Filipenses 4
4
Na'chi 'eeta't qomle da' 'antóñiitapeec so' qadesaliaxanec
1Chan'eesa 'ami ñauotaxa'u ỹaqáỹa', jaỹim ỹátaqta 'uo da' ỹidiáxa da' 'ami ñauaa'to, qá'a 'ami 'me na'chi'ami 'av'íchii da' ñitónaxac qataxa 'ami ỹi'ỹoxodaqa'te. Na'chi 'eeta't qomle da' 'oquíitapegue' so' qadesaliaxanec, 'ami ñauotaxa'u.
2'Uo da' senaac jaga' Evodia qataxa jaga' Síntique da' gaa'me n'óota da' sa 'te nautena't. Qá'a gaa'me sóxote huédaaue da' naqaỹaỹáxac 'me chiỹoqo'ot so' qadesaliaxanec. 3Qataxa 'am ỹ'onataxanaxaua 'me sa 'am ỹoxóỹi, 'am senapéga da' 'alcochiỹalo qomle gaa'me qad'amaqténataxanaxa'u, qá'a gaa'me ỹátaqta jalcote da' jaỹim lecochítrapega da' s'axátaqtac da' nec'alaxa, nataq'en ga' Clemente qataxa na'me ỹ'onataxanaxau'pi laỹi. Ñi' Dios sóxote ỹidelégue jaga'me nedáxalate jen'me lenaxatpi na' nec'alaqtacpi.
4Ỹátaqta 'antóñiit'ac qomle so' qadesaliaxanec ỹiméda naua' noloqo'te. S'iỹílaxatetañi da'me senaac da' ỹátaqta 'antóñiit'a't. 5Qaa'le ỹima qomle na' siỹaxadipi ỹátaqta 'ami ỹaatetóote' da' 'ami huotaxanaqtáqaiqa. Qá'a so' qadesaliaxanec sóxote sa 'te qaỹáaque ga' livídaxac.
6Qataxa qaỹa 'te ga' 'ami ỹaquicoqtet'ape qomle. Jaldáta da' ỹátaqta ỹima 'au'axáchiim ñi' Dios da' ỹivíta da' 'antamñiiỹot. 'Aviỹáxañiiỹot ñi'me, nataq'en 'auañiitapecot da' 'antónaxaquii. 7Qaidi ñi' Dios 'ami ỹanema da' l'emáxac 'me ỹátaqta napacalégue ga' ỹañoxot da' ỹaỹáten ga' siỹaxaua. Qana'chi dójo' n'emáxac, jeda'me letelaqtel naua' 'adiquidiaqtéldii' da' 'ansóquiita'uo so' Cristo Jesús.
'Auloit'egue da' lasoxoc ga' ỹiỹamqáchiiñi
8'Ami ỹaqáỹa', da' laqáỹa 'enaac: ỹátaqta 'auloit'egue qomle da' lasoxoc ga'me ỹátaqta 'eesa, qataxa ỹima jen'me tasa'aguet da' 'uo da' 'enec qoỹin, qataxa ga'me 'ónaxaic nasoxoc, qataxa ga'me qaỹa 'te lale'gue, qataxa ỹima ga'me qoniỹamaxadíichiỹi, qataxa ga'me n'aqtaguec 'me 'ónaxaic. Qataxa 'auloit'eguet ỹima jen'me ỹí'et da' ỹiỹamqáchiiñi, qataxa ga'me taiỹet da' ni'ỹoxodénataguec.
9Qataxa ỹátaqta 'av'íchii qomle ỹima jen'me 'ami sapaxaguenque, qataxa jen'me ỹaqátaxacpi 'me 'ami sanema, qataxa jen'me ỹ'aqtacpi 'me 'amachíichiỹi, qataxa jen'me sé'etpi 'me 'auauañíichiỹi. Naqáina 'av'íchii qomle. Qana'chi ñi'me Dios 'me chiỹoqo'ot da' n'emáxac 'ami huetaavlo qomle.
