Matayo 26
26
Ndrǔ ddêy lò ì hwǐ Yesu
(Mak 14:1-2; Lwk 22:1-2; Yoh 11:45-53)
1Yesu sî í lò tdràdha wá mí nga nà, à kâ tdrà ndèy kodjú kpa dhò, 2“Gbè nyì tsì li djòluw dàdha mí madha mí ddu mà rwo níchú, ma Ndrǔ-Ddùw ka rà ma bbu ka chó musalabba djú.”
3Ddrǎ-ngá dyǎ-djá djú kpa kâ ì njuw ddìngaó drò-dró ní ndrǔ nà Ddrǎ-ngá dyǎ-djá djú ddrǒngóli ngá kaley ó, cha ndèy ró dho tdè Kayafa nì. 4Ndrǔ ddêy lò ì lǒw ndanà Yesu nzá ka tsì ní ndèymí ì hwǐ à. 5Chú ndrǔ tdrà, “Mà kà nzá mà njěy ddrǒngó ní ddu ó, ndaní nzǐ à nyá bbalè kàó nga ngbùwdha.”
Ka vìy Yesu chì nà Betaniya mí bba ó
(Mak 14:3-9; Yoh 12:1-8)
6Yesu tdè Betaniya mí bba ó, Simoni bbá, cha ndèy nzâ tdè ndèy tsátsá dhì nà nì. 7Ddì nì ɦìytss-ní-li shì tdè à dè rí ndèy ró dzẑ nà nì chǔwpà nà, cha ndèy ó tdè rí ndèy ró dzz̀ nà nì rř ní chì, cha à ddù Yesu djùkpa ró à tdè nyû nyǔ mí nga nà.
8Yesu kodjú kpa njà fúddiy ro, thǒw lòw ndrǔ. Ndrǔ dhîy, “Ddudhò ka ní í ddiy sǎ? 9Í rř ní chì kà tdè ka dzź ǒnga rí ní dzẑ nà ndèymí ka bbú mí mb zòw ní bbalè dhò.”
10Yesu tsì tdè ddu ndrǔ tdè tdrǎ ddiy, fúddiy dhò à kâ tdrà ndrǔ dhò, “Ddudhò nyì ní zòw nya í ɦìytss-ní-li ò? À njèy lǎní ddiy ma dhò. 11Nyì déy nì wánì nga nà zòw ní bbalè nà nyì dè, chú nyì rà dey ma nà nzǐ wánì nga nà. 12Í chì ddùdha nà, à thì ma rónga tdôw dhò. 13Manì nyì dhò dìchú ní lò tdrǎ, nga wá í dziylíy djú nì cha ka rà í Hwî mí Lò-ɦéy tdrà ndèy òluw nì, ka rà cha à njèy nì ddiy ddí mí lò tdrà ndèymí bbalè rà à ddey ndanà.”
Yudda ùw ndèy rà Yesu dhotèy bbu ndrò-djá dè
(Mak 14:10-11; Lwk 22:3-6)
14Dri ndèy djú rwo nà nì Yesu kodjú kpa kàó ddì li, cha ndèy ka îy tdè Yudda Iskariyota ní nì, kâ rà Ddrǎ-ngá dyǎ-djá djú kpa dè. 15À dhîy ndrǔ, “Nyì rá ddu bbu ma dhò ya ma bbû Yesu dhotèy nyì dè ro?” Fú ddiy dhò, ndrǔ zòw mb hó drì-drínga gbow ndèymí ndrǔ bbû à dè. 16Fungá ddù, Yudda tdè tuw měy ndèy bbú ndanà à dhotèy ndrǔ dè.
Yesu nyù li djòluw dàdha mí madha mí nyû ndèy kodjú kpa nà
(Mak 14:12-26; Lwk 22:7-23; Yoh 13:21-30; 1 Kor 11:23-25)
17Ngǎ ndèy ó thiy nà nì mùkátì mí madha mí ddì nì mí ddu ó, Yesu kodjú kpa shì ndèymí ndrǔ dhîy, “Nyi ní jǐ mà thǐ nyi dhò li djòluw dàdha mí madha mí nyû ŋangá?”
