Leewwitotika Maxaafa 1
1
Ciincatika Tolcha
1Duuchchi Woddike Gootti ulfinnik leellammake duunkaana'n Mageni Muuse ye'eexi konnechchi butta hedheeka ajaje iso'n hiyye kulee qici: 2«Isira'eelik ardi Duuchchi Woddike Gootti'a tolcha shiqishaa wodda: lali giddii'n, gedhebi giddii'n, yookaan re'e giddii'n kadowwaal.
3« ‹Kunni ciincatik tolchi horiinke kadoole fayyaka jibichcha kadowwaal. Duuchchi Woddike Gootti edo adhdhemeeke tolcha kadaashsha Mageni ulfinnik leellammake dunkaanixxe hula edo shiqishowwaal. 4Cubbo isixxa biraake tolcha kadaashsha anga isixxa ookkone horike umi hana uggowaal. 5Manjichchikinna jibichcha ookkonee Duuchchi Woddike Gootti edo gorra'owwaal; Aaroonike minixxi qeese ookkone jibichchixxa munde Mageni edo shiqishowwaal. Mageni ulfinnik leellammake duunkaanixxe hula edo hedheeke tolchimalchiinke shooliinge kasuwwa duuchcha'n qeese munde fiffixxowwaal. 6Isinna ookkonee jibichcha duleexxi mikita mikita'n woxe fulchowwaal. 7Qeesichchi Aaroonixxi labbaxxi oose tolchiinxa haqqe tolchimalchoke'n tuuldeexxi giiratanna itti ha'ishshowwaal. 8Aaroonixxi qeese oose ookkone horika uminna ha'yo kukkutemeemmake maalinninni welti tolchimalchoke'n ha'yita'neexxe haqqe hana dalchitowwaal. 9Iikkinni manjichchi godobi giddiranna manne anshowaal. Qeesichchikinna tolchake shiqemmachcho duuchcha tolchimalchoke'n ciincesowwaal. Ciincatik foolinna Duuchchi Woddika Gootta gammachchiisaan.
10«‹Ciincatike tolchi'a re'etenaa'n yookaan gedhebokenaa'n shiqisha'noole fayyakenna labbake kadowwaal. 11Tolchimalchoke'n middi darre'n Duuchchi Woddike Gootti edo ookkone korbeessa gorra'owwaal; qeese Aaroonixxi oose munde ookkone horixxa aaxxeexi tolchimalchiinke shooliniinge kasa'n fifixxowwaal. 12Iikinni manjichchi gorra'eeka hore mikita mikitake'ni woxe fulcheechchi uduma qeesichchi ookkene horka maala duuchcha uminna ha'yo gattebaangi tolchimalchoke'n dalchendeexxi ha'yita'neexxe haqqe'n uggowaal. 13Manjichchikinna tolchemeeke horika godobi giddiiranna manne wodi'iki anshowwaal; qeesichchikinna tolchakee shiqemmachcho duuchcha Magenoke tolchimalchoke'n ciinceesowwaal; Iitta hedheeki ciincatiki fooli Duuchchi Woddika Gootta gammachchiisaan.
14« ‹Manjichikinna tolchiinxe ciinca'a shiqisho'a haseexxi uwwa ci'atenaa'nite kaddoole guugenjo yookaan shiixxoxxe guugenjo kaddowwaal. 15Qeesichikinna ci'a tolcha shiqishemmakenaa'n aadhe tolchimalchoke'n ci'a eetteneka gooba micciirowwaal; tolchimalchoke'n hexxeexxe giira'n umo isekanna ciincesowwaal; munde eettene ci'axxanna tolchimalchiinke qarqara'ni coccossowwaal. 16Guchchuwwatanna godobi giddiira tolchimalchokenaa'n boroti darre'n bululi huneemmammaxxe bakka'n hunowwaal. 17Ci'atika keeluwwa abide gargar hissoqe'e; yaane kinni maala kukkuteexxi qeesichchi tolchimalchoke'n hexxeexxe giira'n ciincesowwaal; iitta hedheeki ciincixxi fishshe Duuchchi Woddika Gootta gammachiisaaken.
Currently Selected:
Leewwitotika Maxaafa 1: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