Jaso' lecochaxanaqte so' Filipos lé'ecpi 'me ỹamaxa so' Pablo
10Jaỹim ỹátaqta jalcote da' ỹamaic so' qadesaliaxanec, qá'a ỹasouaxat da' 'oñíita da' ỹitaxa jaỹim 'aueenachíiỹa. Jaỹim sa 'te taa'le séetapega 'aupeteláqaiỹet, qaláxasa 'chi qaỹa 'te ga' 'adedáqadii da' jaỹim 'alcochíiỹa. 11Sa 'te da' ỹ'aqtac dójo' qá'a jaỹim 'uo ga' seuéetaaque. Qá'a jaỹim saỹáten da' ñitóotapeec ga'me 'uo. 12Jaỹim ñaỹá'ac da' souétanỹi da' ỹiuénaxanaxa, qataxa ñaỹá'ac da' souétanỹi da' qaỹa 'te ga' seuéetaaque. Qataxa jaỹim saỹáten da' souápiỹi gamachaqaiga, temaqaidi da' nanodáxa, 'uootaxa noqouáxa, 'uootaxa da' qaỹa 'te ga' hue, 'uootaxa da' novic. 13Jaỹim saqanatet ỹima jen' chaqáina, qá'a so' Cristo naqaiso jaỹim ỹanem da' ỹ'añaxac. 14Qaláxasa 'ami ỹátaqta ỹiỹamqáchiiñi da' jaỹim 'alcochíiỹa ỹasouaxat da' ỹovic.
15Qataxa 'ami 'me Filipos lase', nataq'en 'auaỹáchiñiita ca'li ỹímta da' s'axat da' n'aqtac 'me nec'alaxaqui, ca'li secá'ai di' Macedonia, qaa'le na'chi'amíite' ỹima na' 'amaqténataxanaxaicpi da' jaỹim 'anamaqáiỹa jaso' 'adecochaxanaqchii, qá'a 'antóñiitapeec da' 'ami ñoq'oỹa'que da' 'ami sapaxague'n. 16Qá'a jaỹim ca'li maliaxa souét'a di' Tesalónica, qana'chi jaỹim 'anamaqáitapega jan' 'ad'ágaxanaqchii, qá'a 'uo da' ỹovic. 17Qaláxasa jaỹim sa naqaida da' 'uo da' ỹiuénaxanaxa da' qaidi saconeguet jaga' n'ágaxanaqte, jaldáta da' jaỹim sétaaque da' nichíctaseguem da' 'ad'onataxanaxaquii, da' qaidi 'ami Dios ỹiseete'n qomle. 18Qá'a jaỹim sóxote da' saconeguet da' ñiméỹaxac, da'me ỹátaqta 'aliidaq. Qá'a jaso'me jaỹim 'anamaqáiỹa 'me jaỹim nedá'a so' Epafrodito, jaso'me ỹátaqta nalalégue jen' ỹiuenecpi. Jaso'me 'ad'ágaxanaqchii, jaso'me 'ená'am ga' nichínataxanaxat jama na' laita 'me qoỹic'oi da' qoỹanot ñi' Dios, ỹátaqta ỹiỹamaxaden ñi'me. 19Ñi'me ỹit'a Dios 'ami ỹanema ỹima qomle jen'me 'avíñiitaaque da' ỹachiỹoxochíchiỹi da'me qaỹa 'te 'ená'am li'ỹoxodic nesaliaxa 'me huet'ot qa'en so' Cristo Jesús. 20¡Ñi'me qadet'a Dios ỹátaqta na'chi 'eeta't qomle da' ni'ỹoxodénataguec! Já'a, na'chi naq'áita dójo'.
Da' p'áteegue nip'iỹénataxanaxac
21'Ami 'me 'oquíitapegue' so' Jesucristo, 'auañimii qomle da' ỹip'iỹénataxanaxac ỹima na'me lalémaxasetpi ñi' Dios. Qataxa jen'me qadaỹi 'me jaỹim huet'asop, nataq'en 'ami ỹip'iỹéet'ape. 22Nataq'en 'ami ỹamaxalo da' lip'iỹénataxanaxac ỹima jen'me huet'éna 'me lalémaxasetpi ñi' Dios. Qataxa ỹátaqta jalcote da' lip'iỹénataxanaxac jen'me nesoxonaqapi ñi'me let'a na' net'alpi 'me Roma lé'ec.
23So' qadesaliaxanec Jesucristo 'ami ỹanema qomle da' liỹálaqtaxanaxac. Já'a, na'chi naq'áita dójo'.
Currently Selected:
Filipenses 4: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.