Santiago 1
1
So' Santiago ỹidénaqtena jaso' lede jeso'me nelagaxatapega't
1Jaỹim Santiago, jaỹim lamaxasec ñi' Dios qataxa so' qadesaliaxanec Jesucristo. Samaxa da' ỹip'iỹénataxanaxac na' siỹaxadipi 'me chiỹoxogueta saua' doce lec'óqo'te so' Israel jen'me nelagaxatetelégue jen' 'aléua.
Jega'me naỹátenaxanaxac 'me chiỹoqo'ot ñi' Dios
2'Ami ỹaqáỹa', ỹátaqta ỹágueegue 'aviñii da' 'antónaxaquii qomle 'ami nivitalo jen' ỹodapecachi napiináanataxanaxac. 3Qá'a ma'le 'auaỹáchiñii qomle ỹivíta da' qoỹ'iỹen da' 'adip'iỹáxaquii, qana'chi huá'a da' nichic da' 'aneuálaxainaxaquii. 4Qaláxasa 'anpogoxóiñiỹapegue' da' 'aneuálaxainaxaquii da' ỹátaqta nalóchiiñi 'aviñii, qaidi 'aviñí'ỹam ga' siỹaxaua da' sóxote ỹ'axaic, ỹátaqta nalóchiiñi, qaỹa ga' ỹiuéetaaque.
5Da' 'uo ga' 'oonolec da' 'oñíita ỹiuen ga' laỹátenaxanaxac, n'óota da' ỹiỹaxanot ñi' Dios, qana'chi jiñi'me ỹanem, ỹátaqta sa nalóta qa'en. Qá'a jiñi'me sa semataqaic, qataxa sa ỹa'uo l'alóxo ga' siỹaxaua. 6Qaláxasa ỹátaqta 'aua'uo da' 'adip'iỹáxac da' 'uo ga' 'aviỹáxanaaque. Sa 'chi 'anachíta. Qá'a ga' siỹaxaua da' nachíta da' 'uo ga' ỹiỹáxanaaque, jega'me 'ená'am jen' lepáxa jaso' peróna da' 'chi ỹachítac jen' laỹat, qaỹa ga' l'emáqa' 'en. 7Ga' siỹaxaua da' na'chi 'éet'ec dójo', n'óota da' sa hueenatapéga da' 'uo ga' ỹaconguet, chiỹoqo'ot ñi' qadasoxola' Dios. 8Qá'a ga' siỹaxaua da' sa ỹataxalóo'te naua' leenataxaco, jega'me ỹátaqta sa ỹañoxot da' 'equegue ga' 'oonolec lasoxoc.
9Ga' qadaỹi da' 'uootaxa choxodaq, jega'me n'óota da' ỹátaqta máchiiñi qomle ỹivíta ga' nolo' Dios ỹaconot. 10Qana'chi 'ená'am ga' saliaxanec, jega'me n'óota da' ỹátaqta máchiiñi qomle ỹivíta ga' nolo' da' sega'me qon'iỹílaxachiñi. Qá'a jega'me huet'ot ga' nesaliaxa, jega'me 'ená'am jen' la'uo jen' 'auaqapi da' sa 'eeta't. 11Qá'a da' ỹivíta da' nenoxoséguem jañi' c'atena, qana'chi ỹátaqta jalcote jen' lauaq. Qana'chi jen' 'auaqapi daqaqa, jen' la'uo n'áqañi, qana'chi ỹiméta da' lodiac. Qana'chi 'ená'am nataq'en ga' huet'ot ga' nesaliaxa, sega'me 'chi daqaqatalégue da' l'onataxanaxac.
Da' n'iinaguec ga' siỹaxaua da' qoỹ'iỹen
12Ỹátaqta máchiiñi ga' siỹaxaua qomle huelégue da' neuálaxainaxac da' n'añaxateguet ga' n'iinaguec. Qá'a qomle ma'le ỹinoxonaqtenéegue dójo' n'iinaguec, qana'chi ỹaconguet da' nec'alaxa, sega'me laso'vi qoỹin. Dójo' nec'alaxa naqaida da' Dios ỹaloxóotapega ga' siỹaxaua 'me ỹauotec jiñi'me. 13Qomle 'uo ga' 'oonolec nomt'eguet ga' leenataxac da' ỹí'et ga' sa ỹiỹamaxañi, sa ỹipétetapega da' naqaiñi ñi' Dios ỹanem ga' leenataxac. Qá'a jiñi'me sa huetapecot ga' sa ỹiỹamaxañi da' ỹí'et, qataxa sa ỹasaxalégue ga' 'oonolec da' 'chi ỹapiinec ga' sa ỹiỹamaxañi. 14Na'chidáta ñi' 'oonolec siỹaxaua mai'chi 'equegue qataxa ỹoqovin da' mai'chi loqopi'chi, naqaida da' ỹi'quemáxam. 15Dójo' sa ỹiỹamaxañi noqopi'chi, jeda'me dec'oic da' n'etaxalóxo. Qataxa dójo' n'etaxalóxo da' ỹivíta di' lalóqo' da' sega'me sóxote ỹ'axaic, qana'chi di'ỹoq da' sega'me dec'oic da' neleuaxa.