18À ngù lò, “Ra ddrǒngó ní bba ò njàddí kpatss̀ dè ndèymí tdra à dhò, ‘Li-gwíydha-dja tdrà, màtsá sâ nì chow. Manì rǎ li djòluw dàdha mí madha mí nyû nyù ma kodjú kpa nà nyǐngà dzá.’ ” 19Fú lò dhò, Yesu kodjú kpa njèy gbè cha à tdrà tdè níchú ndèymí ndrǔ thì li djòluw dàdha mí madha mí nyû.
20Ngítss̀ djú nga shì tdè ro, Yesu ndèymí dri ndèy djú rwo nà nì ndèy kodjú kpa nà dòw tdè mězà tsò ró dey nyû nyǔ. 21Ndrǔ tdè nyû nyǔ mí nga nà, à tdrà, “Manì nyì dhò dìchú ní lò tdrǎ, nyì kàó ddì li rà ma dhotèy bbu ndrò-djá dè.”
22Zòw lòw ndrǔ ndèymí ndrǔ lòw dey tdrà à dhò ddì-ddì ní, “Ddrǒngóli, dìchú nyi ní ngǎ ma tdrǎ?”
23Yesu ngù lò, “Nyì kàó ddì li cha ndèy shùw ndèy-dhokpa ddìngaó ma nà líybbíy ò nì, rà ma dhotèy bbu ndrò-djá dè. 24Ma Ndrǔ-Ddùw rà dhì gbè cha à ndîy ndèy Ddrǎ-ngá ndíydha-ní-lò ó níchú. Chú zòw cha ndèy rà ma Ndrǔ-Ddùw dhotèy bbu ndrò-djá dè nì li djú. À dho tdè lǎní fú li dhò ya nzá ka gòw tdè fú li.”
25Yudda cha ndèy rà à dhotèy bbu ndrò-djá dè nì kâ tdrà, “Li-gwíydha-dja, dìchú nyi ní ngǎ ma tdrǎ?”
Yesu ngù lò, “Òní, à nì nyi.”#26:25 Òní, à nì nyi. Njàddí í lò-lídha tey nì, Nyi tdrà nyiníddò.
26Ndrǔ tdè nyû nyǔ mí nga nà, Yesu tdûw mùkátì, à bbû madha Ddrà dhò, à pbrr̀ ǒnga ndèymí à bbû ndèy kodjú kpa dhò, tdràdha nà, “Nyì tdúw nyì nyu, í nì ma rónga.”
27À kâ dìváyì-wà nà nì kǒpù tduw ndèymí à bbû madha Ddrà dhò ddiy-dzzdjú, à bbû ndrǔ dè, tdràdha nà, “Nyì mbu ǒmá ddù, nyì wá. 28Í dìváyì-wà nì màtsá tdeynì ní li-chuw-tsò gbádha mí jǔw, cha ndèy tdiy ndèy bíy ní bbalè dhò nì, ndrǔdhí cherr bbàdha dhò. 29Ma nì tdrǎ nyì dhò, ma rà nzǐ í dìváyì-wà mbù njanja nga djúddù pbǔw fú ddu ó ma rà dìváyì-wà tdey mbu ddìngaó nyì nà màtsá Djǎnì ngá Pey-mí-nga ò.”
30Ndrǔ ngwò tdè ngwo mí nga nà, ndrǔ rà Òlívè tsúw mí ngòw djò.
Yesu dhò Petro rà ndèy gù
(Mak 14:27-31; Lwk 22:31-34; Yoh 13:36-38)
31Yesu kâ tdrà ndrǔ dhò, “Í kúw ó, nyì wá rà ma bbà, ddiydhò à ndîy ndèy Ddrǎ-ngá ndíydha-ní-lò ó, Ddrà tdrà,
“ ‘Ma rà towmbù rónga pbòdha-dja hwì,
ndèymí mí towmbù wá rà dha.’#26:31 Zakariya 13:7.
