa'n fuleexxi Yessuussiba'a maro'a wodi'i hana tarkaafate. 30Yaane kinni diidallotixxa hunna afeexxi sodaate; Abayyate'ninna lixa shiqee wodda «Goottaa ane'e anjir!» hiyya'n raare. 31Yessuusi hirbange'n anga diriirse iso'o abideexxi iso'o, «Koo ati amana xe'yiteek! Mayee i'nattette?» hiyye. 32Yessuussinna Pheexiroosi hobolote'n e'yine wodda diidallo iitti sammi hite. 33Ookkonechchi uduma hobolo eettene giddo hedhemmak manni «Dhugaandinni ati Mageniinke Belton» hiyya'n Yessuussi'a kumbu hiyye.
Yessuussi Geensereexike Boga'n Elagopheeka Manna Fayyise
(Mar. 6:53-56)
34Yessuusinna hordofeeyye isixxi abbaayya foonfeexxi Geensareexxike boga'n genne. 35Ookkone bogik manninna Yessuusite kadeexxa ege'nee wodda qarqarake'ni hedheeke boga duuchcha'n erga sa'ee'na'a ela gophe'eka manna isiba'a idange. 36Ela gophemmak manninna Yessusixxee seemmaka kasa calla tunqo'a iso'o kadhate. Iso'o tuqeek duuchchinna fayye.
Currently Selected:
Matoosixxa Wengeele 14: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia