Leewwitotika Maxaafa 26
26
Ajajenshati Afendaaxa Eebba
(Lan. 7:12-24; 28:1-14)
1« ‹Magenikinna magenonfatino'a heene bifaxxa fakke giissexxinoqeni; ittani kinjiki yookaan heene yaanenninna fakke giissitine uurrilsitinoqen; ani Mageno ha'nooken.#Fula. 20:4; Lew. 19:4; Lew. 5:8; 16:21-22; 27:1.
2« ‹Anxa ayyaaniinxa barruwwa ulffeesse; anee magenonfatinaa boonchcho duuchcha ulfeesse; ani Magenoken.
3« ‹Seera anke'ni galdinoolenna ajaja anka muuxxinoole, 4Boga ha'nooka midhati, haqqe ha'nooxxi gummati wo'mitaashsha xeena yannande'ni gansisanon. 5Midha misse bira saxxammaxe midha bukki assexxine aassexine birtinebaangi woyenetixxa gumma qocexxinaaxxi yanna geltaan; woyinetixxa gumma qocexxine birtinebaangi midha rorlkitinaaxxi yanna geltaan; itatee hasissaaxxa duuchcha alfitinaan; boga ha'nooke'ninna nage'iki hexxinaan.
6« ‹Boga ha'nooke'ni nage'a uwwanon; ayyeenna sodaatinebaangi soda'a belo diiphphinaan; fuggoka biniinchanna boga ha'nookenaa'ni hoyyanon; konneechchi edi'a ha'no lolaaki hedhabaan. 7Naapha ha'nooka injifattinaan; bagedikinna heddo naapha ha'nooka birtinaan; 8Ondi ha'nooki dhibba naapha injifataan; dhibbi ha'nooki tomme kuma naapha injifattinaan; naaphi ha'nookinna bogedoke'ni mudaan.
9« ‹Ha'noobaanna elleti wirri hiyyanon; sanne ha'nooxxa bira sa'issanon; kako anxanna itti jaabeessannoni. 10Sa'e sanixxa midha ittinaa'naani karnixxa haaroxxa aassate edixxa fulchitinaan. 11Anina galduma anka ha'nooxxe oddo'ni assedhannoni; ha'noonna jibbabo'noni. 12Aninna ha'nonni welti hedhannon; Mageno ha'nooke kadannoni; ha'nona arda anke kaddinaan.#2 Qor. 6:16. 13Langaxxa garbake kaddinabaashsha Gibtseke boga'ni hexxinemmaxxe garbummanaa'n fulchenneki ani Mageno ha'nooken; ha'nonaa'ni garbumma hoyye wele manni'a hirendinebaangi ifi dandetine galdinaahshsha asseennen.
Ajajema Gopha Idaggaaxxa Mura
(Lan. 28:15-68)
14« ‹Mageni kinni anee laqa gophphine ajaja anka muuxa gophphinoole, mufeti gananon; 15Ajaja anka muuxa gophphinoole, seera anka tuffatinoole, kako ha'noni aagennaxxa diigginoolenna aada anxa jibbitinoole, 16Hara lumoka alayyo, huqqa, ille balleesse biso butti'a hiissaaka eebbinjiinka dhukkuba idaganonn; naaphi ha'nooki itaaxxa sanne tolanga rokkinaan. 17Mufeti ha'noobaa wirri hiyyanonn; naaphi ha'nooki lole ha'noo injifataan; ha'no jibbammakinna ha'no galchaani; ayyinna ha'no shorrebaangi baqatinaan.
18« ‹Tinni duuchchanna kaddee'na midde ani'a ajajema gophphinoole xixichcho idaganoka torbaane anga caala bira sa'issannoni. 19Hunna anfeene hitine hollitina'neeka ha'noo salphisannoni; iimatenaa'ni xeeni ganabaashsha assannoni; buttatanna bagge sibiliinsha jabaattaashsha assannoni. 20Butta midha, haqqe gumma uuta'nebaangee tola elootinaan.
21« ‹Ane gibati itti me'itinoolenna anxa laqa gophphina'noole cubbo ha'nooxxishshanni torbaane anga lebe farra ha'no'ni idagannon. 22Ha'nooxxe oddo'ni fuggoka biniincha ergannon; biniinchuwikinna oose ha'nooxxa shiyaan; hore ha'nookanna biraan; ha'nonaa'ni shiixxoki manji calli gatammaxxee manji gophemee'naa ori duuchchi cuuggo'aani.