32Chú ma ngû djiy ní dhi óddù ddiy-dzzdjú, ma rà rà nyì nji ò Galilaya mí ngòw ò.”
33Petro ngù lò, “Yakpe njàddí ndrǔ rà dha nyi róddù gu, ma rà nyi bbà nzǐ.”
34Yesu tdrà Petro dhò, “Manì nyi dhò dìchú ní lò tdrǎ, í kúw ó, děy nzá ǒw-kpà ngwò ní, nyi rà tdrà gbow ngà nà nzá nyi tsì ma.”
35Petro ngù lò, “Yakpe à kà ma dhǐ nyi nà, ma rà nyi gù nzǐ.” Ndèymí njàddí à kodjú kpa wánì tdrà fú ddì nì lò jì.
Yesu nzz̀ Ddrà Getsemani ó
(Mak 14:32-42; Lwk 22:39-46)
36Yesu kâ rà ndèy kodjú kpa nà cha ka îy nì Getsemani ní nga ò, ndèymí à tdrà ndrǔ dhò, “Nyì dow ingá, ma nì rǎ Ddrà nzz̀ děy changá.” 37À tdûw Petro ndèymí Zibiddayo mí ddúwní rwo nì nà ddìngaó ndèy nà. Zòw lòw à ndèymí à ónga lòw dey tdò. 38À kâ tdrà ndrǔ dhò, “Ma nì zòw nà drǒ ma thíy ò cha ndèy dho ley ma dhǐ nì. Nyì déy ingá ndèymí nyì pbo nga ddí ma nà.”
39À rà drá ndrǔ njìò, à kwò ndèy tdyòw-tey gudjò ndèymí à nzz̀ Ddrà, “Ma-Dja, ya à dho ney ndèy njèy, léy í nzadha mí kǒpù ddá ndèy gu ma dèddù. Chú nzǐ léy à njěy ndèy ma jì níchú, bba nyi jì nì ddiy njěy ndèy.”
40À kâ ngu ndèy kodjú kpa dè ndèymí à chùw ndrǔ nì ddǔ ddùdha ní. À tdrà Petro dhò, “Nyì dhó nga pbò nzǐ ma nà nzá nyì ddù ní sâ ddì nì dhò chúkpe? 41Nyì pbo nga ndèymí nyì nzz, ndaní nzǐ nyì chěy mbùdha ò. Thíy nì jǐ ney, chú li-rónga nì shú.”
42Yesu rà ndrǔ róddù gu ddíyàchú ndèymí à nzz̀, “Ma-Dja, ya nyi dho nzǐ í nzadha mí kǒpù dda ma dèddù pbǔw ma mb ddiy ò, bba nyi jì nì ddiy njěy ndèy.”
43À ngû ddíyàchú ndèymí à chùw ndèy kodjú kpa nì ddǔ ddùdha ní, ddiydhò ndrǔ djùkpa tdè tǔw ddu nà. 44Fú ddiy dhò, Yesu bbà ndrǔ ddíyàchú ndèymí à kâ rà Ddrà nzz̀ gbow nì mî, fú ddì nì lò jì tdràdha nà.
45À kâ ngu ndèy kodjú kpa dè ndèymí à kâ tdrà ndrǔ dhò, “Nyì ní děy ddu ddǔ ndèymí nyì rónga shǔ? Nyì nja! Sâ nì chow ma Ndrǔ-Ddùw dhotèy bbudha mî cherr-djá dhokpa ò. 46Nyì ngbí nyì ru, mà déy rǎ. Ndèy nì ma Ndrǔ-ddùw dhotèy bbu cherr-djá dè nì li, nì ingá.”
