Hebreos 4
4
1Chan'eesa naỹi da' maliaxa 'uo da' qo'mi ỹaloxonapegalo da' sañoxotaq da' senoxonaxauó'o ga' nemataqa' ñi' Dios, qana'chi ỹátaqta ñitelaqáñi qomle. Píiỹa, qomle 'uo ga' 'oonolec da' 'oñíita da' sa ỹañoxot da' ỹinoxoneuo. 2Qá'a qo'mi nataq'en qo'mi qoỹ'axatema da' n'aqtac 'me chiỹaqaỹi da' nec'alaxa, 'ená'am da' 'éeta jeso'me siỹaxadipi da' qoỹ'axátem joca'li. Qaláxasa so' siỹaxadipi qaỹa 'te ỹanaỹi dójo' n'aqtaxanaxac, qá'a 'chi naquiáxatapega da' sa ỹ'amaqten. 3Qaláxasa qo'mi 'me s'amaqténataxanaq, qana'chi sañoxotaq qomle da' senoxonaxauó'o jega'me mataqa' 'me 'éetapega joca'li ñi' Dios, 'enaaco':
Chan'eesa jaỹim salemataỹa so' siỹaxadipi,
qana'chi senapéga da' sa senoxonaqteneuó'o qomle ga' ñimataqa'.
Qamaa'le ñi' Dios ma'le sóxote ỹimat da' l'onataxanaxac da' ỹí'et ỹima jen' 'aléua. 4Qá'a naua' nedétrañi n'aqtaqa ỹ'axa't so' p'áteegue nolo', 'enaaco':
Ñi' Dios nematee'guesop ỹima jen' l'onatacpi joca'li ỹinoxodéegue naua' seis noloqo'te.
5Qataxa di' laqáỹa n'aqtac 'eet'oi:
Sa ỹaqanatet qomle da' ỹinoxoneuó'o ga' ñimataqa' jen'me siỹaxadipi.
6Qaláxasa maliaxa 'uo na' sona'li ỹinoxoneuó'o dójo' mataxaqui. Qataxa jen'me 'uáichiiñi joca'li da' qoỹ'axátem da' n'aqtac 'me chiỹaqaỹi da' nec'alaxa, qaa'le jeso'me siỹaxadipi sa ỹañoxot da' ỹinoxoneuo, ỹasouaxat da' sa ỹalaq. 7Chan'eesa jiñi'me Dios ỹitaxa v'iỹílaxalégue da' ỹ'axat jega'me nolo', 'enaaco': jénjo' nolo'. Qá'a ñi' Dios ỹachiỹoxotaỹi so' net'a David da' qo'mi ỹ'axatema saua' ỹoxoi'ỹilo noloqo'te naa'me nedétrañi l'aqtaqa 'me 'eet'oi:
Naỹi da' 'ami 'anaquiáxañiichiilo naua' 'enapegalo ñi' Dios l'aqtaqa,
qaláxasa 'ena't qomle da' 'au'añaxachiiỹilo naua' 'adiquidiaqtéldii'.
8Qá'a so' Josué da' 'uootaxa ỹinoxonaqteneuó'o toqo' so' Israel lec'oqtepi dójo' mataxaqui, qana'chi ñi' Dios sa ỹitaxa toqo' da' ỹ'axat ga' laqáỹa nolo'. 9Chan'eesa maliaxa 'uo qamaa'chitáxa jega'me nolo' mataxaqui 'me sétaaque da' nemataxaqui jen' lalémaxasetpi ñi' Dios. 10Qá'a ga' ỹinoxoneuó'o qaidi nemataxaua ñi' Dios, jega'me nematee'guesop ỹima jen' l'onatacpi, 'ená'am da' 'éeta joca'li da' nematee'guesop ỹima jen' l'onatacpi ñi' Dios. 11Chan'eesa qo'mi qomle ỹátaqta ñ'añaxataq, qaidi sañoxotaq da' senoxonaxauó'o jega'me mataxaqui, píiỹa, qomle 'uootaxa 'uo ga' 'ená'am da' ladíquiaxac jeso'me sa d'amaqténataxan joca'li.
12Qá'a da' l'aqtac ñi'me Dios ỹátaqta nec'alétaiỹi, qataxa 'uo da' l'añaxac. Qataxa na' liaxa napacalégue ga' legaxanaxat 'me dos naua' nedegaqa'te. Qataxa jeda'me ỹañoxot da' ỹivída'uo jega'me ỹátaqta p'áuo sa di'ỹoq l'óiỹaxac ga' siỹaxaua qataxa jeso'me cápegue' liquí'i, qataxa ỹañoxot da' ỹáateegue qa'en ga' leenataxac qataxa da' laviliỹáxac. 13Qaỹa ga' 'oonolec jen'me l'onatacpi ñi' Dios da' 'uootaxa ỹañoxot da' nañoxóchi'nsop jiñi'me. Qá'a ỹima jen'me l'onatacpi ỹátaqta di'ỹoqóta qataxa ỹáateegue qa'en da' ỹilotalégue jiñi'me 'me 'uo qomle ga' nolo', qana'chi sasoxouó'o da' s'axátaxam da' qad'onataxanaxac.
So' Jesús naqaiso so' lasoxola' jen' netaxaỹáxanaxanecpi da' qodetaxaỹapégue' ñi' Dios
14So' Jesús 'me lec'óxot ñi' Dios, jeso'me naqaiso jeso'me 'oonolec qadetaxaỹáxanaxanec 'me ỹinoxoneuó'o ga' huét'a ñi' Dios da' detaxaỹapégue'. Chan'eesa qo'mi ỹátaqta ñ'añaxataxac qomle da' qad'amaqténataxanaxac. 15Qá'a jeso'me qadetaxaỹáxanaxanec, jeso'me ỹátaqta 'uo da' lichoxodénataxanaxac da' senqáta, ỹasouaxat da' qaỹa ga' qad'añaxac. Qá'a jeso'me joca'li ỹátaqta ni'quichínỹi ỹima na' ỹodapecachi napiinaguec, 'