Teekïtïga 16
16
Luwah ad'd kerreg kï mane
1Israelag ngékawnatube þain Elim andïn kam dïlalot kï Sin mbïna Elimt kï mbalbo Sinai. I ndø kïkõkïlah gidaimi kam naht kïkõjoo go teedt kø kam døning Ejipt. 2Israelag ngékawnatube nyurïn ta dø Moijt kï Aarõ kam dïlalot'n non. 3Israelag elïnd anan: I soojt kad j'oi girr tøg ji Bïraþet kam døning Ejipt't lon kï ndïn ta jo dãgt kï lon kï san nya kï ndan, na i ðen sej kam dïlalot 'nten kïtakad þoo tøl koosï ngékawnatube 4Kamla Bïraþe el Moij an: Oo m'a m'ad nyasa tuso ko kïdõ dørãt kïtasï. Deg a teen, a øin kï ndø kïðen nyasa kï asï sad ndø kïða, kïtakad m'nádïn m'oo ke a ndian kam tat lom, ke a ndian kamt al a? 5Ndøt kïkõ kïbojidet a ðan go nya'n a øin, a øin døt asï nja joo tøi în øin kïta ndø kïðen.
6Moij kï Aarõ elïn Israelag tube anan: Lokïsøle a i gerïn kad i Bïraþe la tee sesï kam døning Ejipt kïtïga ye. 7Loti kïsî a oon tøg kï tøi lo Bïraþe, kïta oo nyurtag losï kïdøat. Jî nõg kad i nyurïn ta døjt a? 8Moij el an: Lokïsøle Bïraþe a adsï dã kad i san, na loti kïsî a adsï nyasa kad i ndenïn kïta Bïraþe oo nyurtag kï i ndï nyurïn kïdøat, na jî nõg a? Nyurtag losï i kïdøjt al, na i kïdø Bïraþet.
9Moij el Aarõ an: El Israelag ngékawnatube an: I ndøtïn nderrbe kïnõ Bïraþet kïta oo nyurtag losï 10Lon Aarõ ða elta Israelag ngékawnatube þaitø ye, telïn kumd kïdø dïlalot, na oon kunj Bïraþe ða ngereng kam kilndiit.
11Bïraþe el Moij an: 12M'oo dø ko lo ngan Israelg. Na eld ta 'nten: A i san dã døji losølt, na loti kïsî a i ngahn nyasa kï asï kad i san i titbe la a i gerïn kad mî la mî Bïraþe Luwah losï ye.
13Lokïsøle kerreg ðe utïn londïd, na loti kïsî tal hø gug dø londïd. 14Lon tal'n non ur ye, nya mad kïdu dogïrdogïr tit kum nya kïndà be to kam dïlalot, tit øsïnd be døningt. 15Lon Israelag oon ye, elïn'na anan: 'Nten i ði a? Kïtø gerïn nya'n non al. Moij eld an: În ten la i nya'n Bïraþe adsï kïta sa. 16În ten la i nya'n Bïraþe nda mbera ye, kï dekïðen kusït øi asï kïta san, kï asï kam ngo mbøj nya kïta dekïðen, kïgo kør degt losï; ad dekïðen øi kïta ngékïkam kujkubt lon. 17Titbe la Israelag ðan ne ye, kïmadg øin ngãi, kïmadg øin ngãi al. 18Lon mbøjïn kam ngo mbøj nyat'n non ye, de'n øi ngãi a ne, ndega kï nãi goto, na de'n øi ngãi al a ne, nal nya mad al tø. Dekïðen øi asï ta san.
Ðob kï titbãi maj kad ngan Israel'ng san ne ma ne,
19Moij eld an: Kï de mad nya mbã loti døt al 20Na oon dø ta lo Moij al, ad kïmadg kudt nyan ndega mbã loti døt, so kïde ad ot, na Moij þawong sed. 21Øin kïsî kïndøgndog, dekïðen øi asï ta san. Lon kad øsï døt ye, gang man kø.
22Ndø kïkõkïbojidet øin nyasa døt asï njajoo ad i ngo mbøj nya joo kïta dekïðen. Mbaiþeg lo ngékawnatube ðe elïn Moij. 23Na Moij eld an: 'Nten la i nya'n Bïraþe el, loti i ndø taakò, ad i ndø sabat kïjaþat lo Bïraþe. I ndawïn nya'n i ndig ndawïn I ndirrïn nya'n i ndig ndirrïn na ndega kï nãi a i ngomïm losølt mbã loti kïsî 24Ngomïn rodt mbã loti kïsî tit'n Moij eldïn, ot al ho, so kïde al ho. 25Moij el an: I san 'nten þone. Kïta þone i ndø taakò lo Bïraþe, þone a i ngahn kam mut al. 26Ndø kïbojidet a øin, na ndø kïkõtanãimïta i ndø taakò, a i ngahn al.
27Ndø kïkõtanãimïta kïmadg ku degt'n non teen kïta koi, na ngahn al. 28Kamla Bïraþe el Moij an: Ndø bãi a mbet ngomïn go mberkïndag lom kï tag lom a? 29Oon Bïraþe adsï ndø taakò, i kïta 'nten la adsïn ne nyasa kï asï ndø joo kam ndø kïkõkïbojidet ye. Kï dekïðen ndï londïnt, kï de mad tee londïnt kïtïga ndø kïkõtanãimïtat al. 30Kïtø 'nten la deg taan ne ko ndø kïkõtanãimïta ye.
31Ngékïþe lo Israel'n kunïn tø nyasa'n non Mane. Tit kï kum kor be, i kïndà, nela i tit nduj kï løi kï tej be.
32Moij el an: 'Nten la i nya'n Bïraþe nda mbera, i ngomïn mane asï kam ngo mbøj nya kïða kï ngakat kï ngaka kïtakad oon ne nyasa in m'ad i san kam dïlalot lon m'teen sesï kam døning Ejipt't kïtïga. 33Kamla Moij el Aarõ an: Un joo mad, øi mane kï asï kam ngo mbøj nya kïða kamt, na i nda jo'n non nõ Bïraþet kïtakad ngomïn kï ngakat kï ngaka. 34Tit'n Bïraþe ndan mber Moij ye, titbe tø Aarõ ndaha nõ Najkïmat kad ngomïn.
35Israelag san mane þal døsøø mbã teen ne døningt mad in deg ndïnt, san mane mbã teen ne ðobnin døning Kanaat. 36Nya mboj'n non i gaj kïða ku kïkïlaht lo nya mboj nya.
Currently Selected:
Teekïtïga 16: MB80
Highlight
Copy
Compare
Share
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.
