Marko 16

Yesu ngû djiy ní dhi óddù

(Mat 28:1-8; Lwk 24:1-12; Yoh 20:1-10)

1Sabato ddù sî tdè ndèy ro, Mariya Magadalene, Mariya Yakobbo mí yânì ndèymí Salome, dzz rř ndèy dzz nà nì chì. Ndrǔ rǎ ndanà Yesu rónga vìy. 2Yenga itsś djú prř bbǔbbú nga nà, cha itsś shi tdè ro, ndrǔ rà tdôw-dzì tsò rò. 3Ndrǔ nì rǎ mí nga nà, ndrǔ dêy ì dhiy ì kàóluw, “Áyì rá ndey mà dhò djuw nglùw tdôw-dzì tsò ró ddù?” 4Ndrǔ tdrà í lò, ddiydhò mí djuw tdè ddrǒngó tǐ.

Chú, ndrǔ njà nga tdôw-dzì dè ro, ndrǔ njà djuw cha ndèy tdè tdôw-dzì tsò ró nì ka nglùw ŋà nga gitò. 5Fú ddiy dhò, ndrǔ tsùw òmà. Fulè ndrǔ njà tdè kpatss̀-ní-ngba dòw ndèy ró sárŕ ní ndì ní rù nà ví ó li-dhokpa djòluw. Ndrǔ ónga ꞌwìy wá ndèymí nyí lòw ndrǔ.

6À tdrà ndrǔ dhò, “Nzǐ nyì njey nyí, ma tsì nyì nì Nazareti ó Yesu měy, cha ndèy ka chô tdè musalabba djú nì. À nì ngǎ ingá, à ngû djiy ní dhi óddù! Nyì nja, ka lêy à rónga mí nga nì i. 7Chú nyì ra ndèymí nyì tdrà í lò Petro dhò ndèymí njàddí à kodjú kpa nà ddí, ‘Yesu nì rǎ nyì njìò Galilaya ò, nyì rà à njà fulè cha à tdrà tdè nyì dhò níchú.’”

8Fú dhì kòw tdôw-dzì óddù, ì rónga nì bbǐ ndèymí ì ónga ꞌwìy ddiy nà. Ndrǔ tdrà lò rò nzá njàddí li dhò, ddiydhò ndrǔ tdè nyí nà.

Yesu dhò ndèy Mariya Madalena dho

(Mat 28:9,10; Yoh 20:11-18)

[ 9Yesu ngû djiy ní dhi óddù ddiy-dzzdjú, bbǔbbú prř yěnga nà, à dhò ndèy nji Mariya Madalena dhò, cha ndèy dìy che thíy zarr̀gbòw ndèy óddù nì. 10Mariya Madalena rà ndèymí à tdrà cha Yesu mà tdè dey ì nà nì ndrǔ dhò. Ndrǔ tdè zòw nà ndèymí dzz̀ nà. 11Ndrǔ rr̀ tdè Mariya nì tdrǎ, Yesu nì djiy ní, ndèymí ndèy njà à, ndrǔ ùw à dhò nzá.

Yesu dhò ndèy, rwo nì ndèy kodjú kpa dhò

(Lwk 24:13-35)

12Í ddiy-dzzdjú, Yesu dhò ndèy ngéy ní ndèy ji ó rwo nì ndèy kodjú kpa kàó ndrǔ dhò, cha ndrǔ tdè rǎ rútsò ddrǒngó ní bba óddù ro. 13Ndrǔ ngû ndèymí ndrǔ tdrà njàddí Yesu kodjú kpa dhò, chú ndrǔ ùw nzá.

Yesu dhò ndèy dri ndèy djú ddì nà nì ndèy kodjú kpa dhò

(Mat 28:16-20; Lwk 24:36-49; Yoh 20:19-23; Njí 1:6-8)

14Fú ddiy-dzzdjú, Yesu dhò ndèy dri ndèy djú ddì nà nì ndèy kodjú kpa dhò cha ndrǔ tdè nga nyǔ mí nga nà. À rr̀ lò ndrǔ djú, ddiydhò ndrǔ thíy tdè ndǐy. Ndrǔ ùw nzá cha ì njà tdè à djiy ní dhi óddù nì mí lò. 15À tdrà ndrǔ dhò, “Nyì ra wánì dziylíy òluw ndèymí nyì tdra Hwî mí Lò-ɦéy bbalè wánì dhò. 16Ndèy ùw ndèymí à lòw bàtízò nì li rà pa. Ndèy ùw nzá nì li, ka rà lò-ndò ndey li djú. 17Ì ùw nì ndrǔ dhò ka rà ddùw mí ɦiy mí klôw bbu. Í ɦiy nà, ndrǔ rà che thíy dda ma ró dho ó, ndrǔ rà tdey nì ní lò-tsò tdrà. 18Ya ndrǔ lòw ngìydhá ǐngí ndrǔ mbù dyá, nzǐ à rà ndrǔ njèy ngǎjìní. Ndrǔ rà ì dhokpa ley dhi nà nì bbalè ró ndèymí ndrǔ rónga rà djì.”

Ka tdûw Yesu ru rakpa ò

(Lwk 24:50-53; Njí 1:9-11)

19Ddrǒngóli Yesu tèy lò ndrǔ nà ddiy-dzzdjú, ka tdûw à rakpa ò ndèymí à dòw Ddrà mí ví djòluw nì nga là djòluw. 20Yesu kodjú kpa rà ndèymí ndrǔ tdrà Hwî mí Lò-ɦéy wánì nga òluw ndèymí Ddrǒngóli tdè ndrǔ nà ndèymí à lêy ndrǔ dhí lò-tdràdha tsì ndèy dìchú, cha ndrǔ njèy nì ddùw mí ɦiy nà.]#16:20 Njàddí ndruní Ddrà mí ndíydha-ní-lò ó ndèymí ndruní lò-tsò lídha ó versi 9-20 nì ngǎ.

Currently Selected:

Marko 16: NDRULO

Highlight

Copy