Ruta 1
1
Nawumi màgò Ruta nà
1Ndrǔní lò-tdèydha-djá nyù tdè pey Israeli djú mí ddu ó, ddrǒngó ní ɦùw chèy fú dziylíy ó. Fú ddiy lêy tdè Betelehemu mí bba ó kpatss̀, Yudda mí dziylíy ó nì, nděyngá dza-yà nà ndèymí nděyngá rwo nì ddúw-ní nà, rà ì rǎ dey drá ní ddu dhò Mowab mí dziylíy ò. 2À mí dza-dja ró dho tdè Alimalek, dza-yà ró dho tdè Nawumi ndèymí àmí ddúw-ní rwo nì ró dho tdè Malon ndèymí Kiliyon nà. Ndrǔ tdè Efrate-ddúw cha ì shì tdè Betelehemu mí bba óddù, Yudda mí dziylíy ó nì. Ndrǔ rà Mowab mí ngòw ò ndèymí ndrǔ dêy fulè.
3Alimalek kâ dhì ndèymí Nawumi kâ mà nděyngá rwo nì kpa-ní nzòw nà. 4Ddúwní rwo nì tdûw Mowab sí-nzow ì dho dhì ní, ddì nì ró dho tdè Orifa njàddí ró dho tdè Ruta. Ndrǔ dêy fungá cho dri nì dho ddiy-dzzdjú, 5ndrǔ rwo tú wá Malon ndèymí Kiliyon nà kâ dhì ndèymí Nawumi kâ mà ngǎ ddúw-ní ní ndèymí ngǎ ndèymí dza-dja ní.
Ruta mà rà Nawumi nà
6Nawumi rr̀ tdè Ddrǒngóli shì tdè nděyngá bbalè dhí zòw njà Yuddeya mí bba ò ro, ndèymí à bbû Mowab mí dziylíy ó bbalè dho nyû. À ndèymí ddúw-ní-dhì nà ndrǔ thì ì ndaní ì ngû Betelehemu mí bba ò fungá ddù.
7Nděyngá fú rwo nì ddúw-ní-dhì nà ndrǔ bbà cha ì tdè dey mí nga, ndrǔ tdûw tuw cha ndèy dho ì mbà Yudda mí dziylíy ò nì.
8Nawumi kâ tdrà fú rwo nì ddúw-ní-dhì dho, “Nyì ngú, ddì-ddì ní li yâ-nì dè. Ddrǒngóli dho ney nyì dho lǎnínga njèy gbè nyì njèy ì dhì nì nyì kpá dhò lǎnínga ndèymí ma dhò níchú. 9Ddrǒngóli dho ley ney nyì chǔw nyì rónga shùdha mí nga cha nyì rà nyì kòw ì dho nì kpa dhí dza ó.” À kâ ndrǔ dhò zudha bbu tdràdha nà nyì ra lǎní ndèymí ndrǔ kâ lòw dzz̀ ì tdûw ì chuw rí ddiy nà, 10ndèymí ndrǔ kâ tdrà à dho, “Mà rà rà nyi nà nyìdhíngá bbalè dè.”
11Chú Nawumi kâ tdrà, “Nyì ngú bba, màtsá dhá-ní. Ddudhò nyì ní jǐ nyì rǎ ma nà? Ma rá ney ngéy ní kpa-ní-nzòw gòw cha ì dho ngu nyì kpá ní nì? 12Màtsá dhá-ní, nyì ngú bba, màtsá cho rà lèy, ma dho nzǐ ma kòw ngéy ní kpa dhò ddíyàchú. Ya kpe ma tdě ddeydha nà, ndu nì kúw ó ma chǔw ndanà ma zz̀ ndèymí ma gǒw ndanà kpa-ní-nzòw, 13nyì dhó pbò ney pbǔw ndrǔ njí ddiy ò? Fú ddiy dhó ley ney nzǐ nyì kǒw nyì ngéy ní kpa dhò? Ngǎ fǔchú, à nì ngǎjìní ma dhò màtsá dhá-ní. Màtsá zòw dà nyìdhí djòluw, ddiydhò Ddrǒngóli thokpa nì ma djú.”
14Nawumi tdrà nì lò dho, Orifa ndèymí Ruta nà kâ ì chuw tduw ru dzz̀dha dhò ddíyàchú. Orifa kâ zudha bbu djîyà-nì dho ndèymí à kâ à bbà, chú Ruta pbà sǔw Nawumi dè.
15Nawumi kâ tdrà, “Nja, wènyi-dhi ngû yânì dè ndèymí ìdhí-ngá ddrà dè. Nyi ddí lí nyi, nyi ngú wèy-nyi dhi kodjú.”
16Chú Ruta ngù lò-dzzdjò, “Nzǐ tdra ma dhò ma bbǎ nyi! Bba ma rǎ nyi nà.” Ddiydhò nyi nì rǎ mí nga ò mà rà rà nyi nà, ndèymí nyi ra ddù mí nga ó ma ddí rà ddù fungá. Nyìdhí ngá bbalè rà dey màdhí ngá bbalè ní, ndèymí nyìmí Ddrà rà dey màtsá Ddrà ní. 17Nyi rà dhì mí nga ó ma ddí rà dhì fungá ndèymí ma ddí ka rà tdòw fungá. Ma jì Ddrǒngóli à njěy mà nà ngǎjìní ddiy à da wánì ddiy djòluw, à tdě ya nzá dhi ndò mà ndey nyi nà ro. 18Nawumi njà tdè Ruta jì dìchú ndèy rǎ ndèy nà ro, à bbà tdràdha nà à ngú bba.
Nawumi ndèymí Ruta nà shì Betelehemu mí bba ò
19Fú rwo nì dhì rà sǔw pbǔw ndrǔ shì Betelehemu ò. Ndrǔ shì tdè Betelehemu ò ro, fú ddrǒngó ní bba ó bbalè ónga ꞌwìy wá, ndrǔ tdrà, “Í ní dìchú Nawumi?” 20Chú Nawumi kâ tdrà ndrǔ dhò, “Nzǐ nyì íy ma Nawumi ní, Nyì íy ma Mara ní, ddiydhò Ddrǒngóli lêy màtsá djiy zòw ó.” 21Ma rà tdè ingá ddù ro, ma tdè bíy ní ddiy nà ma thokpa ó, chú ma ngû ro, manì ngǎ ddiy ní. Nyì ní ma iy Nawumi ní ddudhò? Ddrǒngóli lêy ma chùw zòw ndèymí Ddrǒngóli lêy ngǎjìní ddiy njèy ndèy ma ró. 22Fú ddiy dhò Nawumi ngǔ Mowab óddù ddìngaó ddùw-nì-dhi Ruta Mowab-síngba nà, ndrǔ shì Betelehemu ò ngǎnù tsìdha nza óddù mí ddu tsò ngà ndèy ddiy ó.
Currently Selected:
Ruta 1: NDRULO
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved