Apocalipsis 11

Saua' dos l'aqtáxanaxanqa ñi' Dios

1Qana'chi jaỹim qoỹanem so' coqta 'me 'ená'am jen' naloqtenaxanaxat. Jaỹim qoỹinapéga, qoỹinaac:

—'Oñíseguem qomle, na'chi 'analoqten di' jaloc jiñi' tamnaxaqui lalémaxaset ñi' Dios qataxa jañi'me neco'ỹoxonaxalate. Qataxa 'analoqten ga' lecáta jen'me di'ỹoxodenataxáatacpi 'me huét'a di'me. 2Qaláxasa sa 'te qomle da' 'analoqten di' nasoxoc ñi' tamnaxaqui, qá'a di'me qoỹanem na' ỹaqá'a ga' chiỹoxogue. Jen'me siỹaxadipi ỹátaqta ỹi'uena't di' noic 'me lalémaxaset ñi' Dios. Ỹivídaxatetreegue gaua' cuarenta y dos 'auóxoiqa. 3Qana'chi jaỹim qomle sama' gaua' dos ỹamaxa's, qaidi ỹ'axa't naua' ỹ'aqtaqa ỹátaqta ỹivídaxatetreegue gaua' mil doscientos sesenta noloqo'te. Jegaa'me ỹáatrañi gaua' louo lasouaxaqui'.

4Saua' dos n'aqtáxanaxanqa naqaisaua saua' dos 'ipa 'olívos qataxa saua' dos coỹadáxanaqtel 'me qoỹanétra'ña ga' néta'ña jiñi'me lasoxola' ỹima jen'me huetalégue jen' 'aléua. 5Da' 'uootaxa 'uo ga' sétaaque da' n'áxa't, qana'chi jesaa'me ỹañoxo't da' necosadee'gue na' dóle', qana'chi ỹátaqta nemachíchiiñi da' ỹavíỹaxa't ỹima so' nep'aguénaxau'pi. Naqaida da' nalaataguec da' 'uootaxa 'uo ga' sétaaque da' n'áxa't jesaa'me. 6Qá'a jesaa'me n'aqtáxanaxanqa 'uo da' l'añaxa'j, da' qaidi ỹapadídiỹi di' piỹem da' qaỹa 'te huétep 'uootaxa maliaxa ỹ'axátet'ape naua' l'aqtaqa ñi' Dios. Qataxa nataq'en 'uo da' l'añaxa'j da' taỹá'a qa'en jen' noxop jan' netauo', qataxa da' ỹauóte da' ne'queténaxac ỹima jen'me huetalégue jen' 'aléua, da' ni'quichínỹi qa'en na' ỹodapecachi na' lapite'na. Ỹátaqta mai'chi ỹoiquíitrac da' v'iỹílaqtalóo'te ga' ỹ'eteque na' siỹaxadipi. 7Qaláxasa qomle ma'le ỹima't na' ỹ'étetracpi, qana'chi so' síiỹac 'me chiỹaqá'ña so' lapónaqa' jen' napa'lpi, jeso'me ỹilóiquiaxa'n jesaa'me. Ỹim, qana'chi loxonaqa, qana'chi ỹalaa't. 8Qana'chi da' ló'oquiaxa'j jesaa'me qoỹachítra'nỹi na' laiñi so' naq'aic jidi'me let'ádaic noic 'me huá'ña joca'li qoỹitouoxolégue so' 'ipaq so' qadesaliaxanec, jidi'me 'chi qoỹimatá'ac da' lenaxat Sodoma qataxa Egipto. 9Ỹóvi' qomle gaua' tres noloqo'te qataxa ga' laiñi ga' nolo' laqáỹa da' ỹic'atéetac da' ló'oquiaxa'j jesaa'me jen' ỹodapecachi siỹaxadipi 'me ỹodapecachi na' l'aqtacpi. Sa 'te qomle da' ỹasen da' qoỹisiidíñi. 10Ỹima qomle jen'me siỹaxadipi 'me huetalégue jen' 'aléua ỹátaqta netóotapeeque da' nalaatague'j jesaa'me. Qana'chi ỹasouaxat dójo' netónaxac, qana'chi ñi' 'oonolec ỹamaxa ga' 'chi neme qa'en ga' laqáỹa. Qá'a saua' dos l'aqtáxanaxanqa ñi' Dios, jesaa'me ỹátaqta 'uo qa'en da' ne'queténaxac na' siỹaxadipi. 11Qaláxasa qomle ỹinoxodéegue gaua' tres noloqo'te qataxa ga' laiñi ga' nolo' laqáỹa, qana'chi ñi' Dios ỹitaxa nec'alaxatréegue, qana'chi ỹitaxa nec'aldéegue. Qana'chi ỹima jen' ỹauaachiilo jesaa'me 'uo da' loqolánaxa. 12Ỹim, qana'chi saua' dos n'aqtáxanaxanqa, jesaa'me demachíta so' let'ádaic naviliỹáxac chimaqpecot di' piỹem, 'eet'oi:

—'Auanaisée'ma jénjo' p'áseguem.

