Yohaannisixxa Wengeele 6
6
Yessuusi Onde Kuma Manna Itise
(Mat. 14:13-21; Mar. 6:30-44; Luq. 9:10-17)
1Ookkoneechchi uduma Yessuusi Xibiryadoosi hiyyendaaxxe Galiilixxe lumoxxe abbaayya wido foofe. 2Heddi manninna Yessuussi ela gopheeka manna fayyissa'ni assemmaka mambe'iinka beessisuwwa uudemmaxxee isoo hordofe.
3Ookkoneechchi uduma Yessuusi kooba qabateexxi hordofeeyye isixxenni welti ookko ofo'le. 4Ayihudiink sa'atik ayyaani shiqeemman. 5Ookkone wodda Yessuusi ardi isibaa dagaa'naa toggi hiyye uudeexxi Filiphphoosii'i, «Kunni manni so'iinxa kebbonna habaa'ni hirranno?» hiyye. 6Isinna tenne qorechi isoo hega uudo'ate malee isi umo ifikenni asso'a hedeexxa ege'neemman. 7Filiphoosinna iso'n, «Mitti mitting manji so'iinxa kebbonnaa'ni shiixxo shiixxoxxa itaasha assatee lame dhibba diinareke so'iinxi kebbo midde geltabaan» hiyye hiise haaso'e. 8Hordofeeye isixxi giddii'ni mitti Simi'ooni Pheexiroosik dayyi Indiryaasi hiyyee qici, 9«Onde shiixxaramma so'iinxa kebbonna lame shiixarama qulxu'me abideeki belti mitti kaba hedheen; yaane kinn kunni konne ardi duuchchi'a habaa'ni geya?» hiyye.
10Yessuusinna insa'nee, «Ardi ofo'laasha asse!» hiyye. Ookkone booncho'ni yo'oxxi bada'a hexxemman; ookkoo onde kuma geyaaki labballi ofo'le. 11Yessuusinna onde so'iinxa kebbo aadheexxi galateeffate; ofo'leeke manni'anna insa'ne hansaa qicika qoode; iitanni qulxu'metanna hansaa qicixxa uwwe. 12Duuchchiingi manni ite goddeechchi uduma isinna hordofeeyye ifixxa, «Mittikinna xeeremebaang indaa'naa gatemmachcho bukki asse!» hiyye. 13Insa'nenna manni iteexxe onde so'iinxe kebbonaa'n gatteexxa hanba bukki assineexxi tommenna lame qore wonshine. 14Tennenaa'ni kexxeexxa manni Yessuusi assammaka mambe'iinka beessisa uundeechchi uduma, «Dugaaten, kunni kaba butta duuchchibaa dagaake wabeekichchan» hiyye. 15Yessuusinna manni dageexxi isoo hunnadinni moyanjoke asso'a hedeexxa ege'neexxi higgeenni qofinni koobatibaa bayyate me'e.
Yessuusi Abbaayyate'n Hana Tarkaafata'ni Me'e
(Mat. 14:22-33; Mar. 6:45-52)
16Bogi hashsha wodda hordofeeyye isixxi abbaayyatibaa addaadde me'ite: 17insa'nenna hobolote'ni gulufeexxi Qifirnahoomik qachchibaa me'ine. Bogiki hashsheemman Yessuusinna insa'nebaa ta'i qico'n dageemmabaan. 18Jabaxxi diidallo diidallesitammaxxee abbaayya lele'mite. 19Hordofeye isixxinna onde yookin jaane kiilomeetire qico hobolo shaffisa'n me'iteeshshanni Yessuusi wodii hana tarkaafata'n hobolotibaa daga'naa uudeexxi alalte. 20Isi kinn insa'ne'n, «Anteni mee sodaatte!» hiyye. 21Tennexxee insa'ne hobolote'n isi gulufo'a hanse; hobolotinna iikki woddi insa'ne me'inammake boonchiba gelte.
22Langa baro abbaayyati widi darre gatemmak mann ookko mitte hobolo calli hexxeemmaxxa egenne; insa'nenna Yessuusi hobolo gulufebaaxxanna hordofeeyye isixxi qofitinn me'iteexxa egenne. 23Ookkoneechchi uduma wele hoboluwwa Xibiryadoosinaa'n kexxeexxi ardi Gootti eebbiseemmaka onde buddeena itemmabaa dagge. 24Yessuusi yookaan hordofeeye isixxi ookko he'nebaaxxa manni ege'nee wodda, Yessuusika hasito hoboluwwa eettennenni Qifirnahoomi'a me'e.
