Yohaannisixxa Wengeele 5
5
Yessuuusi Edike Sanbatixxa Barra Mitte Naafa Manjichcho Fayyiseexxa
1Ookkonneechchi uduma Ayihudiinke ayyaan hedhemman: Yessuusinna Iyyerusaalemi'a me'e. 2Iyyerusaalemii'n Gedhebiinxe hula bira ondi iimi'ni kapheemeki mammaremaaka oruwwa afe'eeki Aramayike laagadinni Beetesayida hiyyemaaki mitti xammanqaak baleessi hedhemman. 3Konne oruwwi giddo heddi elagopheek, naafuwwi, ille ba'ekiir, shiilekiir, gogeekiir, ookkone wode'iixxa lele'ma heqqe'na'ni ookkoo diinphaamman. 4Mitte mitte yanna iimixxi erganna dirriteexxi ookkone wode'e lele'misaa wodda edise ookkone xammanqammake wode'i giddi'a e'yeeki bisoke'ni galdeexxe heene dhibonaa'ni fayya'nemman.#5:4 Konne laakosik borresemk yaadi wele hundaayetixxe borro'ni hedhekeban. 5Ookkonna sase tommenna saddeeta wogga ela gophe hedhemmak mitti manjichchi hedhemman. 6Yessuusinna konne manjichcho ookkoo diiphe'naa afeexxi kunni manjichchi heddo yanna konne qicinn hedhemmaxxa ege'neexxi, «Ati fayyitotaa hassaatte?» hiyye.
7«Anke Gootta,» Iikki ela gopheemmaki manjichchinna hiissexxi, «wode'i lele'ma wodda xammanqaamak wode'i giddo anee uggaaka manjo afebo'non. Ani ookkoo e'yonaa wo'laananno wodda weli anee edisa'neeni» hiyye.
8Yessuusinna isoo «Kexxe rare atixxa dulkitetexxi me'i!» hiyye. 9Manjichchikinna hirba okkone'n fayye: isinna rare dulkeexxi me'e.
Tinn yaane kaddeeki edike sanbatixxe barramman. 10Tennexxe Ayihudiink baalloomiik manni ookkonee fayyemmaka manjichcho, «Telchi edi sanbata kadeemmaxxee rare atixxa dulkatee seeri ati'a uwwabaan» hiyye.#Neh. 13:19; Erm. 17:21.
11Isi kinn «Anee fayyiseek manjichchi, ‹Rare atixxa dulkitettexxi ane me'i!› hiyyeen» hiyyeexxi insa'ne'a hiisse.
12Insa'neena isoo, «Atee ‹Rare atixxa dulkite me'i!› hiyyeek isi ayyete?» hine qorre.
13Yessuusi insa'nenaa'ni bayyate ardiinxe oddo'ni sa'emmaxxee iikki manjichchi ayyi isoo fayyiseexxa ege'nemmabaan.
14Ookkoneechchi uduma Yessuusi ookkone manjichcho Woyyichcha Galmi giddo afeexxi isoo, «Ta'a ati fayyiteetten: tennenaa'n caaldexxi ate'ni geltabaashsha konneechchinn edi'a cubbo hujjoxxee!» hiyye.
15Manjichchikinna isoo fayyiseek Yessuusite kadeexxa mare Ayihudiinke baalloomiinke manna'n kule.
Belti Hedho Uwwaan
16Ayihudiink ja'laabbuwwi Edike Sanbaatixxa barra Yessuusi tenne yaanuwwa asseemmaxxee isoo abido'aa shorraamman. 17Yessuusinna insa'ne'n, «Anni Anki telchi qico'ni hujende'ni hedheen: Aninna iittanni huja'ennen» hiyye. 18Yoona Ayihudiink ja'laabbuwwi, Yessuusi'i edika sanbata ulfeessa gopheexxee calla kaddebaak isi Mageno Anna ifike assedheexxi ifi Magenik qixxe assemmaxxee insa'ne isoo shinno'a jaba qicinni hansa'nemman. 19Yessuusinna insa'ne'a hiyye hiissee qici: «Ani dhugaate ha'no'aa hiyyaannen, Aabi hujaa'naa uudexxa calla malee'e Belti umi isikinni mitteelchonna assa dande'abaan. Aabi huja'nexxa duuchcha Beltikinna hujaan. 20Aabi Beltokanna eeyyaammaxxee huja'neexxa duuchcha isi'a leellishaan. Ha'noonna konne mambe'a hitinaashsha isi tenne saxxeexxa yaane isi'a leelishan. 21Aabi reyemmaka manna ke'issaammashsha hedhotanna insa'ne'aa uwwaammashshanni Beltikinna kinni iittanni eeyyeke duuchchi'a hedho uwwaan. 22Aabi mitteke'ninna murte murabaan: yaane kinni murte duuchcha muraashsha Beltokee sa'issee uwween: 23Isinna tennee assechchi, manni duuchchi Aabii ulfeessammashshanni Beltokanna ulfeesaashshaten. Belto ulfessabaak ergeemmaka Aabiinna ulfeessabaan.
