Yohaannisixxa Wengeele 20
20
Yessuusi Reyotenaa'n Ke'e
(Mat. 28:1-8; Mar. 16:1-8; Luq. 24:1-12)
1Sanbatiinxa gorsa bariisa boro haachchabbebaang, Megidelixxi Maarami moogginbaa marte: isenna moogoke'ni cunfeemmak kinji goggo'mee'naa uudde. 2Tennexxee ise Simi'ooni Pheexiroosibaanna Yessuusi eeyyaammake wele hordofalliba gongita'ni daggeexxi, «Gootta moongemmaxxe balenaa'ni insa'ne fulchinee aadhdhine'een haba uggineexxa egennebe'no» hite kulde.
3Ookkoneechchi uduma Pheexiroosinna weli hordofisanj ke'ne moogginbaa me'ine. 4Lamiing gongina'nemman: weli hordofisanji kinni Pheexiroosi waale sa'eexxi edise mooggiinba geye. 5Isinna heeshshi hiyyeexxi moongemmaxxe bale giddi'a uude wodda mirqineemmaxxi seemma ookko hexxe'naa uude; yaane kinni mooggiinxe bale giddi'a e'yeba'a. 6Ookkoneechchi uduma isoo hordofaammak Simi'ooni Pheexiroosi mare geyeexxi moogiinxe bale giddi'a e'ye: isinna mirqinemmaxxa seemma ookko hexxeenaa uude: 7iitanni isi Yessuusike umo'ni hana mirqinemmaxxa seemma uude: tinni seemmanna mirqinemmaxxe seemmanaa'ni qofitinn wele booncho'ni mirqendeeshshann hexxe'naa uude. 8Iikki edise dageemmak hordofalli; mooggiinxe baleba giddi'a e'ye uudeechchi uduma amane. 9Tinninna «Yessuusi royotenaa'ni ke'a hasissaan» hiyyaak Woyyichchi maxaafika hiyyichcho insa'ne kassi hinemmabaan. 10Ookkoneechchi uduma lamiinxi hordofeeyye mini ifikiba higge me'ite.
Yessuusi Megidelixxe Maarami'n Leelle
(Mat. 28:9-10; Mar. 16:9-11)
11Yaane kinn Maarami hirreessi gadhi darre uurite ooxxaamman. Isenna ooxxa'ni mooggiinxa bale uuddo'a heeshshi hite. 12Yessuusik renshi hedhemma booncho'ni golalooxxa seemma oddo'witeexxi lame erganna mitte lekkatibaa'n, wele umiibaa'n ofolde'naa affe. 13Tinni ergannanna ise'n «Tee manjichcho ati mayee ooxxaatte?» hite isee qorte.
Isenna, «Gootta anka adhdhine'een; haba isoo uggineexxa ege'nebe'no» hite. 14Isenna tennee hite udumi'a wirri hite wodda Yessuusi ookko uurre'naa affe; yaane kinn ise Yessuusite kadeexxa egendeemmabaan. 15Yessuusinna isee, «Tee manjichcho ati mayee ooxxaatte? Ati ayyee hassaatte?» hiyye.
Isenna isi hiddichchiinka fichcha heqqa'neeke manjo ise'ni labee'naa, «Anke gootta, ati adhdhiteettexxe kaddoole maganneteni ani isoo adhdhonnaa ballo'o isoo haba uggiteetexxa Ane'ni kuli» hite.
16Yessuusinna isee hiyyee qici, «Maarami!» hiyye.
Isenna isibaa wirri hiteexxi Aramayike laagadinni, «Rebuuni!» hite; iitta hiyyatinna, «Barachchiisalloo» hiyyaten. 17Yessuusinna ise'n, «Ani Aabibaa iimi'a me'a gopheennaxxee anee abidoxxe'e; yaane kinni ati anke dayyuwwiba martettexxi ‹Ani anke Annibaanna ha'noke Annibaa anke Magenibaanna ha'noke Magenibaa iimi'a me'aannen› hiyyeenni hiteettexxi insa'ne'ni kuli!» hiyye. 18Megidelixxi Maarami hordofeeyyetibaa daggeexxi «Ani Gootta uudeennen!» hite: isenna insa'ne'ni isi haaso'eexxa kulde.
Yessuusi Ifixxe Hordofeeyye'n Leelleexxa
(Mat. 28:16-20; Mar. 16:14-18; Luq. 24:36-49)
19Eettene edike sanbatixxe barraxxa hashsha hordofeeyye Ayihuda soddaatteexxi huluwwa danqarte mini giddo bukki hiteeba, Yessuusi dagee oddo insa'nexxe'ni uurreexxi, «Nage'i ha'no'a kadowwaal!» hiyye. 20Isinna tenne hiyyeeshshanni anguwwa ifixxanna cinaachcha insa'ne'ni leellishe. Hordofeeyyetinna Gootta uudde wodda yo'oshsha gammadde. 21Higgeenni Yessuusi insa'nee, «Nage'i ha'no'a kadowwaal! Aabi anee ergemmashsha Aninna ha'noo ergannon» hiyye. 22Isinna tennee hiyyeechchi udma insa'ne'ni uffuu hiyyeexxi hiyyee qici, «Woyyichcha Hafuura adhdhee; 23ha'no manniinxa cubbo gattowwaal hitinoole cubbo ha'noxxinna gattowwaal hiyyendaan; ha'no manniinxa cubbo gattowwaal hiyya gophphinoole kinni ha'no'a gattowwaal hiyyendabaan.»
Yessuusi Toomaasi'n leelleexxa
24Ookkone wodda tommenna lamiinxe hordofeeyye giddii'ni mitti Didimoosi hiyyemeek Toomaasi, Yessuusi dagee wodda isi insa'nenni welti hedhemmabaan. 25Tennexxee wele hordofeeyyenna iso'ni, «No'o Gootta uunde'eennen» hite. Yaane kinni isi insa'nee, «Ani misimaret otendeexxa isixxa anga uudebe'noki, qubichcho ankanna otememmaba uggebe'nok; anga anxanna otemeemmake cinaachcha'n ugge uudebe'nok Ani amanabe'no» hiyye. 26Torbati uduma hordofeeyye higgeenni mini giddo hexxemman: Toomaasinna ookko insa'nenni welti hedhemman. Huluwwa danqarendee hexxe'naa Yessuusi dageexxi insa'nexxe oddo'n uurre, «Nage'i ha'no'a kadowwaal!» hiyye. 27Ookkoneechchi uduma Yessuusi Toomaasii'i, «Qubichcho atika kaba uggi; anga anxanna uudi; anga atixxa diriirsite cinaachcha anke'n otemennaba uggi; amani malee mandoxxee» hiyye. 28Toomaasinna, «Anke Goottaa, anke Magemoo!» hiyye. 29Ookkoneechchi uduma Yessuusinna isoo, «Ati anee uuddee amandeetten. Uudebaak amanaakiir eebbiseme'eeken» hiyye.
30Yessuusi konnee maxaafa'n borreessemebaaka wele heddo manbe'iinka beessisuwwa ifixxe hordofeeyye edo hujedheen. 31Yaane kinni Yessuusi isi Kiristoosi Magenike Belto kadeexxa amandinaashsha, amandinnenna isike summinni hedho alfitinaashsha tinni borreessende'een.
Currently Selected:
Yohaannisixxa Wengeele 20: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
