Yohaannisixxa Wengeele 19
19
Yessuusi Fannisemaashsha Murte Murende
(Mat. 27:27-32; Mar. 15:15-21)
1Ookkoneechchi uduma Philaaxoosi Yessuusii'i jadhafise. 2Loliinki mannina ute mirqe'e kallachcha giisseexxi isike umi hana ugge. Insa'nenna diimmooxxa baddeessitte seemma iso'ni oddesine: 3insa'nenna isibaa shinqa'ni, «Ayihudiinke moyanjoo! Nage'i ati'a kadowwaal» hina'ne iso'o kaballaamman. 4Philaaxoosinna higgeenni gadhi'a fuleexxi insa'ne'n, «Yoona iso'ni mitte balleesanna afebe'noxxa ha'no egendinaashsha isoo ha'no'a gadhi'a fulchaannen» hiyye. 5Yessuusi ute mirqinee ookkonee giisineeka kallachcha isike umi hana uggine'naa diimmooxxa baddeessitte seemma oddo'weexxi gadhi'a fule: Philaaxoosinna insa'ne'ni, «Kunuudde! Manjichcho» hiyye. 6Umo qeesenna insa'ne'a ergatemammak manni isoo uude wodda, «Fannis! Fannis!» hiyya'ni cance.
Yaane kinn Philaaxoosinna insa'ne'a hiisseexxi, «Ha'no isoo adhdhitine fannisse: ani darree'ni ani iso'ni ku'latee geesissaaxxa balleessa mittenna iso'ni afebe'non» insa'ne'a hiyye. 7Ayihudikinna hiisseexxi, «No'o seerake anfeennen: kunni manjichchi umo ifika Mageniinke Belto assemmaxxee no'oke seerishsha reyote isi'a hasissaan» hine.
8Philaaxoosi tenne laqee wodda lumo qico sodaate: 9isinna dalla'i giddo higeexxi Yessuusii, «Ati haba'ni daggette?» hiyyeexxi qore: Yessuusi kinn mittechchonn isi'a hiisse'e haaso'ebaan. 10Tennexxee Philaaxoosinna isoo, «Haasotabexxo atee tikonnaa yookaan fannisonnaa ani baalle afeennexxa ati egendebexxo?» hiyye. 11Yessuusi isoo hiisseexxi, «Iimi'ni ati'a baalloomi uwwema gopheele ati ane'ni baallooma affattabaan. Tennexxee anee sa'issee ate'ni uwweeke manjo'n saxxeexxe cubbo hexxeen» hiyye.
Yessuusi'ni Reyotixxi Murte Murendeexxa
(Mat. 27:15-31; Mar. 15:6-20; Luq. 23:13-25)
12Ookkoneechchi uduma Philaaxoosi Yessusii tike wocci asso'a hase: yaane kinn Ayihudi, «Ati konne manjo tikkoottole ati Qeesaarike jaalobaan: Ifi moyanjoke assaak isi Qeesarike naaphan» hina'ni cancine. 13Philaaxoosi tennee laqee wodda: isi Yessuusii gadhi'a fulcheexxi, Bexxichcha kinjo hiyyemmake Aramayike laagadinni Gebeta hiyyemee ye'emaake booncho'ni murtetixxe moote hana ofo'le. 14Barratinna sa'atike ayyaani'a qopheesseccatixxe barramman: yannatinna barrixxe jaane saatebatemman.
Ookkone wodda Philaaxoosi Ayihudi, «Kunse! Ha'nook moyanji!» hiyye. 15Yaane kinn insa'ne, «Isoo hoyyi! Isoo hoyyi! Iso'o fannisi!» hina'n hoginse.
Philaaxoosinna, «Moyanjo ha'nooka ani fannisoo?» hiyye.
Umi Qeesenna iso'n, «Qeesaari malee'e weli moyanji no'aa hedhebaan» hite hiissite haassotte. 16Eettene yanna'ni Philaaxoosi isoo fanniso'a sa'iseexxi insa'ne'a uwwe. Loliinki manninna Yessuusii abindeexxi me'ine.
Yessuusixxa Fannisensha
(Mat. 27:32-44; Mar. 15:21-32; Luq. 23:26-43)
17Ookkoneechchi uduma Yessuusi fanno ifixxa dulkeexxi, Aramayike laagadinni Golgoota hiyyeme ye'ema'neeke booncho'ni, Isinna umiinke qoonjo hiyyemaake boonchibaa me'e. 18Insa'nenna isoo okko fanninse; Yessuusii'i oddote'ni uggine isinni welti wele lame manna, mitte middii'ni mitte bita'i'n fanninse. 19Philaaxoosinna borro borreesseexxi fannote'ni rarraase: borrotinna,
«Naazireetik Yessuusi,
Ayihudiinka moyanjo» hitaaxxemman.
20Yessuusi fanniseme boonchi qachchi bira kademmaxxee heddi Ayihudiink manni giddii'n heddi eettene borro haasesse. Borrotinna borresendemmak Aramayike, laatinetikenna Girkeeke laagadinnitemman. 21Yaane kinni Ayihudiinxi umo qeese Philaaxoosii'i, «Ati ‹Yihudinke moyanjon› hite borreessitoxxe'e. Yaane kinni ‹Kunni manjichchi Ani Ayihuudinke moyanjon hiyyeen› hite borreesi» hine. 22Philaaxoosinna, «Ani borreessenexxa borreessennen» hiyye hiisse.
