Apocalipsis 15
15
Jeso' siete namaxa'spi 'me ỹachit'ape saua' p'átreegue napite'nádi
1Ỹitaxa selá'a so' n'anec laqáỹa let'ádaic 'me ỹátaqta qoỹ'aalát'ec, huo'ot di' piỹem. Jeso'me 'eet'oi: So' siete namaxa'spi piỹem lé'ec ỹachit'ape saua' p'átreegue napite'nádi 'me ỹaloxon jega' p'áteegue lalemataic ñi' Dios.
2Nataq'en selá'a jaso' 'ená'am jan' huaxai ỹátaqta chíchiiñi so' lé'ec noxop. Jeso'me ỹaleeguet na' dóle'. Qataxa jeso'me siỹaxadipi 'me sa 'te nañanot da' ỹi'ỹoxoden so' síiỹac qataxa jeso'me nadénaqtac liquí'i, qataxa sa 'te da' náỹi jidi'me ỹóvi' da' lenaxat, jeso'me nichaatétañi huet'ot na' loxogue jaso' huaxai 'me ỹátaqta chíchiiñi so' lé'ec noxop. Lasóqot'a jaso' liviqui 'me ỹanem ñi' Dios. 3Qana'chi jeso'me siỹaxadipi ỹ'óotac jeso'me lalac so' Moisés 'me lamaxasec ñi' Dios qataxa jeso'me nalac da' qoỹi'ỹoxoden so' n'aanaxate c'óxot 'me 'eet'oi:
Ỹátaqta let'ádaic qataxa ỹ'oxodaq ỹima jen' 'ad'onatacpi,
'am qadasoxola', 'am qantamnaxala' 'me qaỹa 'te 'auqalánaac.
Ỹátaqta chimaqátreegue qataxa 'eesoda jenaa'me 'adadíco,
'am 'me 'am lasoxola' jen'me ỹodapecachi siỹaxadipi.
4¿Jái'chogamaxa sa 'am 'te ỹoqo'cha, 'am qadasoxola'?
Qataxa ¿jái'chogamaxa sa 'am ỹi'ỹoxoden?
Qá'a na'chi'améta da' 'am ỹoqovíta,
ỹima qomle jen' ỹodapecachi siỹaxadipi janac da' 'am ỹi'ỹoxoden.
Qá'a ỹátaqta qoỹauáachiỹi da' sa 'te da' 'anpáten da' 'animit ga' lasoxoc.
5Ca'li ỹim dójo', qataxa seloséguem, qana'chi selá'a so' tamnaxaqui piỹem lé'ec da' n'ouátetaiỹi jeso'me huétranỹi saua' qadi 'me nedetalóo'te saua' laqátaxaco ñi' Dios. 6Jeso' tamnaxaqui chiỹoqodáaue saua' siete namaxa's piỹem lase' 'me ỹachit'ape saua' siete napite'nádi. Jesaa'me naua' louo sadaasa lenaxat lino. Jeso'me ỹoqovíta qataxa ỹátaqta ỹaqasélec. Qataxa huo'oi naua' lasotalaqa'te oro, hualóo'te naua' letóguel. 7Qana'chi so' 'oonolec saua' cuatro síiỹac, jeso'me ỹanem so' 'oonolec jeso'me jana' sega'me ỹómaxaqui 'me chiỹaqaỹi jan' oro. Jaso'me ỹómaxaqui ỹátaqta saqáchiỹi jen'me qaỹa 'te ga' 'ená'am da' lichic le'uáanaxanaxac ñi' Dios 'me qaỹa 'te loiquiaqa' naua' noloqo'te da' l'óiỹaxac. 8Qana'chi jeso' l'acháqa't saua' naqátaxaco, jeso'me ỹátaqta saqáchiỹi jan' nemála' 'me chiỹaqaỹi da'me l'amaqchic qataxa da' l'añaxac ñi' Dios. Huá'a, qana'chi qaỹa 'te ga' ỹañoxot da' ỹinoxoneuó'o jeso'me n'acháqa' da' maliaxa sa 'te ỹiméte' jesaua' siete napite'nádi 'me ỹachit'ape saua' siete namaxa's piỹem lase'.
Currently Selected:
Apocalipsis 15: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
