Lucas 24
24
So' Jesús nec'aliséguem qoỹin
(Mateo 28.1-10; Marcos 16.1-8; Juan 20.1-10)
1Joca'li maliaxa néte'ta so' 'uáuapiiñi saua' noloqo'te, qana'chi jeso'me ỹauodipi ỹic'átee'ga jaso' napa'lai't, qoỹachítac jeso'me codáxaqui 'me qoỹaqátaxata't. Qataxa 'uo so' laỹi ỹauodipi qonáictapegue'. 2Joca'li qoỹivídee'ga jaso'me, qana'chi qoỹilalégue jeso' qa' 'me lapadénaxat da' sa huéta'ña jeso' qoỹachá'ña joca'li. 3Qana'chi qoỹinoxonóoue jaso'me, qaláxasa sa 'te da' qonata ga' ló'oquiaxac so' qadesaliaxanec Jesús. 4Qana'chi ỹátaqta 'uo da' loqolánaqa' jesaa'me, qataxa sa ỹaỹáte'n ga' 'éet'eque joca'li qoỹila'alo jesaa'me dos siỹaxa'u nichaatétrañi, huaqát'aita jesaa'me. Saua' louo ỹátaqta ỹaqasélquet'ape. 5Qana'chi jesaa'me ỹauo' ỹisóidiñi naua' liliictel, qana'chi ỹátaqta ỹivídaxatr'aguet qa'e'n na' 'aléua naua' lata'pi ỹasouaxat da' loqolánaqa'. Qana'chi jesaa'me siỹaxa'u 'enapega'to':
—¿Tóoqo'chi 'anmichíitapiỹi na' napa'lpi da' 'anmichíitaaque jeso'me nec'alétaiỹi? 6Sa huét'a jénjo' jeso'me, qá'a ma'le nec'aliséguem qoỹin. 'Aueenachíiỹa da' l'aqtac joca'li huét'a di' Galilea, 'eet'oi: 7“Jen'me siỹaxaua lec'óxot qoỹanóoue qomle na' 'itaxalóxoicpi, qaidi qoỹanaséguem, qaláxasa qomle ma'le ỹivitalo gaua' tres noloqo'te, qana'chi nec'aliséguem qoỹin.”
8Qana'chi jesaa'me ỹauo' táchiilo lai'li da' l'aqtac joca'li so' Jesús. 9Joca'li chiỹoqotrelégue jaso' napa'lai't da' v'iỹílaxadeuo, qana'chi joca'li ỹivídedeuo, qana'chi ỹ'axátrooue ỹima dójo' saua' once namaxa's, nataq'en ỹima so' laỹi. 10Jesaa'me 'me ỹidóde'uo da'me naquiáxanaxa'j saua' once namaxa's, na'chaso jaso' María 'me Magdala lase, qataxa jaso' Juana, qataxa jaso' María 'me lat'e so' Jacobo, qataxa so' laỹi ỹauodipi. 11Qaláxasa jesaa'me namaxa's 'éet'edem da' 'chi naỹáquiaxac da' ỹ'axátetrac jesaa'me ỹauo', qana'chi sa ỹ'amaqte'n.
12Huá'a so' Pedro, qana'chi ỹacháxañi da' dec'atenaxanée'ga jaso' napa'lai't. Qana'chi joca'li ỹiloỹínỹi so' lauel jaso'me, qana'chi ỹisamaq so' huáloq pagaxaic huéta'uo so' lai jaso'me napa'lai't. Ỹim, qana'chi v'iỹílaxa'uo ga' l'acháqa', ỹátaqta 'uo da' ỹ'aalá'ac da'me qodíuapiỹi.
