Popular Bible Verses from Santiago 1

Share

'Ami ỹaqáỹa', ỹátaqta ỹágueegue 'aviñii da' 'antónaxaquii qomle 'ami nivitalo jen' ỹodapecachi napiináanataxanaxac. Qá'a ma'le 'auaỹáchiñii qomle ỹivíta da' qoỹ'iỹen da' 'adip'iỹáxaquii, qana'chi huá'a da' nichic da' 'aneuálaxainaxaquii.

Da' 'uo ga' 'oonolec da' 'oñíita ỹiuen ga' laỹátenaxanaxac, n'óota da' ỹiỹaxanot ñi' Dios, qana'chi jiñi'me ỹanem, ỹátaqta sa nalóta qa'en. Qá'a jiñi'me sa semataqaic, qataxa sa ỹa'uo l'alóxo ga' siỹaxaua.

Chan'eesa 'ami ỹaqáỹa', 'ami ñauotaxa'u, ñi' 'oonolec da' 'oñíita n'óota da' ỹátaqta leuóteta da' naquiáxan, qaláxasa ỹiuen da' nepotétapegue' da' letaxaỹaxac, qataxa sa qoỹoqóchi'nỹet da' lalemataic.

Qaláxasa 'anpogoxóiñiỹapegue' da' 'aneuálaxainaxaquii da' ỹátaqta nalóchiiñi 'aviñii, qaidi 'aviñí'ỹam ga' siỹaxaua da' sóxote ỹ'axaic, ỹátaqta nalóchiiñi, qaỹa ga' ỹiuéetaaque.

Qaláxasa 'av'íchii jega' 'ami ỹapaxaguenque da' n'aqtac. 'Ena'to' da' 'chi 'anaquiáxañiitapega. Qá'a da' na'chi 'oñíit'ec dójo', 'ená'am da' 'chi 'anoqovíñiitapeela't.

Ỹátaqta máchiiñi ga' siỹaxaua qomle huelégue da' neuálaxainaxac da' n'añaxateguet ga' n'iinaguec. Qá'a qomle ma'le ỹinoxonaqtenéegue dójo' n'iinaguec, qana'chi ỹaconguet da' nec'alaxa, sega'me laso'vi qoỹin. Dójo' nec'alaxa naqaida da' Dios ỹaloxóotapega ga' siỹaxaua 'me ỹauotec jiñi'me.

Ỹima jen' ỹiỹamqáchiiñi qataxa nalóchiiñi 'me qo'mi qoỹanema, jen'me chiỹaqséguem, chiỹoqo'ot ñi' qan'étoqo't 'me l'onata jan' ỹicoỹadetalquéna. Jiñi'me sa nadálaxatela't, qataxa sa noqochic, sega'me ga' paqal.

Qá'a ga' 'chi naquiáxatapega da' n'aqtac, qaa'le sa ỹalaxalégue da' ỹí'et, jega'me 'ená'am ga' siỹaxaua da' ỹiloỹínỹi jaga' talnaxai da' ỹic'aten jen' latáxasoxoc. 'Chi ỹic'aten ga' 'éeta ga' latáxasoxoc. Ỹim, qana'chi jec. Copát'a, qana'chi sa netouénec ga' 'éeta.

Da' n'amaqténataxanaxac 'me ỹátaqta ỹic'atéeta ñi' qadet'a Dios da' ỹátaqta ỹoqovíta qataxa qaỹa ga' huáaue janoic, jeda'me 'éeta: ga' siỹaxaua lecochiỹa ga' sapéloq qataxa jaga' p'ai 'me huétaaue da' ne'queténaxac, qataxa ỹátaqta nodenguet ỹima jen' sa nó'inpi 'me huetalégue jen' 'aléua.

Qomle 'uo ga' 'oonolec nomt'eguet ga' leenataxac da' ỹí'et ga' sa ỹiỹamaxañi, sa ỹipétetapega da' naqaiñi ñi' Dios ỹanem ga' leenataxac. Qá'a jiñi'me sa huetapecot ga' sa ỹiỹamaxañi da' ỹí'et, qataxa sa ỹasaxalégue ga' 'oonolec da' 'chi ỹapiinec ga' sa ỹiỹamaxañi. Na'chidáta ñi' 'oonolec siỹaxaua mai'chi 'equegue qataxa ỹoqovin da' mai'chi loqopi'chi, naqaida da' ỹi'quemáxam.

Ga' qadaỹi da' 'uootaxa choxodaq, jega'me n'óota da' ỹátaqta máchiiñi qomle ỹivíta ga' nolo' Dios ỹaconot.