Ergameeyyetixxa Huje 11
11
Pheexxiroosi Ayihudake Kadebaake Mannibaa Mareexxa
1Ergameeyyetinna Yihudake boga'n hedheemmak dayyuwwi Ayihudake kadebaak manni Mageniinka hiyyichcho adhdheexxa laqe. 2Tennexxee Pheexxiroosi Iyyerusaalemi ale maree wodda, jila ofo'leeke mannixxe gamo kaddeexxi ammanye Pheexiroosii'i, 3«Mayee jila ofo'lebaake mannike mine'ni martettexxi insa'nenni welti ittette?» hiyyati isoo moronde. 4Pheexiroosinna duuchchiinxa yaane insa'ne'n aanchi aanchik kulate'ni ke'e: 5«Ani Iyyoophpheke qachcha'n hedhennexxi soodata'na laxanxa seemma labaachchi shoolnge ifike kasi darree'n abidemeexxi iimatenaa'n aniba'a butti'a dagaa'naa waleellati uudennen. 6Aninna konnechcho dhaphphi hiyye uudanno wodda konnee naxaliinxa seemma labaachcho'n shoole lekka'n me'aak hore biniincha, godobiki me'itaaxxa daduwwanna ci'aa uudennen. 7Ookkonneechchi uduma ‹Koo Pheexiroosi! Kexxettexxi konnera dulidaa'ni iti!› hiyaaki hafuuri laqeme.
8«Ani kinni, ‹Anke Goottaa! Waawwoti kaddabaan; battoteexxi yookaan diqqachchiissaaxxi yaane ijje afo'o anke'n maqe ege'nebe'no› hiyyennen.
9«Yaane kinni langaxxa yanna, ‹Mageni luqqi asseechcho ati battoossa dandeetabexxon› hiyyaak haaso'i iimatenaa'ni dage. 10Tinni yaane sasele kaddeechchi udumi'a iitti naxaliinxa seemma fakkaattaaxxi yaane iimi'a adhdhende.
11«Ookkone hirba'ninni Qiisaariyaa'n anibaa ergemeeki sasi manni no'oo he'neennake miniba dage. 12Mitte mamibelo insa'nenni welti me'onnaa Woyyichchi Hafuuri ane'ni kule. Kunni jaaniigi dayyuwwi aninni welti me'e; manjichchiink mine'ninna e'yinneenneni. 13Isinna iimik ergaanji mine ifike'n uurre'naa uudeexxanna ‹Iyyoophphe'a manjo ergiteettexxi Pheexiroosi hiyyemeeka Simi'oonii'i ye'isi! 14Isi atinna atik mini hadi duuchchi anjirendinaaka hiyyichcho ate'n kulaan› hiyyeexxa no'o'ni kule.
15«Aninna haaso'a safenne wodda, Woyyichchi Hafuuri edo sirete'ni no'o'ni dirreemmashshanni insa'ne'ninna dirre. 16Ookkoone wodda ‹Yohaannisi wode'ik xamaqeen ha'no kinni Woyyichchi Hafuuurini xammaqendinaan› hiyyaati Gootti haaso'emmaka haaso'a kassi hiyyeenne. 17Gootta Yessuusi Kiristoosi'ni amannannoke no'oo'a Mageni uwweexxa uwwa insa'ne'anna uwwoole yoonata Mageno hoyya dande'annok ani ayyete?»
18Insa'nenna tennee lanqee wodda, «Mageni Ayihudake kadebaaka mannanna anjirematee'e geessissaaxxa aadde aangaashsha asse'een» hiyyati Mageno saande.
Antsookiya Hexxeemmaxxa Mageniinxa Tuuta
19Isxifaanoosi cancaqemeexxi reyee wodda ke'eeke shorrichchinaa'ni kexxeexxa xexxerendeexxi ammanye Finqe qico'n, Qophphiroosi qico'ninna Antsookiya qico'n me'ite. Insa'nenna hiyyichcho Mageniinka Ayihudiinke manna'n malee'e weleke'n kulla'neemmabaani. 20Kaddoo malee Qophphiroosinaa'ninna Qereenaa'n daggeexxi mitte mitte ammanye Antsookiya marteexxi Girkeeke manna'ninna Gootta Yessuusixxa eloxxa odo kulde. 21Goottinxi hunnanna insa'neenni welti hexxeemman; heddi manninna amaneexxi Goottiinbaa hige. 22Iyyerusaalemi hexxemmaaxxi ammanye tenne odo laqqee wodda Bernabaasii'i Antsookiya'a ergite. 23Barinnaabaasinna ookko geyeexxi Mageni badhaadha ifiken asseexxa afee woda gammade; duuchching wo'ma qalbenni Gootta addatati jabaantaashsha insa'nee gorse. 24Isi Woyyichchi Hafuurinna amana iso'n wo'miteeke manjomman; heddi manninna Goottinba'a hige. 25Ookkonneechchi uduma Barinabaasi Sa'oolika hasito Xerseesi'a me'e. 26Barinnaabaasinna Sa'ooli'i afeechchi uduma isoo Antsookiya'a iyyedage. Lamingi mitte wogga duuchcha ookko hexxeexxe Mageniinxe tuutanni welti mitteba he'neexxi heddo manna barachchiinse; Hordofeeyyetinna sirete'n Antsookiyya «Kiristoosito» hiyyendeexxi ye'endeen.
27Ookkone wodda mitte mitte raagole Iyyerusaalemi'ni Antsookiya'a me'ite. 28Insa'ne giddii'n mitti Agaboosi hiyyemaaki wabeek ke'eexxi, «Butta duuchcha'ni lumoki solo'i iba'neen» hiyya'ni Woyyichchi Hafuurixxe kulanni raagaa haaso'e. Kunni kulemeek solo'i kadeeki Qelaawudewwoosi hiyyemaake Roomike lumooke moyanjike baro'nitemman. 29Tennexxee duuuchchiinxi hordofeeyye umo umonge'ni dandeetee qico maallaqa fulchite'naa Yihudake boga'n hedheke dayyuwwi'a gargaarsi ergemaashsha mudhdhite. 30Insa'nenna ookkonee buunseemaka maalaqa Bernabaasixxenna Sa'oolixxe anga'ni Mageniinxe tuutaxxe geedheba'a ergine.
Currently Selected:
Ergameeyyetixxa Huje 11: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
