Tito 2
2
Da' napaxaguenataxanaxac 'me ỹiỹamqáchiiñi
1Qaláxasa naua' 'auenapegalo ỹátaqta sa 'te nepaténeeta qomle naua' 'ónaxaiqa napaxaguenataxanaxaco. 2'Auenapéga na' ỹ'axaicáchiỹipi da' ỹátaqta sa huálaxanataxanaxaic, qataxa ỹiỹamqáchiiñi da' lasoxoc qataxa da' n'aqtaguec; n'óota da' lip'iỹáxac, qataxa da' lesóxodic, qataxa da' napogáxadenaxac. 3Na'chi 'ená'am jan' ỹ'axaina'pi 'auenapéga da' ỹátaqta quetelégue da' lasoxoc jaga' quétapegue' ñi' Dios, qataxa sa n'aqtaqa ló'o, qataxa sa latáxa lai't. Na'chidáta da' daloxónataxana ga' ỹiỹamqáchiiñi, 4qaidi jan' maliaxa sa ỹ'axaina'pi ỹapaxaguenec da' ỹichoxoden ga' loua qataxa ga' lec'óqo'tepi, 5nataq'en nelotela't, qataxa huosóta, ỹaỹáten da' l'acháqaỹaxac, sóxodai, qataxa ỹoqo'cha ga' loua, qaidi qaỹa 'te ga' sa ỹiỹamaxañi n'aqtaguec da' l'aqtac ñi' Dios.
6Na'chi 'ená'am 'au'añaqtet na' nesoxodipi, qaidi nelotela't. 7Qataxa 'am ỹátaqta 'aualoxóot'a jen'me ga' 'ónaxaic n'aqtaguec da' qad'onataxanaxac. 'Auapaxaguéeta, 'ená'te 'uo ga' 'auoxotétapiiñi, qataxa 'ená'te da' 'anquesesaxanalégue. 8Qataxa da' 'auapaxaguenataxan, 'auen ỹiỹamadíchidiñi naua' 'adosáxaco, qaidi qaỹa 'te ga' n'aqtaguec da' 'au'axátetac. Qaidi 'en 'alóxoỹi lauel ga' nautéetac, qana'chi qaỹa 'te ga' 'ami ỹasaxalóo'te ga' l'aqtac 'me sa ỹiỹamaxañi.
9'Auenapéga na' 'onataxanaxaicpi da' ỹátaqta ỹalaxalóo'te ỹima naua' 'enapegalo ga' ladípa. Jaldáta da' ỹiỹamaxadéeta, qataxa sa 'te sáxaic. 10Qataxa sa cacháxaic. Jaldáta da' ỹátaqta nepé'et, qaidi ỹima qoỹic'aten da' l'óiỹaxac, qana'chi 'uo da' lodiac qoỹin da' napaxaguenataxanaxac da' qoỹ'axátetac ñi' Dios 'me qadec'alaxaqui.
11Qá'a ñi'me Dios qo'mi ỹaloxonalo da' liỹamaqtaxanaxac 'me náaue da' lec'alaxa ỹima na' siỹaxadipi. 12Da'me liỹamaqtaxanaxac ñi' Dios qo'mi ỹapaxaguenque ỹima da' saxanaxadíñi naua' qadoico qataxa naua' qadoqopichidíỹaxaco. Qana'chi sáchaq da' n'óiỹaxac 'me netelela't ga' siỹaxaua, qataxa 'ónaxaic lasoxoc, qataxa nañaneguet da' 'equegue ñi'me Dios, naỹi da' maliaxa sonaqtalégue jen' 'aléua. 13Nataq'en qo'mi ỹapaxaguenque da' qolqat'ot da' qadasóxonataxanaxac ga'me nolo' 'me qo'mi ỹ'axatema da' l'iỹílaxasoxoc da' naquétaaue da' li'ỹoxodic so' Jesucristo 'me qantamnaxala' qadec'alaxaqui. 14So'me nañaneuo da' qo'mi ỹileualóo'te, qá'a sétaaque da' qo'mi nec'alaxatee'guesopa naua' qadoico, qataxa sétaaque da' huosóta da' qad'óiỹaxac da' qo'mi lalémaxase'te, qataxa sétaaque da' 'uo da' qadoqopi'chi da' s'étaq ga' 'ónaxaic.
15Naqaida qomle da' 'auapaxaguenataxanec. Ỹátaqta 'au'añaqtaxan, qataxa 'anolaxanéegue ga' siỹaxaua. Ỹátaqta 'ená'te 'aldiỹalégue da' 'au'axat dójo', qaidi sa 'am qonapacapeelégue.
Currently Selected:
Tito 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.