16'Ami ỹaqáỹa', 'ami ñauotaxa'u, 'ena'to' qomle da' 'anoqovíñiitapeela't. 17Ỹima jen' ỹiỹamqáchiiñi qataxa nalóchiiñi 'me qo'mi qoỹanema, jen'me chiỹaqséguem, chiỹoqo'ot ñi' qan'étoqo't 'me l'onata jan' ỹicoỹadetalquéna. Jiñi'me sa nadálaxatela't, qataxa sa noqochic, sega'me ga' paqal. 18Jiñi'me qo'mi namaxalo da' l'aqtac 'me ỹ'axat da' 'eesa lasoxoc da' qo'mi nec'alaxatréegue, qá'a sétaaque da' qo'mi sega'me l'auaxanqa jala jen' ỹima l'onatac. Jeda'me na'chida da' mai'chi leenataxac.
Jeda'me n'amaqténataxanaxac 'me ỹátaqta 'eesa lasoxoc
19Chan'eesa 'ami ỹaqáỹa', 'ami ñauotaxa'u, ñi' 'oonolec da' 'oñíita n'óota da' ỹátaqta leuóteta da' naquiáxan, qaláxasa ỹiuen da' nepotétapegue' da' letaxaỹaxac, qataxa sa qoỹoqóchi'nỹet da' lalemataic. 20Qá'a ga' siỹaxaua lemataqaic sa ỹañoxot da' ỹí'et ga' ỹiỹamaxaden ñi' Dios. 21Chan'eesa 'ami 'auaxañíiñi ỹima jen' ỹátaqta ỹisepaxanaqtet ga' siỹaxaua qataxa ỹima jen' sa ỹiỹamaxañi. Na'chidáta da' 'ami huosóte' da' 'auacoñiiỹet da' l'aqtac ñi' Dios 'me sóxote qoỹaalóo'te naua' 'adiquidiaqtéldii', qá'a dójo' n'aqtac ỹaqanatet da' 'ami nec'alaxatréegue.
22Qaláxasa 'av'íchii jega' 'ami ỹapaxaguenque da' n'aqtac. 'Ena'to' da' 'chi 'anaquiáxañiitapega. Qá'a da' na'chi 'oñíit'ec dójo', 'ená'am da' 'chi 'anoqovíñiitapeela't. 23Qá'a ga' 'chi naquiáxatapega da' n'aqtac, qaa'le sa ỹalaxalégue da' ỹí'et, jega'me 'ená'am ga' siỹaxaua da' ỹiloỹínỹi jaga' talnaxai da' ỹic'aten jen' latáxasoxoc. 24'Chi ỹic'aten ga' 'éeta ga' latáxasoxoc. Ỹim, qana'chi jec. Copát'a, qana'chi sa netouénec ga' 'éeta. 25Qaláxasa jega'me sa ỹapalaxatét'a ga' naquiáxanaxac, na'chidáta da' ỹilot'egue ga' 'enaac jeda'me nalóchiiñi naqátaxac 'me ỹañoxot da' qo'mi huosóchidiñi qa'e'n, qataxa quetelégue jeda'me da' ỹátaqta ỹí'et jega'me 'enaac, qana'chi jega'me siỹaxaua ga' ỹacoolégue da' ỹí'et, qaa'le ỹátaqta máchiiñi.
26Da' 'uo ga' 'éetapega da' ỹátaqta 'amaqténataxanaxaic, qaláxasa sa ỹicoñi' ñi' lacháxat, jega'me mai'chi noqovíitapeela't. Qana'chi da' l'amaqténataxanaxac ỹátaqta qaỹa ga' náỹi. 27Da' n'amaqténataxanaxac 'me ỹátaqta ỹic'atéeta ñi' qadet'a Dios da' ỹátaqta ỹoqovíta qataxa qaỹa ga' huáaue janoic, jeda'me 'éeta: ga' siỹaxaua lecochiỹa ga' sapéloq qataxa jaga' p'ai 'me huétaaue da' ne'queténaxac, qataxa ỹátaqta nodenguet ỹima jen' sa nó'inpi 'me huetalégue jen' 'aléua.
Currently Selected:
Santiago 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.