Marko 11

Yesu tsùw Yerusalemu ò pey níchú

(Mat 21:1-11; Lwk 19:28-40; Yoh 12:12-19)

1Njanja ndrǔ shì tdè chow Yerusalemu mí ddrǒngó ní bba dè, Betfage ndèymí Betaniya mí bba cha ì nì Òlívè tsúw mí ngòw djò nì dè ro, Yesu chô ndèy kodjú kpa rwo nì njitsò djò. 2À tdrà ndrǔ dhò, “Nyì ra njitsó nì bba ò. Ya nyì tsùw fungá mí nga nà, ndùw nyì rà kànà mí ngba chùw cha ka chèy nì, děy nzá ka dòw ndèy djú nì. Nyì kló ndèymí nyì mba. 3Ya li rò tdrà nyì dho, ‘Ddudhò nyì ní í ddiy njěy?’ nyì tdra, ‘Ddrǒngóli nì jǐ ndey ndèymí ndùw à rà ley à ngú ví ingá.’”

4Fú nga nà, ndrǔ rà ndèymí ndrǔ chùw kànà mí ngba rútsó tuw ó, ka chèy dzá tsò djú ndèymí ndrǔ klô à. 5Ndrǔ kàó njàddí bbalè cha ì dèy tdè fungá nì dhîy, “Nyì ní ddu njěy, nyì nì ndanà fú kànà mí ngba klo nì?”

6Ndrǔ ngù lò gbè Yesu tdrà tdè ì dho níchú, ndèymí bbalè mí njuw bbà ndrǔ rà. 7Ndrǔ mbà kànà mí ngba Yesu dè, ndrǔ ngbò ìdhí rù djǒmá, ndèymí Yesu dòw à djú. 8Bíy ní bbalè kpì ì ró rù tuw ó, njàddí ndrǔ kwò tsúw gi-lá nza óddù ndèymí ndrǔ kpì tuw òluw. 9Cha ì tdè njitsò djú nì ndrǔ ndèymí ì tdè à dzzdjú nì ndrǔ, lòw dey swa,

“Madha déy Ddrà dhò!

Bû nì cha ndèy shì Ddrǒngóli ró dho ó nì li dhò!#11:9 Ngwo-kpà 118:25,26.

10Bû nì mà-dja pey Dawuddi ngá pey-mí-nga dhò!

Madha Ddrà dhò ru pléy ní rakpa ò nì!”

11Yesu tsùw Yerusalemu ò, ndèymí à rà Yahuddi-ddúw dhí Ddrà nzz̀dha mí thí ní nga ò ndèymí à njà nga gbrǔ wánì ddiy dè. Itsś tdè chěy ddiydhò, à rà Betaniya ò ndèy kodjú dri ndèy djú rwo nà nì kpa nà.

Yesu wâ fígì-tsúw

(Mat 21:18,19)

12Nêyngá bbǔtss̀ ró, Yesu ndèy kodjú kpa nà tdè ngu Betaniya óddù ro, ɦùw lòw à. 13À njà ndì nì nga óddù ndèy gi nà nì fígì ní ka íy nì nì tsúw ro, à rà à dè ya ney ndèy dho tsi nì rò chùw rǒmá. À shì à dè ro, à chùw ddiy rò nzá, chú ginì chúddì, ddiydhò àmí ꞌwòdha mí nga shì tdè děy nzá. 14À tdrà à dhò, “Li rò nì ngǎ wánì nga nà cha ndèy rà nyi tsi nyù ddíyàchú nì.”

Ndèymí à kodjú kpa rr̀ à.

Yesu dîy bbalè Ddrà nzz̀dha mí thí ní nga óddù

(Mat 21:12-17; Lwk 19:45-48; Yoh 2:13-22)

15Ndrǔ shì tdè Yerusalemu ò ro, Yesu rà Yahuddi-ddúw dhí Ddrà nzz̀dha mí thí ní nga ò ndèymí à lòw bbalè diy cha ì tdè ddiy dzž ndèymí ddiy ónga dzz nì nà. À ngbô mb ónga lídha-djá dhí mězà ndèymí à ngbô cha ì nì bbǎlá ónga dzz nì ndrǔdhí dòwdha mí tsúw. 16Ndèymí à gù bbalè nzǐ tdúw cha ka nì ndèy ónga dzz nì ddiy Ddrà nzz̀dha mí thí ní nga òluw. 17À tdè bbalè gwiy mí nga nà, à tdrà, “À ndîy ndèy Ddrǎ-ngá ndíydha-ní-lò ó, ‘Màtsá dza ka rà iy Ddrà nzz̀dha mí dza ní bbalè dhí pbúw wánì dhò.’#11:17 Isaya 56:7. Chú, nyì ngù à gbu-djá ru nì ì mí nga ní!”#11:17 Yeremiya 7:11.

