Matoosixxa Wengeele 12
12
Edi Sanbatixxee Shiqeeka Qortuma
(Mar. 2:23-28; Luq. 6:1-5)
1Eettene yanna'n Yessuusi edike sanbatiinxa barra midhatike fichchi giddii'ni sa'a'naa hordofeeyye isixxi solo'witeemmaxxee tisha qushshexxa'n itate'n kexxe.#Lew. 23:25. 2Feerisito tennee uude wodda Yessuusi'i, «Hordofeeyye atixxi Edike Sanbatixxa barra hoyyendeexxa yaane mayee'e assite?» iso'o hiyye. 3Yessuusinna hiissexxi, «Daawwitinna isinni welti hedhemmak manni solo'we wodda assineexxa yaane haasessitineebaa?#1 Sam. 21:1-6. 4Daawwiti Mageniinke mine'ni e'yeexxi, qeese malee'e isi yookaan isinni welti hedhemmak manni ito'a eeti uwwendebaaxxa eettene woyyitte ita ite.#Lew. 24:9. 5Yookaan qeesi edi Sanbatixxa barra Galmi giddo Edika Sanbata ulfeesa gonphee'naa balleessate insa'ne'n kaddabaaxxa Seeriinke Maxaafinaa'n haasessitine'ebaata?#Lak. 28:9-10. 6Yaane kinni Woyyichcha Galma sa'aak kaba hedheexxa ani ha'no'n kulaannen. 7‹Ani tolchi irra gattowwaalite eeyyannon› hiyyaaka maxaafiinka hiyyichcho qalli hitineexe kaddeele balleessa afebaake manna'n murtinaammabaan.#Mat. 9:13; Hos. 6:6. 8Wele dhiissinni Manjiink Belti edike sanbatike Gootta» hiyye.
Yessuusi Anga Gogeekka Manjichcho Fayyise
(Mar. 3:1-6; Luq. 6:6-11)
9Yessuusi ookko'ne ke'eexxi insa'neeke magenooffachchotike mine'n mare. 10Ookko'o anga gogeeki mitti manjichchi hedhemman. Yessuus ku'latee buutoo haseemmak mitti mitti manni «Edike sanbati baro ela gopheeka fayyisatee eetti uwwendaa?» hiyyeexxi Yessuusi'i qore. 11Yessuusinna hiisseexxi, «Ha'no giddii'n mitte beltanjo afe'eek edike sanbatixxa barra gedhechchi ikki balete'n ibe'exxe kaddoole baletenaa'n harkiseexxi falchabaak ayyete hedhe?#Luq. 14:5. 12Yoona beltanjot irra manji caalabaataa? Tennexxe edisanbatixxa barra eloxxa assatee'e eetti'i uwwende'een» hiyye.
13Ookkonechchinn uduma Yessuusi ookkone manjichcho, «Anga atixxa diriirisi!» hiyye. Isinna diriirise wodda angatinna isixxe wele angashsha kadde. 14Feerisito kinni ookko'ni fuldeexxi Yessuusi'i hitta assitee shiltaaxxa weli mari'atte.
Mageni File'eeka Erganjo
15Yessuusi kinni eettene iso shinno'a mari'anteemmaxxa ege'neexxi ookko'ni gamake'n hige. Heddi ardinna iso'o hordofe; elagophe'eeka manna duuchcha fayyiseexxi 16isi ayyete kadeexxa kullabaashanna jabeesseexxi insa'nee ajaje. 17Tinninna kaddeechchi wabeek Issayaasi haaso'emmak raagi muuxemo'aten; kunninna
18«Kunnise ani fi'lennekinna
eeyyanekinna iso'ni gammadaanneki anki eriganji isoten;
Hafuura anka iso'ni uggannon;
isinna murte anixxa gosa gosake arduwwi'a kulaan.
19Isi moromabaan,
cancaba'a, hafuurakanna orake'n laqisaba'a.
20Dhugaa assa atixxa injifachchotee geesisaa qico'ni
cancanemeeka shonbooqo midde enqabaan
Jululliyyeeka xassanna xolsaba'an.
21Gosa gosak arduwwinna iso'n addataan» hiyye.#Isa. 42:1-4.
Yessuusinna Be'ilzeebuuli'i
(Mar. 3:20-30; Luq. 11:14-23)
22Ookkonechchinni udumi'a fuggichchi hafuurinni abidemeeka balla'akenna afo'o duudeeka manjichcho mitte manni Yessuusibaa idage. Yessusinna manjichcho konnee'e fayyise; manjichchikinna uudateenna haaso'atee'e dande'e. 23Ardi duuchchinna jajeexxi, «Isi kunn Daawwitike belto kaduuta?» hiyye.
24Feerisito kinni tennee laqqee wodda, «Kunni manjichchi durriisa fulcha'neechi Bi'eelzebuuli hiyyemaake fuggichchi hafuurke akeekisanjini malee fuggichcha hafuura fulchaba'a» hiyye.#Mat. 9:34.; 10:25.
25Yessuusinna heduma insa'neka ege'neexxi hiyyee qici, «Mootumma mitte weli qoqqoodendeexxi weli'an weli lolenda'neexxe kaddoole mootumma eettene'a ba'nenden; iittanni qachchi yookaan mitti mini hadi welinaa'n gargar higoole ti'niyye urra dande'aba'a. 26Seexani Seexana fulcha'neexxe kaddoole weli gibe lameba hige'en hiyyotentaa? Iittate kaddoole mootumma isixxi hittata uuriyyo dandeetta? 27Eega ani fuggichcha hafuura Bi'eelzebuuli ani'a uwwa'neexxe hunnanni fulchaannexxe kaddoole oose ha'nooxxita ayyi uwwaaxxe hunnanni fuggichcha hafuura fulchita'neeyyote? Tennexxee oose ha'nooxi ha'no murtaan. 28Yaane kinni ani fuggichcha hafuura fulcheennek Mageniinke Hafuurinnite kadoole Mageniinxi mootumma ha'noba'a dage'een hiyyoten.
29«Manji mitti hunnaamessa ediseexxi usurebaang mine isike'n e'yeexxi karra isixxa adhdhaa manji hedhebaan. Hunnaamessa manjichcho usureechchinni udumi'a kinni mine isike'n hedheechcho adhdha dande'aan. 30Aninni welti hedhabaak duuchchi anee gibaake; aninni welti bukki assedhebaakinna xeeraaken.#Mar. 9:40. 31Ani ha'no'n kuloo! Manni hujaaxi cubbonna yowwaa yowwichchi duuchchi gattowwaal hiyyemaan. Yaane kinn Woyyichcha Hafuura'n yowwichiinxa yaane haaso'aakee'e cubbo isixxi gattowwaal hiyyendabaan. 32Manjiinke Belto'n yowwichchinxa yaane fulchaak duuchchi cubbo ifixxe'e gattowwaali'i alfaan; yaane kinn woyyichcha Hafuura'n yowwichchinxa yaane haaso'ake duuchchi'a tennenna kaddo'a hegeri'anna isi'a gattowwaal hiyyendabaan.#Luq. 12:10.
Haqichchi Gumma ifixxenni Ege'nema
(Luq. 6:43-45)
33«Haqichchi duuchchi gummati ifixxe ege'nemamamxxe, eloxxa gumma alfitinaashsha eloka haqichcho affe; haqichchi elobaake kadoole gumma isixxinna elobaaxxe kaddaan.#Mat. 7:20; Luq. 6:44. 34Ha'no buutetexxi oose fuggaaleyyet kaddina wodda eloxxa haaso'iyote'e habaa'n dandeetina? Manjiinka godoba ifike'ni wo'miteexxe afo'ik haaso'aani.#Mat. 3:7; 23:33; 15:18; Luq. 3:7; 6:45. 35Eloki manji ifike godoba'n tuu'lemmaxxe eloxxe yaanenaa'n eloxxa fulchaani; elobaaki manjinna ifike godoba'n tuulemmaxxe elobaaxxe yaane'naa'n elobaaxxa fulchaani. 36Dhugaate ha'no'n haaso'annen murittetixxa barra mann duuchchi afeeshshanni haaso'eeke haaso'i duuchchixxee qoremaan. 37Haaso'a atikenaa'n kexxeexxa ati qulloondatton; iittanna haaso'a atikenaa'n kexxeexxa ate'n murendaan.»
