Hebreos 8
8
So' Jesús naqaiso so' qo'mi detaqatapeelóo'te naỹi jeda'me dálaxaic ỹamaxataxac
1Naqaida da' ỹátaqta ỹágueegue da' sequet'oto da' s'axátetac, 'eet'oi: Naqaida da' 'éeta da' lasoxoc jeso'me 'oonolec qadetaxaỹáxanaxanec. Naỹi jeso'me net'ague da' loic ñi' Dios 'me net'ague da' piỹem. 2Qataxa jeso'me na'chiso so' netaxaỹáxanaxanec da' qodetaxaỹapégue' ñi' Dios jega'me ỹátaqta l'emec jiñi'me di' piỹem, jega'me 'emec 'me mai'chi l'onatac ñi' qadasoxola', sa l'onatac ga' 'chi siỹaxaua. 3Ỹima jen'me lasoxola'pi jen' netaxaỹáxanaxanecpi, jen'me qoỹidéuo, da' qaidi ỹáatapeeuo jen' nachítaqtaxanaqte qataxa jen' qoỹaneuo da' qoỹigóoue. Chan'eesa so' Jesucristo, jeso'me nataq'en ỹiuen da' ỹa'uo jaga' ỹaneuo lachítaqtaxanaqte. 4Jeso'me da' maliaxa huét'a toqo' jen' 'aléua, qana'chi sa netaxaỹáxanaxanec, qá'a maliaxa 'uo jen' netaxaỹáxanaxanecpi 'me ỹáatapeeuo jan' nachítaqtaxanaqte 'me damaxasoxolégue joca'li so' Moisés. 5Qaláxasa jen'me netaxaỹáxanaxanecpi dójo' l'onataxanaxac, jeda'me 'ená'am da' 'chi liquí'i qataxa lepaqal ga'me huet'ague da' piỹem. Qá'a saỹátenaq da' 'chi niquí'i, qá'a joca'li sétaaque da' ỹí'et so' Moisés so' l'emec ñi' Dios, qaa'le jiñi'me 'enapego' jeso'me, 'enaaco': 'Aulóchiỹi qomle da' lasoxoc qataxa 'auadénaxachichiỹi da' n'onataguec so' 'am saloxóna joca'li huá'ña ñi' qasoxonaxa Sinaí.
6Qaláxasa jeso'me 'oonolec qadetaxaỹáxanaxanec, qaa'le jeso'me da' l'onataxanaxac da' netaxaỹáxanaxanec ỹátaqta ỹágueegue da' 'ónaxaic, sa 'ená'am so' 'uáichiiñi. Qá'a jeso'me naqaiso jeso'me qo'mi detaqatapeelóo'te naỹi dójo' dálaxaic ỹamaxataxac 'me ỹátaqta 'ónaxaic, da'me chiỹaqaỹi jen'me qoỹaloxóotacpi 'me ỹágueegue da' 'ónaxaic.
7Qá'a jeso' 'uáichiiñi lasoxoc da' qoniỹamaxá'te' ñi' Dios, da' 'uootaxa ỹátaqta nalóchiiñi joca'li, qana'chi sa ỹiuen toqo' da' qonadálaxat ga' ỹamaxataxac. 8Qaláxasa ñi' Dios ỹilá'a so'me siỹaxadipi da' sa nalóiñi da' lasoxoc, táchiỹi da' l'aqtac joca'li 'éetapega jeso'me naua' l'aqtaqa 'me nedétrañi, 'enapega'to':
Ñi' qadasoxola' 'enaac: 'Uo qomle ga' nolo',
qana'chi jaỹim ñadálaxat ga' ñiỹamaxataxac
da' ñiỹamaxá'te' jen' lec'oqtepi so' Israel qataxa so' Judá.
9Sa 'ená'am so' ñiỹamaxataxac 'me s'étec jeso'me huá'au let'alpi jen'me
jeso' nolo' ca'li sacona da' louaq da' ñaqatee'guesop di' 'aléua Egipto.
Qá'a jeso'me sa ỹipaguelégue da' ñiỹamaxataxac,
chan'eesa jaỹim shicá'ai, 'enaac ñi' qadasoxola'.
10Jega'me ñiỹamaxataxac qomle ñiỹamaxá'te' jen' lec'oqtepi so' Israel qomle ma'le ỹinoxodéegue gaua' noloqo'te,
jega'me qomle ỹipaquíchiỹi da' l'aqtac ñi' qadasoxola' 'me 'eet'oi:
Jaỹim qomle sacháỹi da' leenataxac jen'me da' ỹamaxasóxonaxac,
qataxa sedelóo'te naua' liquidiaqtel.
Qana'chi jen'me jaỹim netamnaxala',
qataxa jen'me mai'chi ỹalémaxasetpi.
11Huá'a, qana'chi sa ỹiuen da' 'uo ga' qoỹapaxaguen,
qataxa qaỹa 'te ỹapaxaguen ga' liquiáxaua,
'uootaxa ga' laqaỹasa, da' qaidi jaỹim ỹaateton, jaỹim nasoxola'.
Qá'a ỹima jen'me siỹaxadipi jaỹim ỹaateton,
cha ỹivíd'a jen'me qaỹa ga' l'amaqchic qataxa jen'me 'amaqtáqaicpi.
12Qataxa sapalaxat jen'me sa nó'in 'me ỹí'et jen'me,
qataxa sa seenatapéga jen' loicpi.
13Ñi' Dios da' 'uootaxa detaqátapega jega'me dálaxaic ỹamaxataxac, jiñi'me 'ená'am qa'en da' sóxote deto so' 'uáichiiñi; qana'chi jeda'me 'ená'am da' sóxote deto qataxa ma'le sa qod'onataxana, jeda'me sa huaỹáloq qomle da' ỹiméta.
Currently Selected:
Hebreos 8: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