23« ‹Kunni xixichchi duuchchi ha'no'ni geyeechchi udumi'aanna anxa laqa gibbine ittani anee gibate'ni jabaattinoole, 24Ha'no'ni idagenake sa'emmake xixichchi irra ta'a torbaane anga caala lebe jaba qicini xixannoni. 25Aninni welti aagginemmaxxa kako diigginemmaxxee ha'no xixatee bagedo ergannon; qachchake'ninna bukki hitinoole fayyabaaka dhukkuba ha'nooxxe oddo'ni ibisannon; naapha ha'nookeenna anga uutinaan. 26Ita alfitinabaashsha assee'naa, tomme melaalle affeexxa midha duuchcha mitte she'la ra'issitaan; itatanna qunse shiqinshaan; ha'nonna ittine godditinabaan.
27« ‹Tinni duuchcha kaddee'naa ane gibate'ni itti jabaattinoolenna ani'a ajajema gibbinoole, 28Ha'no'ni mufeti ke'annon; sa'emmake xixichchinaa'ni torbaane anga itti caaleeka xixichcho ha'no'ni idaganon. 29Solo'iinxe bira sa'nenaa'ni kexxeexxa oose ifinxa itate'ni kexxinaani. 30Kooba koobate'ni affinemmaka magenonfachchotika boonchcho ballesanon; hixaanni gubeemmammachcho duuchcha diigannon; hara ha'noo jibbe rensha ha'nookanna ibbeexxe magenonfatinammaxxe fakkuwa'ni hana hunannon; 31Qachcha ha'nookanna diige birannon; magenonfachchotika boonchuwwa ha'nooka diiganonni; tolchuwwa ha'nookanna adhdhabo'noni. 32Boga ha'nookanna hara balleessannoni; naaphi dage abideekinna ha'nooke bogixxa ba'ne uude soda'ati roqoonsaan. 33Ha'no'ni bagedi ibaashsha asse wele boga'ni ha'noo xeerannoni; bogi ha'nooki manji gophemee'naa cuuggo'aani; qachchuwwi ha'nookinaa diigeme ba'aan; 34Ha'no naapha ha'nookike boga'ni hexxinaa wodda duuchcha bogi ha'nooki duwwike kademmaxxee sanbata anka ulfeessaan; okkonechchi uduma bogi hafuura adhdhe gammadaan. 35Ha'no hexxinemma wodda hafuura adhdhebaaki bogi ta'a ha'no hexxinebaaxxe yanna'ni hafuura adhdhaan.
36« ‹Bogake'ni gatemmaka duuchcha diidallo shafa ibissemmakika shokkinna laqaashshanni alanne barabara hine baqantaashsha assannon; lolake'ni naaphi shorraa'na baqantamma woddishsha baqantaan; mitti naaphinna insa'ne bira hedhebaangi gugufante inbaan; 37Ayyinna shorrebaangi naaphakenaa'ni baqantammashsha mitti mitteke'ni gugufate ibaan; hoone naaphanna uurritine lolatee dandetinabaan. 38Wele ardixe oddo'ni rertine muddineaan; naapha ha'nookiki bogi liqiinse'na okko gattinaan. 39Naaphi ha'nookike boga'ni reyotenaa'ni shiixxoki gattinaaki ha'nooxxenna edike ha'nooke annuwwixxe cubbonni yaayyitine gattinaan.
40« ‹Yaane kinni sanne ha'nooxi cubbo isna'neexxa, ittanni ane'ni jallantemmaxxanna anee gibemmake annuwwa insa'neekixxe cubbo'a aadde aangaan; 41Insa'ne gibe naapha insa'neekike boga'ni shorremmashsha assenneni; kaddolenna ila ha'nooxxi ifi salphissenna cubbo isexxe mura woxxoole, 42Ya'iqoobinni, Yisaaqinninna Abirihaaminni welti aagenexxa kako kassi hiyyannon; boga uwwanno hiyye uwwennexxa adde haaronsanon.#Dada. 17:7-8; 26:3-4; 28:13-14. 43Arda isika gophe duwwi hedheeki bogi hafuura adhdhe gammadaan; insa'nenna aada anxa adhdha gonphemmaxxeena seera anka ulfeessa gonphemmaxxe cubbo insa'neexxenaa'ni kexxeexxa cubbo insa'neexxe hasissaaxxa mura wonxaan. 44Kaddo male naapha insa'neekike boga'ni he'nee'na midde insa'nee hune waalabo'non yookaan birabo'non; insa'nee biraannele insa'ne'a aagennexxa kako muuxati qico'ni heqqannabaan; ani Mageno insa'neekeni; 45Yaane kinni Mageno insa'neeke kadonnaa'a Gibtseke boganaa'ni fulchennechchi udumi'a annuwwa insa'neekee aagennexxa kako kassi hiyyannon; ani Magenoken› » hiyye.
46Mageni isixxe oddo'ninna Isira'eelike ardixxe oddo'ni Muuse darree'ni Siinaxxe kooba'ni uwweeki seerinna aada tenneten.
Currently Selected:
Leewwitotika Maxaafa 26: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