Beessisa Uudatixxe Shiqeeka Qortuma
(Mar. 8:11-12; Luq. 11:29-32)
38Eettene yanna mitti mitti Muuseke seerixxi barachchiissalluwwinna Feerisito Yessuusii'i, «Barsiisanjo ati beessisa assitaa'na'a uundo» hine.#Mat. 16:1; Mar. 8:11; Luq. 11:16.
39Yessuusinna insa'ne'n hiyyeexxi hiise haaso'ee qici: «Fuggittenna yabaabulto ila beessisa hassaan; yaane kinni wabeeka Yoonaasika beessisa malee insa'ne'aa uwwemabaan.#Mat. 16:4; Mar. 8:12. 40Yoonaasi lumoxxe qulxu'me giddo sase hashshanna sase barra sa'issemmashsha; iittanni Manjiink Belti buttiniinke godobi giddo sase barranna sase hashsha sa'issaan.#Yon. 1:17. 41Neneweke qachchik manni hiyyichcho Yoonaasika laqee wodda cubbo ifixxe'ni yaadeexxi aadde aagemmaxxe'e murtetixxa barra Neneweke qachchik manni welti ke'eexxi iso'ni muraan. Kunnise ha'noo'ni kulo! Yoonaasinaa'n sa'aakiqqa kaba hedheen.#Yon. 3:5. 42Saabake bogixxi moottitte Solomoonika beekuma laqiyyotee'e bayyii'n kexxe daggeemmaxxe'e eettene murtetixxa barra tenne ilanni welti kexxeexxi iso'ni murtaan. Ha'noo'ni kulo! Solomooninaa'n sa'eekiqqa kaba hedhee.#1 Moy. 10:1-10; 2 Odo. 9:1-12.
Fuggichchi Hafuur Manjoke'ni Higatika Jeeja
(Luq. 11:24-26)
43«Fuggichchi hafuuri manjokenaa'ni fulee wodda hafuura adhdhaaba halsa'n wodi'i hedhebaabaa bago booncho maremaan. Yaane kinni alfabaa. 44Ookko'ni, ‹Hedhennake mine'ninni illeema hige me'oo!› hiyyaan; illeema higeexxi dagaa wodda mini iikki haanni hiyye'e ca'a hiyyee qophpheessemme'naa alfaan. 45Ookkonechchi uduma fuggichchi hafuur illeema higexxi isonaa'ni fuggaaleessummati hara sa'eeka wele torbaane fuggichcha hafuuruwwa buki asseexxi idageexxi welt ookkone manjichcho'n hedhaan. Tennexxee ookkone manjichchixxi hedho edi irra hara yoxxeexxe kaddaan. Konne barike fuggaalessa manna'ni kaddaaxxi yaanenna iita tennee labbaaxxen» hiyye.
Yessuusixxa Amanna Isika Dayyuwwa
(Mar. 3:31-35; Luq. 8:19-21)
46Yessuusi ardake'ni haaso'a'nenige'ni ama isixxinna dayyuwwi iski iso'o haasossino'a hanseexxi gadhdho uurrineemmani. 47Ookko hedheemmake mannanaa'ni mitti iso'o, «Ama atixxinna dayyuwwi atiki atee haasessino'a hanse'e gadho uurrine'eeni» hiyye.
48Yessuusi kinni iso'n, «Ama anxi ayyete? Dayyuwwi ankinna ayyeera?» hiyyexxi hiisse haaso'e. 49Ookkonechchi uduma hordofeeyye ifixxe'n anga wirri asseexxi «Ama anxinna dayyuwwi anki konneerateni. 50Iimate'ni hedhdheke anke Annixxa fedhi wonshaaki duuchchi isi anke dayyo anxe dayyoninna anxe aman.»
Currently Selected:
Matoosixxa Wengeele 12: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia