Santiago 4
4
Da' qonauó'te' jen' noqopi'chi 'me huetalquéna
1¿Jái'chogamaxa hua'ague ga' chiỹoxogue da' p'aguenaxac qataxa da' nelóiquiaxac da' 'oñíita? ¿Sa naqaidoodamaxa chiỹaqaỹi da' loqopi'chi jen' 'adapáchiỹaxaquii 'me deloictapega't, nichaatétaỹi ñi' 'oonolec da' 'oñíita? 2'Ami da' 'uo ga' 'auauóitaaque, qaláxasa da' sa 'auañoxochii da' 'uo, qana'chi 'aualaataxañii. Qataxa 'apichiiỹá'a ga' ỹaqá'a, qaláxasa sa 'auañoxochii da' 'anaqachíiñi, qana'chi 'ap'aguénataxañii qataxa 'aulóiquiaxanataxañii. Sa 'anaqachíiñi ga' 'auauóitaaque, qá'a sa 'aviỹaxañiỹot ñi' Dios. 3Qataxa da' 'uo ga' 'aviỹáxañiỹaaque, qana'chi sa 'auacoñiiỹet, qá'a ỹasouaxat da' sa ỹiỹamaxañi da' 'adiỹáxanaxaquii. Qá'a ỹasouaxat da' 'ansíitaaque da' 'chi taiỹi 'aviñii da' 'adoqopitaxadíqui. 4¡'Ami 'me 'axañíiñi da' 'adoqopi'chi ñi' Dios! ¿'Ami sa 'auaỹáchiñiỹodamaxa ga' siỹaxaua da' nauó'te' jen' noqopi'chi 'me huetalégue jen' 'aléua, qana'chi jega'me sega'me nep'aguénaxaua ñi' Dios? Ga' ỹiỹíit'a da' nauó'te' jen' noqopi'chi 'me huetalégue jen' 'aléua, jega'me siỹaxaua ỹátaqta nep'agué'ne' ñi' Dios. 5Chan'eesa sa ỹisamaxasáỹi da' 'enapega't naua' nidii's n'aqtaqa, 'eet'oi: “So' Espíritu Santo 'me qo'mi ỹanaỹilo ñi' Dios, jeso'me qo'mi ỹauoteque qataxa sega'me qo'mi ỹic'altalóo'te.” 6Qaláxasa ñi'me Dios ỹágueegue da' lichoxodénataxanaxac da' qo'mi lecochiỹalo. Qá'a jánjo' nidíise 'eet'oi: “Ñi' Dios nichaata'aguet ga' ỹ'oxodénaxaic, qaláxasa ỹichoxoden da' lecochiỹa ga' ỹátaqta sa ni'ỹoxoden.” 7Chan'eesa ỹátaqta 'anañiiỹot da' 'auasoilégue ñi' Dios. Qataxa 'anichaachiỹa'aguet so' qadó'o paiỹac, qana'chi jeso'me 'ami dasoi'ỹima. 8'Anchiquiỹot ñi' Dios, qana'chi jiñi'me sa 'ami ỹiỹotapiỹi. 'Ami loicoló'olpi, 'axañíiñi da' 'auacoñíiỹi ga' sa nó'in. 'Ami 'me sétaaque da' 'adoqopichíiỹa ñi'me Dios qataxa nataq'en na' huetalégue jen' 'aléua, ja'ñi, 'aviñii ỹoqovíte' qomle naua' 'adiquidiaqtéldii'. 9Ỹátaqta 'auaquicóita qataxa 'anoiñíitac qataxa 'an'alqáitañi. Sa 'alasáxañiitac, na'chidáta da' netétrañi naua' 'adáchidii'. Qataxa sa 'ami 'te madet'ape, na'chidáta da' 'auaquicóita. 10Sa 'ani'ỹoxodíñiit'ot ñi' qadasoxola' Dios, qaidi jiñi'me 'ami neuaaỹaxadíseguem da' 'ami ỹi'ỹoxode'n.
'Uootaxa qoỹáatapiỹi ga' loic ga' naqáỹa
11'Ami ỹaqáỹa', qaỹo' qomle ga' 'éetapega ga' laqáỹa. Qá'a ga' 'éetapega ga' laqáỹa, 'uootaxa ỹáatapiỹi ga' loic, jega'me sega'me 'éetapega jen' laqátaxacpi ñi' Dios qataxa napacapeelégue. Qataxa da' qonét'ac dójo', da' 'auéetapega jen' naqátaxacpi, qana'chi 'auená'am ga' nimit jen' janoicpi, qana'chi sa 'aualaxalégue jen' naqátaxacpi. 12Qaláxasa 'oonolec jiñi'me ỹan jen' laqátaxacpi, qataxa naqaiñi jiñi'me nimit jen' jaloicpi na' siỹaxadipi. Naqaiñi jiñi'me dec'alaqtaxan 'uootaxa dolaqtaxan. Qaama'te 'am, ¿jái'chi 'amóona da' 'anmit ga' loic ga' 'adaqáỹa?
Sa qoỹaỹáten ga' huáaue ga' nolo' laqáỹa
13Naỹi 'anaquiáxañiỹa jeda'me senaac. 'Ami 'me 'oñíỹaac naale da' 'ad'aqtaquii: “Jen' nolo' 'uootaxa qomle ỹ'oxoñi, saxague di' noic let'ádaic, 'uootaxa di' laqáỹa. Qomle sevítaxa, qana'chi souqát'a ga' 'oonolec huó'e. Qana'chi ñiuodénaqaaque ga' qademenec, tetoqo' ñauégaq jaga' laicaua.” 14¿Sa taỹapiilo' naua' 'adai'lídii' da' sa 'auaỹáchiñii ga' huáaue ga' nolo' laqáỹa? Qá'a ¿jái'chogamaxa ga' 'ená'am da' l'óiỹaxac ga' siỹaxaua? Séetapega 'ená'am jen' si'vi da' cada'acolec di'ỹoqóta, copát'a, qataxa pal. 15Da' 'ad'aqtaquii toqo' da' 'eet'oi: “Da' naqaida da' ỹiỹamaxaden ñi' qadasoxola' Dios, qana'chi ñichaataqátaaue da' s'étaq dójo' 'uootaxa dójo' laqáỹa.” 16Qaláxasa 'ami ỹátaqta ỹ'oxodénaxaiqa naua' 'adetaxaỹaxacódii'. Ỹima dójo' ỹ'oxodénaxac ỹátaqta sa ỹiỹamaxañi. 17Chan'eesa ga' siỹaxaua da' ỹaỹáten ga' ỹiỹamqáchiiñi, qaláxasa sa ỹí'et, qana'chi 'uo da' lasouaxac.
Currently Selected:
Santiago 4: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