Yessuusi Hedhotike Budeenan
25Manni abbaayyati wido isoo afee wodda, «Barchchiisanjo haano kaba daggette?» hiyye. 26Yessuusinna insa'nee hiyyee qici, «Ani dhugaate ha'no'n hiyyaannen anee hassina'neechchi budeena ittinemmaxxeenna godditinemmaxxeete malee, mambe'iinka beessisuwwa uuddinexxeetebaan. 27Baxxaaxxe ita hujjinoqqe'e; tenne irra Mageni Aabi Belto ifike'ni kokeessatika maxxansa maxxansemmaxxee Manjiinki Belti ha'noo'a uwwa'neexxe duuchchi woddixxe hedho'a kaddaaxxe ita'a hujje.» 28Ookkoneechchi uduma mannikinna isoo, «Yoona Mageniinxa huje hunjonaa no'o maa assa hasissa?» hiyye. 29Yessuusinna insa'ne'n, «Ha'no isi erge'eeke'ni amandinaashsha tinni Mageniinxe hujen» hiyye hiisse haaso'e. 30Tennexxee insa'nenna isoo hinee qici, «No'o uundennexxi ate'ni amannonaa maa manbe'iinka beessisa assitatto? Ati hujjattochchi maachchota? 31‹Indaashsha iimi'ni budeena insa'ne'a uwwe› hiyyende borreessendemmashshann, edik annuwwi no'oki qiilla gammoojje giddo menna indeen,» #Fula. 16:4, 15; Far. 78:24. 32Yessuusinna insa'ne'n hiyyee qici, «Ani dhugaate ha'no'n hiyyaannen iimatenaa'ni ha'no'a budeena uwweek Muusetebaan; dhugaatika budeena iimatenaa'ni ha'no'a uwwaaki kinni anke Annan. 33Mageniink budeeni isi iimatenaa'ni dirraake, kaba butta duuchchike manni'anna hedho uwwaaken.»
34Tennexxee mannikinna isoo, «No'oke Gootta! Konnee budeena duuchchi wodda no'aa uwwi!» hiyye. 35Ookkoneechchi uduma Yessuusi insa'nee hiyyee qici, «Hedhotik budeen anten. Anibaa dagaak ijje solo'wabaan; ane'ni amanaakinna ijje dheebo'wabaan. 36Yaane kinni Ani ha'no'n kulenneshshanni anee uuddineexxi midde amandinabaan. 37Aabi ani'a uwwaak duuchchi anibaa dagaan. Anibaa dagaaka haranga gadhi'a shorrabe'no. 38Ani iimatenaa'ni dagenechchi fedhii anxa assonnaate kaddebaak anee ergemmakixxa edhii muuxonna'aaten. 39Anee ergeekixxi fedhii, ani'a uwwemmake duuchchanaa'ni mittekanna midde belleesebe'nong udumixxe barra'ni ke'isannoshshaten. 40Anke Annixxi fedhii Belto isika uudakinna iso'ni amanaak duuchchi, duuchchi woddixxe hedho alfaashshaten. Aninna udumixxe barra'ni isoo ke'isannon.»
41Ayihudikinna, «Iimatenaa'ni dageek budeen anten» hiyyemmaxxee iso'n maammuqate'n ke'e. 42Insa'nenna, «Kunni anna isikanna ama isixxa egenneennenge Yooseefike belto Yessuusindebaa? Ta'ata hitta isi ‹Ani iimatenaa'n dagennen› hiyya?» hine.
43Yessuusinna insa'ne'n hiisseexxi hiyyee qici, «Ha'noo weli'ann weli maammuqinoqqe'e. 44Anee ergeek Aabii anibaa iyyedaga gophoole ayyinna anibaa dagatee dande'aak hedhebaan; Aninna udumixxe barra'ni isoo reyotenaa'n ke'issannon. 45Wabeekotike maxaafa'n, ‹Duuchchiing Magenokenaa'n barateeke kadaan› hiyyendee borreessendeen. Tennexxe Aabixxa laqeexxi isonaa'ni barataak duuchchi anibaa dagaan.#Isa. 54:13. 46Iitta hiyya Mageniinbaa'ni kadeeke malee Aabii uudeeki ayyinna hedhebaan; Aabii uudeek isoo callan. 47Dhugaate ha'no'n hiyyanen ane'ni amanaak duuchchi duuchchin woddixxe hedho afe'een. 48Ani hedhotike budeenan; 49Edik ha'nook annuwwi qiilla gammoojje giddo menna inde, kaddo malee renne. 50Yaane kinni Iimi'ni dirreek budeen konneten; konee budeena itaak reyabaan. 51Iimi'n dirreek hedhotik budeen anten. Huuni manjinna konnee budeeninaa'n itoole isi duuchchi woddi'a hedhaan. Kunni budeeninna kaba butta duuchchike manni'a hedhote kadaasha ani uwwanoke anke maalan» hiyye. 52Ookkoneechchi uduma Ayihudi, «Kunni manjichchi maala ifika indonna'a hitta no'aa uwwa dande'a?» hiyya'ni weli'aanni weli jaba qico moromme. 53Yessusinna insa'ne'ni hiyyee qici, «Ani dhugaate ha'no'n hiyyaannen ha'noo Manjiinke Beltika maala ita gophphinoolenna munde isixxa ha'wa gophphinoole umo ha'nongee hedho affinebaan. 54Maala anka itaakinna munde anxa ha'waak, duuchchi woddixxe hedho afeen; Aninna udumixxe barra'ni reyotena'ni isoo ke'isannon. 55Maali anki dhugaatixxe itan; munde anxinna dhugaatixxe ha'wan. 56Maala anka itaakinna munde anxa ha'waak ane'n hedhaan; aninna iso'ni hedhannon. 57Hedhaak Aabii anee ergemmashshanni aninna isinaa'ni kexxeexxa hedhoti hedhaneeke kadenneshshann anee itaakinna iittanni anenaa'ni kexxeexxa hedhoti hedhaan. 58Iimi'ni dirreek budeen konneten; edik ha'nook annuwwi menna itee reyeen; konnee budeena itaaki kinn duuchchi woddi'a hedhaan.» 59Isinna tennee haaso'ek Qifirnahoomi Muuseka seera barantammake mine'ni barachchiisate'ni hedhemma woddan.
Heddo Hordofeeyye Yessuusii'i Hordofa Waalde
60Isixxe hordofeeyye giddii'ni heddo tennee laqqaa wodda, «Kunni yo'oshsha ha'ureeke hiyyichchon; ayyete konnee hiyyichcho adhdha dandee'a?» hite. 61Hordofeeyye isixxinna tenne yaane'ni maammuqeexxa Yessuusi umo ifingenninni ege'neexxi insa'nee hiyyee qici, «Tinni yaane ha'noo guggufachchiisaaxxee? 62Yoona Manjiink Belti edo hedhemmaba'a iimi'a me'aa'naa ha'no uudinoole maa hitino'aate? 63Mageniink Hafuuri hedho uwwaan; maal kinni mitte la'onna uwwabaan. Ani ha'no'n kulenneki hiyyichchi hedhoten; Hafuuraken; 64kaddo malee ha'no giddii'ni mitti mitti amanabaake hedheen.» Tenneenna Yessuusi haaso'eechchi ayyi amanebaaxxanna ayyi isoo sa'isse uwwaaxxa edonni ege'neemmaxxeten. 65Isinna lebeexxi, « ‹Ha'no'n Aabibaa'ni eeti uwwendeeke kaddoole malee ayyinna Anibaa daga dande'aak hedhebaan› hiyyenechchi tennexxeeten» hiyye.
66Eetenne yanna'ni hordofeeyye isixxi giddii'ni heddi udumi'a hige; insa'nenna ookkoneechchi udma isoo hordonfebaan. 67Yessuusinna tommenna lamiinxa ifixxa hordofeeyye, «Ha'noo me'itino'a hassina'nebaan hiyyatebata?» hiyye. 68Ookkone wodda Simi'ooni Pheexiroosi iso'n hiyyee hiise haaso'ee qici, «No'oke Goottaa! No'o ayyiba me'inanno? Ati duuchchin woddixxe hedhoke hiyyichcho affeetten. 69Ati mittechcho, Mageniinke Woyyichcha kaddetexxa no'o egenneennen, amanneennen.» #Mat. 16:16; Mar. 8:29; Luq. 9:20. 70Ookkoneechchi uduma Yessuusinna insa'ne'n, «Tommenna lamiinga ha'noo fi'lenneki Aneendemmabaa? Yaane kinni ha'noo giddii'ni mitti durriisaken» hiyye hiise haaso'e. 71Isinna tennee hiyyeechchi Simi'oonike beltixxe Asiqorootuke Yihudaxxeeten; Yihuda tommenna lame hordofeeye giddii'ni mitteke kadoolenna Yessuusii'i sa'isse uwwaak isote kademmaxxeeten.
Currently Selected:
Yohaannisixxa Wengeele 6: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
