Dadatika Maxaafa 6
6
Balleessaaka Wode'e
1Manji tenne butta'n hora'n dagee wodda dubartetinna ilende.#Iyo. 1:6; 2:1. 2Eettene yanna'n Mageniinxi oose#6:2 Mageniinxi labbaxxi oose Mitte mitte tikuwwa erganna Mageniinxishsha hexxeexe iimixxe dada hitee tikke'een. manjiinxe oosexxi dubarte danchate kaddeexxa uuddeexxi ifi ifi'a eetemmaxxa fi'lite aaxxe. 3Ookkonechchi uduma Duuchchi Woddik Goottinna, «Manji reyaachcho kadeemmaxxee Hafuuri ank manji giddo duuchchi woddi'a hedhabaan; isik barinna 120 wogga kadaan» hiyye. 4Mageniinxi oose manjiinxe ooseka dubarte aaxxee oose i'litee woddanna kaddo'o ookkonechchi uduma «Nefileemi» hiyyemaak manni buttate'n hedhemman. Insa'nenna edike baro'ni jannummati ege'neme'e gurra fuleeke mannamman.#Lak. 13:33.
5Duuchchi Woddik Gootti manjiinxi balleessa buttate'ni hitta bira saxxeexxannaa isixxe qalbeki hedumi duuchchi wodda fuggoke kadeexxa uude.#Mat. 24:37; Luq. 17:26; 1 Phex. 3:20. 6Tennexxee Mageni manjo buttate'n dadeexxee yaade, qalbetinna hansha hiyye. 7Tennexxee Duuchchi Woddik Gootti, «Insa'nee dadiyyo anxe'n yaadennexxee, dadenneka manjo, hore biniincha, godobik me'itaaxxa daduwwa, ci'a buttatenaa'n balleessannon» hiyye. 8Yaane kinni Nohi Duuchchi Woddike Gootti edo elle alfe.
9Nohixxi jirte konnechchi butti'a hexxeexxen. Nohi baro isike'n hedhemmake manna duuchchinaa'ni qullichchake, fuggoxxa hujaammabaakenna Mageniinka ora hordofaammake manjomman.#2 Phex. 2:5. 10Nohinna sase labbaaxxa oose Seemii, Kaamiinna Yaafeetii i'le. 11Ookkone baro'ni butta Mageni edo fuggoxxe hujenni battootte, xaqarotinna ise'n wo'miteemman. 12Mageni butta fuggoxxenni hitta battootteexxa afe; kunse manji duuchchi fuggoke ora'ni me'a'nemman.
13Tennexxee Mageni Nohii hiyyee qici: «Buttate'n manjiinxi xaqaro wo'mitemmaxxee manjo duuchcha balleessonnaa mudhdheenne; kunse ani manjokanna buttatanna balleessannon. 14Tennexxee ati kinni goofer hiyyemaake haqichchinni markaba ifi'a ijaadhdhi; heddo kuta afaashshanna assite giiissite'e giddi gadhii'n dhaphphi assaachcho itti issi. 15Isoonna ijaartatto qici: qeerrinne 300 ciqile, godobi 50 ciqile ejjuma 30 ciqile kadduun. 16Markabakeenna heellichcho#6:16: Heellichcho Heellichcho hiyya maskoote hiyyateeten. giissi, heellichchotinna gimo welti afendammaba gence assitebexxongi mitte ciqile qico haanni assitettexxi waali; konnee markaba sase weli hana ijaaremeeke minishsha ijaarte gamakenaa'ninna hula fulchi. 17Aninna iimati butti'a lubbo afeechcho duuchcha buttatenaa'n balleessonnaa buttate'ni balleessaaka wode'e iyyedagannoni; buttate'n lubbo afeechcho duuchchinna ba'aan. 18Ani kinni ati'a kako aagaannon; atinna are atixxi, oose atixxinna oose atixxixxi aruwwa markabi giddi'a e'yitinaan. 19Atinni welti lubbo gattaashsha hedho affeexxi dada duuchchanaa'ni lame lame mitte meyyaxxanaa mitte labbaka aaxxa'ni markabi giddi'a e'yishi. 20Lubbo gattaashsha gosa gosaxxe ci'anaa'ni, gosa gosake biniinchanaa'n, gosa gosake buttate'ni godobik me'aachchuwwi duuchchanaa'ni lame lame kada'ni atibaa dagaan. 21Ati ifi'aanna konne lubbo afeechchi duuchchi'a itatee kadaachcho duuchcha aaxxa'ni markabi giddo tuuli.» 22Nohinna duuchchiinxa Mageni isoo ajajemmashshanni asse.#Ibr. 11:7.
Currently Selected:
Dadatika Maxaafa 6: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
