Dadatika Maxaafa 34
34
Ya'iqoobixxa Belto Diinanna Sekeemi'i
1Mitte barra Liya Ya'iqoobi'a ildeexxi Diinate hiyyendaaxxi belto ookkone bogika dubarra uudo'a gadhi'a fulde. 2Ookkone boga galchaammake Hiitichchiink Hamoorik belt Seekemi Diina afeexxi adhdhe, welt diipheexxi battoosse. 3Qalbe isixxanna Diina'a Ya'iqoobixxe belto'a booji'ende; isinna isee yo'oshsha eeyye; xe'maka haaso'anna ise'n haaso'e. 4Seekeminna anna ifika Hamoori'i, «Tenne belto ani'a kadhati» hiyye.
5Ya'iqoobinna belto ifixxi Diina welti dhiiphe battosseexxanna laqe; eettene yanna labbaxxi oose isixxi hore bobbaasse allalate'n hexxemman; Ya'iqoobinna oose ifixxa daggaa qico'n tenne yaane sammi hiyye ture. 6Ookkoneechchi uduma Seekemik anni Hamoori Ya'iqoobiba kadha mare. 7Ya'iqoobixxi Labbaxxi oosenna kaddeexxe yaane laqqeeshshanni hore allaldammabaa'n rakke dagge; Sekeemi Ya'iqoobixxa belto hunnat abide welt diiphiyyot Isira'eelito salphissemmaxxee lumoshshanna yaande mufante; tinninna assemiyyo hasissabaaxxe yaane assendemmaxxeten. 8Hamoor kinni, «Belt ank Seekemik godobi belto ha'noxxe'n hedheen; maganneten aadho'a isee isi'a uwwe. 9Weli'a balloommo; dubarra ha'nooka no'o'a uwwe, ha'nonna no'oka dubarra aadhdhe. 10No'oba hedha dandeettinaan; bogi no'ok ha'nooke bogani; isi giddo galle, giddo dadda'le karratanna giddo horatte» hiyye.
11Seekeminna Diinaka annanna dayyuwwa iseka, «Ani calli ha'no'ni elle alfoonole, hitinaaxxa duuchchanna assannon. 12Ha'no calli beltichcho ani'a uwwe malee hassinee qicika xilooshanna hassinee qicixxa uwwa ane'e uwwi hiyye.» 13Seekemi dayyo insa'nexxa Diina'n hunnat welt diiphemmaxxee Ya'iqoobixxi labbaxxi oose iso'ninna isika anna Hamoori'n diiniinka haaso'a 14ineexxi haasoonee qici, «Dayyo no'oxxa jila ofo'lebaake manji'a uunabe'non; tinni yaane no'o'a salphinneken. 15Kaddoolenna welti aanganok mitti ori hedheen; kunninna labbak ha'nooka manjo duuchcha jila ofo'lshine no'o'o fakkataten. 16Ookkoneechchi uduma no'oka dubarra ha'no'a uunannon; no'onna ha'nooxxa dubarte aa'nannon; mitte ardanna kande mitteba he'nannon. 17Yaane kinni jila ofo'la gibbina'noole ofo'laabo'non dayyo no'oxxa adhdhine me'inannon» hine.
18Kunni Ya'iqoobixxi labbaxxi oose shiqishsheek yaadi Hamoori'aanna belto isike Seekemi'a eloke labe leelle. 19Anna ifike minni hadinaa'n yo'oshsha ulfeessemmeke kunni dargaggeessi Ya'iqoobixxa belto yo'oshsha eeyyeemmaxxee insa'ne hineexxa hirbange'n asse.
20Tennexxe Hamoorinna belt isik Seekemi ifike qachchixxe hulaba marreexxi tenne yaane ookkone ifike qachchike manna'n 21hinee qeci, «Kunni manni nage'iinke mannan; no'oke bogi giddo he'na'n dada'linuun; kunnise bogi insa'neenna no'onna geyaaken; no'o dubarte insa'neexxa aa'nannon; insa'nenna no'oxxa dubarte aa'naan. 22Yaane kinni kunni manni no'onni mitte arda kade hedho'a hasa'neek no'ok labbak manji duuchchi insa'nekishsha jila ofo'loole callan. 23Iitta assinenneleta insa'neeki hori karra insa'neexxi duuchcha no'oxxe kaddammabata? Tennexxee insa'nenni hinaaxxen weli'aango; insa'nenna no'onni welti he'nuun» hine. 24Qachchiinxe hula gadhii'n bukki hiyyeemmak duuchchi Hamoorkenna belto isike Seekemike yaada'n weli aangee'naa qachchi giddo hedheek labballi duuchchi jila ofo'le.
25Sakkaxxe barra'n manni reefixxe mada'n hedhee'naa Ya'iqoobixxe labbaxxe oosenaa'n Diinake godobik dayyuwwi Simooninnaa Leewwi ifi ifika wolaantichcha adhineexxi dedhange'n qachchi giddi'a e'yineexxi labbalo duuchchinga shinne. 26Hamoorinna belt isika Seekeminna wolaantichchik shinne ke'neexxi godobixxa dayyo ifixxa Diinaanna Seekemike minenaa'ni fulchine aa'ne me'ine. 27Ya'iqoobixxi labbaxxi oosenna shiyememake mannike rensha hana mammarendaa'na dayyo insa'nexxa battosinemmaka qachcha duuchcha saame. 28Gedhebo insa'neeka, re'e insa'neexxa, lalokannaa harre insa'neexxa iittanni kinni wele qachchi giddonna gadho hexxeexxa karra insa'neexxa duuchcha adhdhite. 29Karra insa'neexxa duuchcha adhdhiteexxi melaalle insa'neexxanna oose insa'nexxa duuchcha boojiteexxi, mine mine'ninni hedheechcho duuchcha adhdhite me'ite.
30Ya'iqoobi Simooninnaa Leewwi, «Ha'no konne boga'ni hexxeexxe Kenaanito'ninna Feeriizitote'n anee boshitineexxi rakko ane'n iyyedaggineen; no'o laakkossik heenoke mannan; insa'ne mitteba bukki hinee anee lolleele ani anke mini hadi duuchchinni ba'annon» hiyye. 31Insa'ne kinni, «Mitte yabaabulto dubarte'n assendammashsha dayyo assedho'ateta?» Iso'ni hine.
Currently Selected:
Dadatika Maxaafa 34: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