Ka lòw Yesu
(Mak 14:43-50; Lwk 22:47-53; Yoh 18:3-12)
47Yesu tdè děy lò tdrǎ mí nga nà, Yudda, cha ndèy tdè ddì li dri ndèy djú rwo nà nì kpa kàó nì shì. À nà tdè bíy ní bbalè mí njuw ì-dhokpa ó gòw-dyì nà ndèymí kòddá nà. Ddrǎ-ngá dyǎ-djá djú kpa ndèymí drò-dró ní ndrǔ chô ndrǔ ndey Yudda mà nà. 48À dhotèy bbúdha-dja bbû tdè ndrǔ dhò ɦiy. À tdrà, “Ma rà mbu nì li, nì cha nyì nì jǐ nì li, nyì low à.”
49Yudda rà chěy Yesu dè ndèymí à tdrà, “Zudha nyi dhò, Li-gwíydha-dja!” ndèymí à mbû à.
50Yesu ngù lò, “Màtsá jǐ-dja, njey cha nyi shì dhomà nì ddiy.”#26:50 Njàddí í lò-lídha tey nì, Màtsá jǐ-dja, nyi shǐ ddudhò?
Kpa kâ shì Yesu dè, ndrǔ lòw à, ndèymí ndrǔ kâ à chèy. 51Cha ì tdè Yesu mànà nì ndrǔ kàó ddì li kâ ndèymí gòw-dyì dda ndèymí à kâ Ddrǎ-ngá dyǎ-djá djú ddrǒngóli ngá piy pwo, à tdèy à gi.
52Yesu kâ tdrà à dhò, “Léy nyìmí gòw-dyì ví ndèy rr̀dja ò. Bbalè wá cha ì ddâ ìdhí gòw-dyì bbalè hwìdha dhò nì, rà dhì ddí gòw-dyì nà. 53Nyi ní ddey ma dho nzǐ ma-Dja kwo, ndèymí à rà ngbír ma dhò ndèy da dri ndèy djú rwo nà nì dròdró ní ngúw mí malayika-kpà cho? 54Chú Ddrǎ-ngá ndíydha-ní-lò rá ndèy njèy ŋǎchú cha ndèy tdrà à njěy ndèy ǐchú ni?”
55Fú nganà, Yesu tdrà bbalè mí njuw dhò, “À kǎ nyì rǎ ma lòw gòw-dyì nà ndèymí kòddá nà, gbè ma nì nga ngbùwdha-dja níchú? Ddu wánì ró ma dòw tdè Ddrà nzz̀dha mí thí ní dza mí bbay ó bbalè gwíydha dhò ndèymí nyì lòw ma nzá. 56Chú í ddiy wánì njèy ndèy, ndaní nabi-kpà ndîy nì Ddrǎ-ngá ndíydha-ní-lò ó nì lò njěy ndèy dìchú.” À kodjú kpa kòw ndèymí ndrǔ bbà à.
Yesu Ddrǎ-ngá dyǎ-djá djú ddrǒngóli nyú djú
(Mak 14:53-65; Lwk 22:54-55,63-71; Yoh 18:13-14,19-24)
57Cha ì lòw tdè Yesu nì kpa mbà à Kayafa Ddrǎ-ngá dyǎ-djá djú ddrǒngóli de, cha Musa-ngá yǎdha mí li-gwíydha-djá ndèymí drò-dró ní kpa njûw tdè ì ddìngaó mí nga ò. 58Petro dyòw à ndì nì nga óddù pbǔw Ddrǎ-ngá dyǎ-djá djú ddrǒngóli ngá bbay djò. À tsùw ndèymí à dòw kaley rónga pbòdha-djá nà, ndaní ndèy njǎ ya ddu rà ndèy njèy ddiy. 59Ddrǎ-ngá dyǎ-djá djú kpa ndèymí ru nì lò-tdèydha mí njuwdha dzò tdè mbwa mí lò měy Yesu ró, ndaní ì hwǐ à. 60Chú ndrǔ chùw tdè ddì kpe nzá, kpe mbwa mí bíy ní bbalè cha ì tsì fú lò ró lò nì shì tdè.