18Ddrǎ-ngá dyǎ-djá djú kpa ndèymí Musa-ngá yǎdha mí li-gwíydha-djá rr̀ í ddiy ndèymí ndrǔ lòw tuw mèy ì hwǐ ndanà à. Ndrǔ tdè àmí nyí nà, ddiydhò bbalè wánì ónga ꞌwìy àmí gwíydha dhò. 19Ngítss̀ djú nga shì tdè ro, Yesu mà ndèy kodjú kpa nà bbà ddrǒngó ní bba.

Fígì-tsúw ró gwíydha

(Mat 21:20-22)

20Nêyngá bbǔtss̀ ró bbǔbbú nga nà, ndrǔ tdè bbiy tuw òluw mí nga nà, ndrǔ njà mí fígì-tsúw. À ꞌwìy pbǔw dhey nì ò. 21Petro ddêy cha ndèy njèy ndèy nì lò ndèymí à tdrà Yesu dhò, “Li-gwíydha-dja, nja! Nyi wâ tdè nì fígì-tsúw ꞌwìy ŋà.”

22Yesu ngù lò ndrǔ dhò, “Nyì déy ùwdha nà Ddrà ó. 23Manì nyì dhò dìchú ní lò tdrǎ, nyì dho tdrà í ngòw dhò, ‘Ddá nyi, ngbo nyi ju-ddà ò,’ ndèymí à rà ndèy njèy. Chú nzǐ nyì déy pàka nà nyì thíy ò, nyì kà nyì ǔw dìchú à rà ndèy njèy. 24Í lò dhò manì tdrǎ nyì dhò, ya nyì nzz̀ Ddrà ndèymí nyì dhîy ddiy rò, déy uwdha nà nyì kwô mí ddiy ŋà, ndèymí à rà dey nyìdhî. 25Ya nyì nì nzž ro, nyì kà nyì bbǎ ngǎjìní nga cha li rò njèy nyì dhò nì, ndaní nyìdhí Djǎnì rakpa ó nì bbǎ nyìdhí ngǎjìní nga cha nyì njèy nì. 26Ya nyì bbà nzá njàddí ndrǔ dhò, nyìdhí Djǎnì rakpa ó nì rà nyìdhí ngǎjìní njèydha bbà nzǐ.”#11:26 Njàddí ndruní Ddrǎ-ngá ndíydha-ní-lò ó versi 26 nì nì ngǎ.

Nga dhíydha Yesu nì ndanà nì klôw ddiy njèydha mî ró

(Mat 21:23-27; Lwk 20:1-8)

27Ndrǔ shì Yerusalemu mí ddrǒngó ní bba ò ddíyàchú. Yesu tdè bbiy Yahuddi-ddúw dhí Ddrà nzz̀dha mí thí ní nga ò luw ro, Ddrǎ-ngá dyǎ-djá djú kpa, Musa-ngá yǎdha mí li-gwíydha-djá ndèymí drò-dró ní ndrǔ shì à dè. 28Ndèymí ndrǔ dhîy à, “Nyi ní í ddiy njěy ŋá klôw nà? Áyì bbú ndey nyi dhò fǔchú ní klôw?”

29Yesu ngù lò ndrǔ dhò, “Ma rà nyì dhiy ddì nì lò nà, ndèymí ya nyì ngù ma dhò mí lò, ma rà tdrà nyì dho ŋá klôw nà ma nì í ddiy njěy. 30Tdra ma dhò, Yohana mí klôw bàtízò bbúdha mî shǐ ŋangá ddù, à shǐ tdè rakpa ó Ddrà dèddù ǐngí bbalè dèddù?”

31Ndrǔ pà lò ì kàó ìníddù ndèymí ndrǔ tdrà, “Ya mà tdrà, ‘Ddrà dèddù,’ à rà dhiy, ‘Nyì ǔw Yohana nzá ddudhò?’ 32Chú, ya mà tdrà, ‘Bbalè dèddù,’ bbalè rà dey thǒw nà mà ró.” Ndrǔ tdè bbalè mí nyí nà, ddiydhò bbalè wánì dêy tdrǎ Yohana tdè dìchú nabi. 33Fú ddiy dhò, ndrǔ ngù Yesu dhò, “Mà tsì nzá.”

Yesu tdrà, “Ma ddí rà tdrà nyì dhò nzǐ, ya ŋá klôw nà ma nì í ddiy njěy ddiy.”

Currently Selected:

Marko 11: NDRULO

Highlight

Copy