Mat 2
2
Ngéger nyag ðen ko lo þakàdt koo Jejut
1Oojïn Jeju Betlehemt kam døning Judet døkaglot lo ngar Herod. Got oon ngéger kïmë madg þain ko loþakàdt ðen Jerusalemt na anan: 2Ngon'n oojïna ngart lo juipg ye i ða a? Kïtø j'oo kïmë loa ko loþakàdt nu, na kï ðe kad j'øsï døj ber nõat.
3Lon ngar Herod oo dø ta 'nten ye, kama gang ngalang kï deg kï Jerusalemt tube nat sia. 4Ngar Herod kaw ngéjanyamosïkadkari kïbog kï ngéndang maktubg tube kï nat, kamla ndïjed lon a oojïn Krist tit. 5Elïna anan: A oojïna Betlehemt kam døning Judet, kïta titbe la ngekelta kï ta Luwaht ndangïn kam maktubt ye:
6Na î Betlehem, kam døning Judet,
î kï du tøi al bat ku þebogt kï Jude,
kïta ko kamit la ngar mad a teet ye,
în a i ngekul Israel girrdeg lom.
7Ad Herod la kun ngéger kïmëg'n non gid tilt, ndïjed kaglo jeje'n kïmë'n non tee tit. 8Kamla lad Betlehemt an: Awïn, i ndïjen ta lo ngon kïðoi nõ jeje oon, na lon i ngahna a ne, i ðe elmïn ad m'oo, kad mî kïþe kaa, m'aw m'øsï døm ber nõat.
9Lon oon dø ta lo ngar woi ye, son ðobo awïn. Na oon kïmë kan oona ko loþakàdt nu ye, a ndia nõdt, mbã ðe duba dø lot'n ngon tot. 10Lon oon kïmë'n non ye, ðan ronel kï kamnda kï dumbit. 11Udïn kuju, oon ngon kïðøi'n non nat kï kõa Mari; ndïn kï døgojd, øsïn død ber nõat. Kamla teen ta þøl nyamajg lod, lan kadkarig: L'ør kï dukan kï myrr adïna. 12Kamla Luwah ug eld kam nît kad telïn kï dø Herodt gog al, ad tel awïn þe lod kï ðob kïðang.
Jojep un ngon kï kõa ãin kï døning Ejipt't
13Lon awïn woi ye, oon malaika mad lo Bïraþe tee høi kam niit kïro Jojept, an: I þai dõ, un ngon kïðoi kï kõa, na ãi kï døning Ejipt't, i ndït nu mbã ka m'eli ta kad i ðe kamtã; kïta Herod a sah ngon kïðoi'n non kï n'tøla.
14Ta la Jojep þai unïn ngon kï kõa ndø, na tee aw sed døning Ejipt't. 15Ndït nõbe mbã koi Herod; kïtakad tøl ne ta ta'n Bïraþe el kï ta ngekelta kï tant an: M'kun ngonïm kïdïngã kad tee kø kam døning Ejipt't.
Ngar Herod tøl ngan kïðoi kïdïngãg kam þe Betlehemt
16Lon Herod oo kad ngéger kïmëg þoodïn sen ye, wong tøla søkïrr, ad la tøl ngan kïdïngãg kï kasï þal joo tube, mbã kï îgïn asïn al þaitø, îgïn ndïn Betlehemt, kïgo ðøb nin þet loa, øjïn go kaglo'n ndïjen ta jeje ngéger kïmëg nõ. 17Titbe la tølïn ne ta'n Jeremi ngekelta kï ta Luwaht el an:
18Oon dø ndï køl kïga kï Ramat,
wi kï nõ kïna mbiting kï dumbit;
Rasel ndï nõ nganïn;
gee gør al kïta ngana oin tube.
Jojep un ngon kïðoi kï kõa, na tee Ejipt't aw døning Israelt gog, ndï Najaret't
(Oo Luk 2:39)
19Lon Herod oi taa ne, malaika mad lo Bïraþe tee høi kïro Jojept kam niit døning Ejipt't ela an: 20I þai dõ, un ngon kïðoi kï kõa, na aw døning Israelt gog; ngésah tøl ngon kaa nõ oin.
21Ta la Jojep þai unïn ngon kï kõa, na aw døning Israelt gog ye. 22Na lon oo kad Arkelaws õþe døning Judet got bøwïn Herodt ye, þool ðaa kad aw nu; na tit ka'n Luwah ug ela'n kam niit ye, tel þa ta'n kï døning Galilet, 23aw a kï ndï kam þet mad'n tøa i Najaret; i titbe kïtakad tølïn ne ta ta'n ngékeltag kï ta Luwaht elïn anan: A kunïna de kï Najaret't.
Currently Selected:
Mat 2: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.