Leewwitotika Maxaafa 3
3
Mittoomiixxa Uwwa
1« ‹Ayyinna lalokenaa'n Duuchchi Woddike Gootti'a mittoomiixxa uwwa shiqishaa wodda fayyaka jibichcha yookaan fayyaaxxa saayya file iyyedagowwaal. 2Hore shiqishaak manji shiqishammake horiinke umi hana anga ifixxa uggeexxi Mageni ulfinik leellammake duunkaanixxe hula bira gorra'owwaal; qeese Aaroonixxi labbaxxi oose munde ookkone horixxa aaxxeexxi tolchimalchiinke shooliinge kasa'n fiffixxowaal. 3Mittoomiinke tolchi'naa'n Duuchchi Woddike Goottti'a giirate'n shiqaake tolcha asseexxi shishowwaal; godobi giddira buqaaki mooro'o, godobi giddira'n hedheeka mooro'o duuchcha, 4Lame kalattuwwa, tenne kalatuwwa hananna ciinachchuwwiinke qarqara'n hedheeka mooro'o, iittan tidhoti hana hedheeka saapha kalatuwwati welti fulchowwaal. 5Kunni ciincatike tolcha kademmaxxee Aaroonixxi labbaxxi oose tolchimalchoke'n giiratixxe haqqe hana ciincesitowwaal; konne tolchixxi fishshe Duuchchi Woddike Gootta gammachchiissaan.
6« ‹Mittomakee shiqaaki tolchi gedhebokenaa'n yookaan re'etenaa'ni kadoole, fayyakenna labbake yookaan meyyake kadowwaal. 7Ayyinna shiqishaak tolchi buruusa gedhebiinke kadoole Duuchchi Woddike Gootti edo shiqishowwaal. 8Anga ifixxanna buruusa ookkoneke umi hana uggeexxi Mageni ulfinniki leellammake duunkaan edo ookkonee buruusa gorra'owwaal; Aaroonixxi labbaxxi oose ookkone buruusixxa munde aaxxe tolchimalchiinke shooliinge kasa'n fiffixxowwaal. 9Magenoke ciincatike tolcha kadeexxi ookkone shiqeemake mittoomiinke tolchinaa'n ciincatike tolcha kadeexxi shiqaachchuwwi: ookkone horik ha'yinna duugunguurii qico'n fulchendeexxi duba duuchcha, godobi giddira buqeek mooro'i duuchchi, godobi giddiirinni welti abidemeek mooro'i duuchchi, 10Lame kalattuwwa, tenne kalattuwwa hananna ciinachuwwiinke qarqara'n hedheeke mooro'o, iittanni tidhoti hana hedheeka saapha kalattuwwandinni welti fulchowwaal. 11Qeesichchikinna konnee duuchcha Duuchchi Woddike Gootti'a shiqeeke itatike tolcha asse tolchimalchoke'n ciincesaan.
12« ‹Ayyinna Magenoke shiqishaaki tolchi re'ete kaddoole Mageni edo shiqishowwaal. 13Anga ifixxanna ookkone recciinke umi hana uggeexxi duunkaan edo gorra'owwaal; Aaroonixxi labbaxxi oosenna munde eettenee aaxxeexi tolchimalchiinke shooliniinge kasa'n fiffixxowwaal. 14Ookkone recciinke maalanaa'n Duuchchi Woddik Gootti'a itatike tolcha assine shiqinshaaki: godobi giddira buqamake mooro'o, godobi giddiirinni welti abidemeeka mooro'o duuchcha, 15Lame kalattuwwa, tenne kalatuwwa hananna ciinaachuwwiinke qarqara'n hedheeka mooro'o, iittanni tidhoti hana hedheeka saapha kalatuwwandinni fulchowwaal. 16Qeesichchikinna tennee ita duuchcha Duuchchi Woddike Gootti'a gammachchiissaaxxe fishshe kaddaashsha tolchimalchoke'n ciincesowwaal; ha'yo duuchcha Duuchchi Woddike Gootti'a foyendeexe kaddowwaal.
17« ‹Isira'eelike manjonaa'n ha'yo afeeka maalanna horiinxa munde itaaki hedhoqqe'e; tinninna Isira'eeliki ardi hedhaake baro duuchcha'ninna booncho duuchcha'n heqqendeexxi hexxaaxxe aada kaddowwaal.› »
Currently Selected:
Leewwitotika Maxaafa 3: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