So' Jesús naloxon joca'li huá'nỹi so' naq'aic 'me ỹilót'a so' noicolec Emaús
(Marcos 16.12-13)
13Qana'chiso jeso' nolo', dos jeso'me lapaxaguenatacpi so' Jesús taida'ague so' noic, lenaxat Emaús, 'uo ga' once kilómetros da' qochiỹoqóte'uo di' Jerusalén. 14Qana'chi joca'li quéte' jesaa'me, qana'chi neséetrapiỹi ỹima da'me qodíuapiỹi. 15Joca'li neséetapega't qataxa nec'onaxaatapega't, qana'chi so' Jesús ỹic'átaỹilo jesaa'me, qana'chi náictapee'to. 16Temaqaidi da' ỹilotr'ot jeso'me, qaláxasa 'uo jeso'me 'en sa ỹaateto'n jeso'me. 17Qana'chi so' Jesús ỹinatét'ape jesaa'me, 'enaaco':
—¿Jái'chi ga'me 'anec'onaxañíitapiỹi ga'me huá'nỹi na' naq'aic? qataxa ¿tóoqo'chi da' 'auaquicóita?
18Qana'chi so' 'oonolec jesaa'me, lenaxat Cleofas, ỹ'at, 'enaaco':
—Ỹima na'me siỹaxadipi 'me huét'a na' Jerusalén qaỹa ga' sa ỹaỹáten da' qodíuapiỹi jesaa'me noloqo'te. ¿Na'chi'ameto' da' 'onéta'ña di'me da' sa 'auaỹáten dójo'?
19Qana'chi jeso'me 'enaaco':
—¿Jái'chogamaxa?
Qana'chi jesaa'me 'enapega'salo':
—Qá'a jeda'me huápiỹi so' Jesús 'me Nazaret lé'ec, jeso'me l'aqtáxanaxanec ñi' Dios. Jeso'me siỹaxaua qaỹa ga' ỹaqalánaac ga'me l'aqtac qataxa jega'me ỹí'et, ỹima na' siỹaxadipi. 20Qaláxasa jen'me lasoxola'pi na' netaxaỹáxanaxanecpi da' qodetaxaỹapégue' ñi' Dios qataxa jen'me mai'chi qadet'alpi qoỹaneuó'o jeso'me da' nalaataguec qataxa da' qoỹanaséguem. 21Qaláxasa qo'mi 'uo da' qanaquitaxac da' na'chiso jeso'me 'me nec'alaxatéegue qomle na' lec'oqtepi so' Israel. Qana'chi naỹi ma'le ỹinoxodéegue naua' tres noloqo'te da' qodíuaiỹi dójo'. 22Ỹátaqta 'eesa da' huo'oi saua' ỹauo' da' qo'mi huetaavlo da' qo'mi ỹoqolanaqte't, qá'a so' maliaxa qaỹat'aguet so' néte', qana'chi ỹic'átree'ga jaso' napa'lai't. 23Qana'chi joca'li sa qoỹauana so' ló'oquiaxac jeso'me, qana'chi v'iỹílaxadeuo da' ỹ'axátetrac da' lauanáxanaxa'j joca'li ỹila'alo saua' namaxa's piỹem lase' ỹ'axátetrac so' Jesús da' sóxote nec'aliséguem. 24Ỹim, qana'chi jéque' jesaa'me mai'chi qadiquiáxa'u da' dec'atenaxadée'ga jaso' napa'lai't. Qana'chi joca'li ỹivídedee'ga, qana'chi ỹilódapiinỹi da' cochíchiỹi. Ỹipaquíchiỹi da'me l'aqtaxanaxa'j saua' ỹauo', qaláxasa sa qoỹilá'a ga' Jesús.
25Qana'chi so' Jesús 'enaaco':
—¡Ỹátaqta qaỹo' ga' 'auaỹáchiñiỹaac 'ami, qataxa ỹáloxosa da' 'au'amaqchíñii ỹima na' l'aqtaxanaxacpi so' l'aqtáxanaxanecpi ñi' Dios! 26¿Séetapega sa 'auaỹáchiñiỹo' jogamaxa net'a nec'alaxaqui da' 'uáiñi qomle da' 'uo da' ne'queténaxac qomle sonaliaxa da' ỹinoxoneuó'o ga' li'ỹoxodic?
27Ỹim, qana'chi ỹ'axatema jesaa'me ỹima jen'me n'aqtaguec jeso'me jenaa'me nedétrañi naua' nidii's l'aqtaqa ñi' Dios, ỹachiỹoxotráaue jaso' 'uáichiiñi lidíise so' Moisés, ỹivídaxate'ta jaso'me p'áteegue lidíise jeso'me l'aqtáxanaxanecpi ñi' Dios.
28Joca'li ỹivíded'a jeso'me noic 'me taidá'a, qana'chi so' Jesús ỹadénaxat da' sega'me na'chi lácaiỹi da' quéta. 29Qaláxasa ỹátaqta qoỹipaquétapega jeso'me da' na'chi huai'ndi. Qana'chi qoỹiitapeco', qoỹinaaco':
—Ỹa qo'mi 'oua'asopa. Péga, sóxote ma'le jávit, qataxa ỹamtaa'le pí'ỹaq.
Qana'chi so' Jesús coo'uelo jesaa'me da' hua'asopa. 30Qana'chi joca'li ma'le nétai'nsopa jesaa'me da' dasotralégue so' niqui'ỹáxala', qana'chi jeso'me ỹacona jaso' pan da' netameelégue. Ỹimat, qana'chi ỹanoovlo jesaa'me. 31Huá'a, qana'chi jesaa'me sega'me da' qoỹ'ouáchiilo naua' l'ai'te, qana'chi ỹímta ỹaateto'n jeso'me, qana'chi jeso'me na'chi pal. 32Qana'chi jesaa'me detaqátapega't, 'enapega'to':
—¡Qa'chi ỹátaqta 'eesa ca'li da' sega'me dato'm naua' qadiquidiaqtel, da' ñanaguénaqat'ague na' naq'aic, da' qo'mi ỹ'axátetapeema naua' nidii's l'aqtaqa ñi' Dios!
33Huá'a, qana'chi qaỹa ga' ỹiuatrá'a jesaa'me, qana'chi jéque' da' v'iỹílaxategue da' Jerusalén. Huá'a, qana'chi nauáa'te' so' once namaxa'spi qataxa ỹima so' laỹi. 34Qana'chi qod'aqtaxaatapeema jesaa'me doosolqa, qoỹiit'oi:
—Ỹátaqta 'eesa da' ỹitaxa nec'aliséguem qoỹin so' qadesaliaxanec, qataxa so' Simón ma'le nauá'ne'.
35Qana'chi jesaa'me dos nataq'en d'aqtaxaat'ape, ỹ'axátetrac da' 'éete' da' huédapiỹi joca'li quetr'ague so' naq'aic, qataxa da' 'éete' joca'li ỹaatetoodelégue so' Jesús joca'li ỹicolaxatétapiỹi jaso' pan.
So' Jesús naloxóna so' lapaxaguenatacpi
(Mateo 28.16-20; Marcos 16.14-18; Juan 20.19-23)
36Joca'li maliaxa qonséetapiỹi dójo', joca'li so' Jesús nichaachíchiinỹi na' laiñi jeso'me dasot'a't. Qana'chi ỹip'iỹen, 'enaaco':
—Ỹátaqta 'uo da' 'ad'emáxaqui qomle.
37Qana'chi so' napaxaguenatacpi ỹátaqta dó'i, jalcote da' loqolánaxa, ỹasouaxat da' 'éetapega da' 'chi nepaqal ga' qoỹilo'ot. 38Qaláxasa so' Jesús 'enaaco':
—¿Tóoqo'chi 'ad'óiỹi? qataxa ¿tá'nooqo'chi da' 'uo da' loqolguétaxanaxa'j naua' 'adiquidiaqtéldii'? 39Ỹa 'auc'achiñii' naua' ỹoua' qataxa naua' ỹapia'te. Ỹa jaỹim 'auasélii'uo qataxa jaỹim 'auc'achiñii, qá'a jega'me niquí'i qaỹa 'te lapat qataxa gaua' lip'ináqa, qataxa sa 'te da' 'éeta naỹi da' jaỹim 'auloit'ot.