Luwtéy rwo nì kpa shì 61ndèymí ndrǔ tdrà, “Í kpatss̀ tdrà, ‘Ma dho Ddrà nzz̀dha mí thí ní dza sà ndèymí ma dho ss̀ ví ddu gbow nì ó.’”
62Ddrǎ-ngá dyǎ-djá djú ddrǒngóli ngbîy ndèy ru ndèymí à tdrà Yesu dhò, “Nyi ní ngǎ lò rò nà cha nyi dho ngu nì? Ddu mí lò ní ndèy cha í kpa lêy nyi ró nì?” 63Chú Yesu dêy chíy. Ddrǎ-ngá dyǎ-djá djú ddrǒngóli kâ tdrà à dhò, “Ma nì jǐ nyi tsó djiy ní Ddrà ró dho nà. Tdrà mà dhò, ya nyi nì Masiya, Ddrà mí Ddùwnì.”
64Yesu ngù lò, “Òní, nyi tdrà déy. Chú ma nì tdrǎ nyì dho, à nga ndèy njanja nga djúddù nyì rà ma Ndrǔ-Ddùw njà ma dòw ví òluw nì klôw-Dja dhokpa djòluw ndèymí ma rà shì rakpa chuwtéy nduw-nduw djú.”#26:64 Danieli 7:13.
65Ddrǎ-ngá dyǎ-djá djú ddrǒngóli kâ ndèy ró rù tha#26:65 Í ddiy à njèy ndaní à dhǒ ndèymí thǒw. ndèymí à kâ tdrà, “À dhûw Ddrà! Ddudhò mà ní ngéy ní ì tsì fú lò ró lò nì ndrǔ měy sǔw? Njanja nyì rr̀ à dhuw nì nga. 66Nyì ní ddu ddey?”
Ndrǔ ngù lò, “À kâ dhi nà.”
67Ndrǔ kâ sa hwì à nyú ò ndèymí ndrǔ dûw à njàddí ndrǔ thà à 68ndèymí ndrǔ tdrà, “Jow mà dhò, nyi Masiya. Áyì thǎ nyi ndey?”
Petro gù Yesu
(Mak 14:66-72; Lwk 22:56-62; Yoh 18:15-18,25-27)
69Fú ddiy wánì tdè ì njěy ro, Petro dòw tdè rúgò bbay djú. Ddì nì noyi ní sǐngba ní ngba shì à dè ndèymí à tdrà, “Nyi ddí tdè Galilaya ó Yesu mà nà.”
70Chú à gù wá ndrǔ nyú djú. À tdrà, “Ma tsì nzá ya ddu djò nyì nì lò tdrǎ ddiy.” 71À rà rúgò kaley-tsò rò ro, njàddí noyi ní sǐngba ní ngba njà à ndèymí à kâ tdrà fungá nì bbalè dhò, “Í li tdè Nazareti ó Yesu mà nà.”
72À gù fúnì ddíyàchú, ju tsódha nà, “Ma tsì fú kpatss̀ nzá.”
73Drá ní nga dzzdjú, ì dèy fúnga nì ndrǔ rà Petro dè ndèymí ndrǔ tdrà, “Dìchú nyi nì ndrǔ kàó ddì li, ddiydhò ka tsì nyi nyìmí lò-tdràdha jì nà.”
74Petro kâ tdrà, ju tsódha nà, “Ma nì dìchú ní lò tdrǎ, ma tsì fú kpatss̀ nzá.”
Ndùw ǒw-kpà kâ ngwò. 75Petro kâ Yesu tdrà nì lò ddey, “Děy nzá ǒw-kpà ngwò ní, nyi rà ma gù gbow ngà nà.” Ndèymí à rà rúgò ka dzz̀ zòw nà.
Currently Selected:
Matayo 26: NDRULO
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
