Ergameeyyetixxa Huje 4
4
Pheexxiroosinna Yohaannisi Ayihudinxe Songo Edo Shinqe
1Pheexxiroosinna Yohaannisi mannake'n haasona'nenge'ni qeese#4:1 Mitte mitte mirqisanjo maxaafuwwi «qeesetike sooressa» hiyyaan, Woyyichchi Galmke heqqanjuwwik ajajalli, iittanni Seduuqito insa'nebaa dage. 2Tinni lame ergameeyye arda barachchiiseemmaxxeenna Yessuusinni afendeexxe reyeeke mannixxe ke'axxee lallabbeexxee lumoshsha mufaante. 3Tennexxee insa'nee abindeexxi bogi hashshemmaxxee soodaa qico'n insa'nee ookkoo usuriinke mine'ni turraashsha assine. 4Yaane kinni kula insa'nexxa laqeeke mannanaa'n heddi manni amane. Amaneke mannik laakkoossinna onde kumiba'a geye.
5Langaxxa barra Ayihudiinki sooresuwwi geedhetinna Muusseke seerik barachchiisalluwwi Iyyerusaalemi bukki hine. 6Ookkoo bukki hiyyeeke manni giddii'n qeesetik sooreessi Haanna, Qeyyaafa, Yohaannisi, Isikindiroosinna weli qeesetike sooreesik mini hadi duuchchi hedhemman. 7Insa'nenna eettenee lamiinxa ergameeyye insa'ne edo uurrinseexxi «Ha'noo tennee assitineek mayiinxxe hunnanninna ayyike summinite?» hine qorre. 8Pheexiroosi Woyyichchi Hafuurinni wo'meexxi insa'ne'aa hiyyee qici, «Ha'no ardiinke sooresuwwanna geedhee! 9Techcho no'o qoremmaannelchi konne naafi manjichchixxee hujeendeexxe eloxxe hujexxeenna isi hitta hedheeke toorinni fayye hiyyatiten. 10Kunni manjichchi fayyeexxi ha'no edo uurre'eek ha'no fannissine'naa Mageni reyotenaa'ni ke'isseeke Naazireetike Yessuusi Kiristoosike summinnite kaddeexxa ege'ne! Isira'eelik ardi duuchchinna tennee ege'nowwaal! 11Ha'noo miniink ijaaralluwwi
« ‹Tuffatineexxi hundineeki kinji
isoten;
yaane kinni isi dhaaddotike kinjo kade.›#Far. 118:22.
12Manni anjiremo'a Mageni mannakee uwweeki weli summi imati buttti'a hedhebaan. Tennexxee anjirema iso'nite malee weleke'ni hexxebaan» hiyye.
13Songotiki manni Pheexiroosinna Yohaannisi soda'a belo haasonneexxa uudeexxa yanna baratebaake manna kandeexxa ege'neexxi mambe'a hiyye. Insa'nenna Yessuusinni welti he'nemmaxxanna qalli hinne. 14Yaane kinni fayyemmaki manjichchi Pheexxiroosinninna Yohaansinni welti uurre'naa uundeemmaxxee mittelchonna hiyya dandeenneba'a. 15Tennexxee insa'nee songo giddii'ni fulchineexxi weli'anni weli hinaa'n mari'antee qici, 16«Konne manna maa assinaanno? Insa'nexxe anga'n kunni lumoki mambe'i kadeexxa Iyyerusaalemi hedheeki manni duuchchi ege'ne'een; waakata dandennabe'non. 17Tinni yaane kinni ardiinxe oddo'ni ba'lata'ni me'itabaashsha langaxxa Yessuusike summinni haraanga ayye'ninna haasonnabaashsha jabeessinennexxi insa'nee ajanjo!» 18Ookkonneechchi uduma insa'nee ye'neexxi Yessuusike summinni haraanga haasonnabaashsha yookaan barachchiinsabaashsha jabeessineexxi insa'nee ajaanje. 19Pheexiroosinna Yohaannisi kinni hiissineexxi hiinee qici, «Amme ha'no'ni murre! Magenokee ajajemati irra ha'no'a ajajema Mageni edo seerakee? 20No'ote kandonnole uundennexxanna lanqennexxa haaso'atenaa'n sammi hiyya dandennabe'no.» 21Ardiinki sooresuwwinna songotik manni Pheexxiroosiinna Yohaannisii'i mura woxxissaaxxa mitte yaanenna afa gopheemmaxxee iittanni tennee kaddeexxe yaane'a ardi Mageno galateefataammaxxee higgeenna jabeessine xexe'achchiinseexxi insa'nee wocci assine. 22Konne mambe'inni fayyeemmaak manjichchi shoole tomme woga sa'aakemman.
Amaane Soodatteexxa Soodachcho
23Pheexxiroosinna Yohaannisi wocci assemmee wodda ifixxe gamuwwaba'a dangeexxi qeesetik sooresuwwinna geedhuwwa insa'ne'ni hiteexxa yaane duuchcha kulle. 24Insa'ne tenne lanqee wodda hafuura gikki assineexxi mitte qalbenni Magenba'a hine soodantee qici, «Iimatanna butta abbaayyattanna ise giddo hedheechcho duuchcha daddeetteke no'oke Lumoke Goottaa! 25Woyyichchi Hafuuri ga'mii'ni erganjo atike anna no'oke Daawwitti'n ati hite haasotetta qici,
« ‹Gosa gosak ardi mayee mufate?
ardi mayee tolanga diinake'n ke'e?
26Kaba buttatiki moyanjuwwi mitteba higeexxi
galchalluwwikinna mitteba bukki hiyyeexxi
Goottake'ninna isi hariireemmake'n›
naaphuummati ke'e.
27Dhugaaten, Heeroodisinna Phanxiyoosi Philaaxoosi Ayihudake kadebaake mannininna Isira'eelike ardinni welti konne qachcha'ni bukki hineexxi ati hariitetteke woyyichcha atika erganjo Yessuusi'ni ke'neen. 28Tinninna kaddeechchi ati atixxe hunnanninna fedhii atixxenni edo murtetexxat muuxendo'aten. 29Ta'anna no'oke Goottaa! Haasona'neexxa daabbachcho uudi! No'o erganjuwwi atiki haaso'a atika soda'a belo afo'o wo'mine haasonnannoshsha assi! 30Woyyichcha belto atike Yessuusike summinni dhibemeekiir fayyaashsha, mambe'ikinna beessisuwwi assemaashsha anga atixxa diriirisi!»
31Insa'ne soodante ke'neechchi uduma he'nemmaki boonchi lele'me; duuchchingi Woyyichchi Hafuurinni wo'meexxi Mageniinka hiyyichcho soda'a belo afo'o wo'meexxi haaso'e.
Edixxe Ammaanexxa Mittoomiinxa Hedho
32Ammaanye duuchcha mitte qalbenna mitte heduma affe'eemman. Ayyinna «Kunni ankeni» hiyyaaxxi yaane hexxemmabaan; insa'nexxe oddo'ni duuchchinxi yaane qabetixxemman. 33Ergameeyyetinna Gootti Yessuusixxa reyotenaa'ni ke'a lumoxxe hunnanni dhugaa kulda'nemman; insa'ne duuchchinge'ni lumooki Mageniink badhaadhi hedhemman. 34Boga yookaan mine afeeki duuchchi gurgurra'ni maallaqa iyyedagaammaxxee oddo insa'nexxe'n mitti rakkichchinna hedhemmaba'a. 35Gurgurremaka maallaqanna eyyedangeexxi ergameeyyetixxe lekka hunda uggurra'nemman; insa'nee mitte mittenge'e ookkonee maallaqa hasissaa qico qoonda'nemma'n.
36Ilenshati Qophphiroosike bogik Yooseefi hiyyemaaki mitti Leewwichchi hedhemman. Ergameeyyetinna isoo'o Bernabaasi hita'nee yexxaammani; tika isixxinna, «Dayyeessatik belto» hiyyaten. 37Isinna boga ifika gurgure'e maallaqa iyyedageexxi ergameeyyetixxe lekka hunda uggure.
Currently Selected:
Ergameeyyetixxa Huje 4: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