40Joca'li 'enaac dójo', qana'chi ỹaloxo'n saua' loua' qataxa saua' lapia'te. 41Qaláxasa so' lapaxaguenatacpi sonaliaxa da' ỹ'amaqten dójo' ỹasouaxat da' netónaxac qataxa da' ỹ'aaláta. Qana'chi so' Jesús 'enaaco':
—¿Séetapega 'uo ga' 'aualíquii jénjo'?
42Qana'chi qoỹanem so' lai so' níỹaq nauoc qataxa so' lenoc so' co'naỹáxa pólio'. 43Qana'chi jeso'me ỹaconeeta. Qana'chi ỹalict'ape, ỹauanáxanaqtet so' laỹi. 44Qana'chi joca'li ỹim, qana'chi 'enapego' so' lapaxaguenatacpi, 'enaaco':
—Dójo' souápiỹi, na'chida da'me s'axátetac joca'li maliaxa 'ami souetaavlo: da' ỹipaquíchiỹi qomle ỹima na' ñ'aqtaguecpi 'me ỹ'axat jen'me naqátaxacpi 'me ỹidíñi jocalia'chi so' Moisés qataxa jen'me lidíisec jeso'me l'aqtáxanaxanecpi ñi' Dios qataxa na' nidíisecpi lenaxat Nalacpi.
45Huá'a, qana'chi ỹanem so' lapaxaguenatacpi da' ỹaỹátenaxanaxanque naua' nidii's l'aqtaqa ñi' Dios. 46Qana'chi 'enaaco':
—Jeda'me nedétañi ỹ'axat ga' net'a 'me nec'alaxaqui da' 'uáiñi qomle da' qoỹalaat. Qomle ỹinoxodéegue gaua' tres noloqo'te, qana'chi nec'aliséguem qoỹin. 47Qana'chi jedójo' lenaxat naqaida qomle da' qoỹ'axátooue na' ỹodapecachi siỹaxadipi, qataxa qoỹinapéga ỹima na' siỹaxadipi da' ỹigue'm naua' loico, tetoqo' naua' loico qoỹapalaxa't. Qana'chi qochiỹoqóchii'ña qomle na' Jerusalén. 48Qana'chi 'ami qomle 'me 'au'axáchii ỹima dójo' 'adauanáxanaxaqui. 49Jaỹim qomle 'ami ñamaxalo jega'me ỹaloxóotac josii'chi jiñi'me ỹit'a. Qaláxasa na'chi 'ovíit'a qomle na' noic let'ádaic Jerusalén, tetoqo' qomle ma'le 'auacoñiiỹet jega'me n'añaxac 'me chiỹoxogue da' piỹem.
So' Jesús taiỹi da' piỹem
(Marcos 16.19-20)
50Joca'li so' Jesús cá'ai 'en so' Jerusalén so' lapaxaguenatacpi da' ỹauéguee'ga di' noic Betania. Ỹimat, qana'chi nodídiseguem saua' loua' da' ỹanem da' nichoxodénataguec jeso'me. 51Qana'chi joca'li ma'le ỹanem da' nichoxodénataguec jeso'me, qana'chi cá'ai so' lapaxaguenatacpi da' qoỹaueegue da' piỹem. 52Qana'chi so' napaxaguenatacpi joca'li ỹimat da' netameetapecot jeso'me, qana'chi v'iỹílaxague da' Jerusalén, ỹátaqta jalcote da' lamaic. 53Qana'chi 'eeta't da' huétaaue jeso' tamnaxaqui let'ádaic da' ỹi'ỹoxodéetac ñi' Dios. Já'a, na'chi naq'áita da'me dójo'.
Currently Selected:
Lucas 24: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.