23Iikki loliink manni Yessuusii'i fanniseechchi uduma seemma isixxa shooleba qodeexxi umo umo ifikee mitte mitte adhdhe; iittanni eettene angatiba cu'maxxa seemmanna adhdhine; yaane kinni tinni angatiba cu'maxxi seemma darendebaang iimi'ni butti qico'n mitteba hujendeexxemman. 24Tennexxee insa'ne weli'aan weli, «Hixa ibisine'naa mitte gelteeke gelto malee darrabe'non» hine. Tinninna kaddeechchi,
«Seemma anxa qoodemme;
angatiba cu'maxxe anxe seemma'ninna hixa ibilsineen»
Hiyya'neek maxaafiink hiyyichchi muuxemaashshaten. Loliinki manninna tenneenni asse.#Far. 22:18.
25Yessuusixxe fanno bira ama isixxinna, isixxe amaxxi dayyo, iittanni Qeliyoophphaxxi are Maaraminna Megidelixxi Maarami ookko uurrineemman. 26Yessuusi ama isixxanna isi eeyyammak hordofisanji ifi bira uurrinee'na uude wodda ama ifixxa, «Tee anxe amaa kunse belti atik!» hiyye. 27Ookkoneechchi uduma isi hordofisanjokanna, «Kunnuudi ama atixxa!» hiyye; eettene yannanaa'ni ke'iseexxi kunni hordofisanji isee ifike minibaa adhdhe me'e.
Yessuusixxa Reyo
(Mat. 27:45-56; Mar. 15:33-41; Luq. 23:44-49)
28Ookkoneechchi uduma Yessuusi ta'a duuchchiinxi yaane muuxendeexxa ege'neexxi: maxaafake'n borreessendeexi yaane muuxendaashsha «Ani dheebo'weennen» hiyye.#Far. 69:21; 22:15. 29Ookko majaja'neexxi woyine wo'miteek miyi hedhemman. Tennexxee insa'ne isipoonje woyintike bulbulo'ni cuunpheexxi Hisophi hiyyemaake haqichchinn qaranbee Yessuusike afo'ibaa shiqinse. 30Yessuusinna eettene majajjaammaxxa woyine maqeechchi uduma, «Yaane muuxendeen» hiyye. Umo ifika hangulli asseexxi ifixxa lubbo sa'isse uwwe.
Yessuusik cinaachchi Bagediki Oteme
31Iitti barranna edike sanbati'a qopheesseccatixxe barramman. Ayihudi konnee fannisemeemmake mannik renshi Edike Sanbatixxa barra fannote'n iima hosabaashsha insa'ne hansemmaxxeenna iikki Edik Sanbatinna lumoke ayyaanike Sanbata kademmaxxee fannisemeeke mannixxa lekka enqine'naa rensha fannotenaa'ni dirrinso'a Philaaxoosi'i kadhante. 32Tennexxee loliinki mann dageexxi Kirsitoosinni welti fannisememmake siretike manjichchixxa lekka enqine. Langake manjichchixxa lekkanna enqine. 33Yaane kinni insa'ne Yessuusibaa dangee wodda isi edise reyeexxa uundemmaxee lekka isixxa enqinebaan. 34Yaane kinn loliinki mann giddi'ni mitti Yessuusika cinaachcha bagedik ote: isona'ninna hirbange'ni mundetinna wodi'i duneme. 35Tennee uudek manji ifixxa dhugaa kuleen: dhugaa isixxi kulanna dhugaatixxen: isinna dhugaa haaso'a'nexxa ege'neen: isinna ha'no amandinaashsha dhugaa kula'neen. 36Tinninna kaddeechchi, «Isike micconaa'ni mitti midde enqemabaan» hiyyemeeki Woyyichchi maxaafik hiyyichchi muuxemaashshaten.#Lak. 9:12; Far. 34; 20; Zek. 12:10; Wal. 1:7. 37Higgeenni wele Woyyichcha maxaafa'ninna «Insa'ne ookkonne ontemmaka uundaan» hiyyammaxxeeten.
Yessuusixxa Moogema
(Mat. 27:57-61; Mar. 15:42-47; Luq. 23:50-56)
38Ookkoneechchi uduma Armatiyaasike bogik Yooseefi Yessuusika rensha adhdho'a Philaaxoosii kadhate; Yoosefinna Ayihuda sodaatemmaxxee sho'ik Yessuusii hordofaamman. Isinna Philaaxoosi'i eetii laqeechchi uduma dageexxi ookkone rensha aadhe. 39Konneechchi edo hashsha Yessuusibaa maremmaki Niqodimoosi mitte dhibba leetiro geltaaxxa Karbe Ireeteti welti makeexxi aadhe dage.#Yoh. 3:1-2. 40Insa'nenna Yessuusika rensha adhdhineexxi Ayihudiinke galdumixxe mirqashsha shitto hana fiffinxeexxi layinotixxe seemmanni mirqine. 41Iikki Yessuusi fannisemeek boonchi hiddichchinke fichchamman. Ookkone hiddichchiinke fichcha'ni weli mittikinna moogemebaak haarooki mooggiibi hedhemman. 42Iitti barranna Ayihudiinke Edike Sanbatixxe qophefachchotixxe barra kaddemmaxxee mooggi boonchinna shiqate kadeemmaxxee insa'ne Yessuusi ookko moongeen.
Currently Selected:
Yohaannisixxa Wengeele 19: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