Qana'chi jesaa'me tategue da' piỹem, quétraaue so' ló'oc. Jen'me lauteu'pi jesaa'me qana'chi ỹauaachiilo. 13Huá'a, qana'chi 'uo so' n'iquiaxa, qana'chi noláiñi ñi' 'oonolec na' diez 'emecpi jeso'me noic let'ádaic. Ỹóvi' na' siete mil so' ỹileu ỹasouaxat jeso'me n'iquiaxa let'ádaic. Jen' n'iỹóxot so' siỹaxadipi ỹátaqta 'uo da' loqolánaxa, qana'chi ỹi'ỹoxodéetac ñi' Dios 'me net'ague da' piỹem.

14Qana'chi ỹinoxonéegue jeso'me niỹaqa'aguet sa naỹamaxa, qaláxasa sa huaỹáloq da' nóvi' ga' laqáỹa 'me p'áteegue naua' tres.

Jaso' p'áteegue saua' siete naseedel

15Qana'chi so' p'áteegue saua' siete namaxa's, jeso'me ỹasiidíỹi jaso' laseede. Qana'chi qodemachíỹa so' ỹisam naviliỹáxacpi 'me chimaqpecot di' piỹem, 'eet'oi:

Da' l'onataxanaxac jen' net'alpi 'me ỹilot'ague jen'me huetalégue jen' 'aléua,

jeda'me naỹi lalémaxaset ñi' qadasoxola' qataxa jeso'me namaq net'a qadec'alaxaqui;

qana'chi jiñi'me qaỹa 'te loiquiaqa' naỹi da' ỹilo'ogue ỹima jen'me.

16Qana'chi jeso'me veinticuatro nasoxonecpi 'me nes'óotanỹi jaso' s'ónaxaqui dasóta'uo ga' nes'ónaqa' ñi' Dios, jeso'me ỹisóidiñi naua' liliictel ỹátaqta ỹivídaxatet'aguet na' latap jen' 'aléua. Qana'chi qoỹi'ỹoxoden ñi' Dios, 17qoỹíitojo':

'Am qantamnaxala' 'me qaỹa 'te ga' 'auqalánaac,

'am 'me na'chi 'eeta't da' 'am 'uo,

qataxa na'chi'am 'me 'au'onataxáatac naỹi, qataxa 'auanat'aquéna,

'am ñitónaqtapeec,

qá'a 'am 'au'euóxona jeda'me qaỹa 'te 'ená'am 'ad'añaxac,

qaidi 'aulo'ogue ỹima jen'me huetalégue jen' 'aléua.

18Jen'me ỹodapecachi siỹaxadipi ỹátaqta dalemata,

qaláxasa ma'le ỹivíta di' lalóqo' da' 'am 'aua'uo ga' ne'uaxánaguec jen'me.

Qataxa nataq'en ma'le ỹivíta di' lalóqo' da' 'am 'animit ỹima jen' napa'lpi,

qataxa da' 'aua'uo ga' neseetenataguec jen' 'adamaxa'spi 'me ỹ'axátet'ape naua' 'ad'aqtaqa,

qataxa jen'me nañanguet da' 'am 'equegue, qataxa jen' 'am ỹi'ỹoxodéetac,

temaqaidi da' 'uootaxa ỹ'oxodaic, 'uootaxa ga' sa ỹ'oxodaq.

Qataxa nataq'en ma'le ỹivíta di' lalóqo'

da' 'am 'auoláxachiỹi jen'me noláxatetapiiñi ỹima jen'me huetalégue jen' 'aléua.

19Huá'a, qana'chi qoỹ'ouáteuo so' tamnaxaqui lalémaxaset ñi' Dios 'me net'ague da' piỹem. Qana'chi ỹátaqta di'ỹoqóta jaso' lai't saua' diez laqátaxaco ñi' Dios. Qana'chi 'uo so' naqasélgaxa, nesamaxa, qataxa so' nalimáxa qataxa so' n'iquiaxa qataxa jaso' lachi lat'édai.

Currently Selected:

Apocalipsis 11: PLGNT93

Highlight

Copy

Compare