24«Ani dhugaate ha'no'aa hiyyaannen, hiyyichcho anka laqaaki, anee ergeke'ninna amanaaki duuchchi woddixxe hedho afeen: isi reyotiba'ni hedhotiba'a foofemmaxxee iso'ni murendabaan. 25Ani dhugaate dhugaate ha'no'aa hiyyaannen, reyemmak manni Mageniinke Beltika hafuura laqqaaxxe yanna daggaan: isenna ta'aten: laqaakiirinna hedhot hedhaan. 26Anni umo ifinge'ni hedho afemmashshanni, Beltikinna umo ifinge'ni hedho afaashsha isi'a uwwe'en: 27Isinna Manjiinke Belto kadeemmaxxee isi murashsha baalloomma isi'a uwwedheen.
28«Tenne yaane'ni mee mambe'a hiyye! Moogemeek duuchchi hafuura isika lanqaaxxe yanna daggaan; 29eloxxa hujeekiir reyotenaa'n ke'eexxi hedhaan elobaaxxa hujeekiir kinni reyotenaa'n ke'eexxi murte adhdhaan.#Dan. 12:2.
Yessuusixxee Kulendeexxa Dhugaa
30«Ani calli umo ankenni mitteelchonna huja dande'abo'non, Ani muraannoki Ani laqenexxe callan, Anee ergeekixxa eetti malee ifixxe eeyyanni assa gophaannaxxee Ani muraannoxxi murte dhugaatixxen.
31«Ani anke umixxee dhugaa kulonnole, dhugaa kula anxi adhdhendabaan. 32Anxee dhugaa kulaak weli hedheen; isi anxee dhugaa kulaaxxi dhugaatixxe dhuga kula kaddeexxa ege'neennen.
33«Ha'noo Yohaannisibaa erganjo ergitine'eemmani isinna dhugaatixxee dhugaa kule'een. 34Ani tennee hiyya anxi ha'noo anjirendino'ate malee ani'a manjiinxi dhugaa kula hasiisseexxetebaan. 35Yohaannisi buba'ni ifa uwwammake ifishshatemman; ha'noonna heenooxxe yanna'a isike ifinni gammadino'a eettineen.
36«Ani kinn Yohaannisi kuleexxe dhugaa kulaannaa'ni saxxeexxa dhugaa kula afeennen; tinni anxi dhugaa kula Aabi hujannoshsha uwweexxe hujen. Tinni ani hujaannexxi huje Aabi anee ergeexxa dhugaa kuldaaxxen. 37Anee ergeek Aabi isi umo isingenninni anxee dhugaa kule'een. Ha'noo ijje isika hafuura laqqinebaan; bifa isixxanna uuddineebaan, 38isi ergeeke'ni ha'noo amana gophphinaammaxxee hiyyichchi isik ha'noo'ni hedhebaan. 39Ha'noo Woyyichcha maxaafuwwanaa'n duuchchi woddixxa hedho alfitinaachcho labbaa'naa; maxaafuwwa qottinaan. Kunni maxaafuwwi anxee dhugaa kulaakeeran, 40kaddo malee ha'noo hedho alfitinaasha anibaa daga hassinabaan.
41«Ani manjokenaa'n ulfinna hasabo'non. 42Yaane kinn ani ha'noo ege'neennen; Mageniinxi jaalalanna qalbe ha'nooxxe'ni hexxebaaxxa ege'neennen. 43Ani anke Annike summinni dage'naa anee adhdhitinebaan; yaane kinn weli ifike summinn dageele adhhditinaan. 44Ha'noo weli'aan weli ulfeessitina'neek, yaane kinni mitte Magenonaa'ni daga'neeka ulfinna halsa gophphina'noole yoona hittata amana dandeettinaa?
45«Ani ha'noo Aabi edo ku'lannochcho ha'no'n fakkaatoqqe'e: ha'noo ku'laaki adde assexxinemange Muuseten. 46Ha'noo sila Muusee amandineele ane'ninna amandinamman; yaane kinn isi anxee borreesseen. 47Yaane kinn ha'noo isi borreesseexxa amana gophphinoole ani haaso'annexxa hitta amandinataa?»
Currently Selected:
Yohaannisixxa Wengeele 5: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
