Dadatika Maxaafa 23
23
Saaraxxa Reyo
1Saaranna dhibbanna lame tommenna torbaane wogga galde. 2Isenna Kenaan boga'n «Qiiriyat Arbaaqi» hiyyemaake Kebiroonike qachchi giddo lummexxe. Abirihaaminna Saaraxxe reyo'a yo'oshsha yaade oodhe.
3Ookkoneechchi uduma Abirihaami ofo'lemmabaa'n, ifixxe areke renshi birii'n ke'eexxi Heexxika arda hiyyee qici, 4«Ani ha'noke bogixxe keessummanna alaga manjon; anxa are mooqqannoka booncho ane'ni gurgurre.»#Ibr. 11:9; 13; Erga. Huj. 7:17.
5Heexxik manninna Abirihaami'n wirrasse hiyye haaso'ee qici, 6«Anke gootta laqi; Atiqqa no'o giddo Mageniinke ulfichcha ja'laaban; mooggiinxe no'oxxe bakkanaa'n eetetteba fi'lite atixxa are mooqqi; no'o giddii'n ayyetenna kadoole reyeeka moqqitaboxxoshsha ifixxa mooggiinxe bakka atee hoyyedhaak hedhebaan» hiyye.
7Ookkoneechchi uduma Abirihaam bogiinke Heexxiik ardi edo ke'e heeshshi hiyye; 8insa'ne hiyyee qici, «Ha'no anxa are mooqqonna'a eetii uutinechchinni hiyyaannexxa laqqe, ani'a Zo'aarika belto Eefiroonii kadhatte. 9Kadhatinna isi ifike fichchike kasa'ni hexxeexxa Maakifeela hiyyendaaxxa ifixxa wolo'o ane'n gurguro'aten. Tinni bakka ha'nooxxe oddo'n mooggiinxe anke qadaada kadaashsha geyaake hira'n ane'n gurgurowwaal» hiyye.
10Heexxiichchi Eefirooninna okkone qachchixxe hula edo hexxeemmaxxe Hiititoti welt ofo'leemman; tennexxee isi ookko hedhemmaki manni duuchchi laqaa'naa Abirihaami'n wirri asse hiyye haaso'ee qici, 11«Anke gootta iittatebaan; hiyyeenexxa laqi! Konnee fichcha wolo'o giddo hexxeexxenninni welti adhdhi; kunnise konnee anke ardi edo ati'a uwweennen; are atixxika rensha mooqqi» hiyye.
12Abirihaaminna higgeenna bogiinke ardi edo heeshshi hiyyeexi, 13duuchchiingi laqaa'naa Eefiroonii'n, «Hiyyaannexxa laqi, fichcha atenaa'n hidhdho; maganneten fichchiinka hira aa'nee'naa adhdhe, anxe areka rensha ookko moogo» hiyye.
14Eefirooninna Abirihaami'n hiyye hiisse haaso'ee qici, 15«Anke gootta hiyyaannexxa laqi, bogiink hiri shoole dhibba sibljo birren; tinni kinni atixxenna anxe oddo'n maachchonnabaan; marte are atixxika rensha moogi» hiyye. 16Abirihaaminna Eefirooni Heexxiike ardi edo haaso'emmaka bogiinka hira kaduuni hiyye, eettene yannake daddaltotike mikisanjixxe qixxe'ni shoole dhibba sibiljo birre mike uwwe. 17Konne qicinni Maakifela hiyyendaaxxe bakka'n Maamire bira hedheek Eefroonik fichchi giddo hexxeexxe wolo'onninnaa loolake'n hexxeexxe haqquwwaninni mittenba Abirihaamike kade. 18Qachchiinxe hula edo dagemmake Heexxiik manni duuchcha'n kunni bogi Abirihaamik kadeexxa ege'neme.
19Ookkoneechchi uduma Abirihaami Kenaanike boga'ni Maamire bira Maakifela hiyyemmake fichcha'n hexxeexxe wolo'o giddo are ifixxa Saara'a mooqqe. Itti bakkanna Kebirooniten. 20Tennexxee iikki Keexiitotik fichchi giddo hexxeexxe wolo'onni mitteba Abirihaamike mooggiinke booncho kade.
Currently Selected:
Dadatika Maxaafa 23: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
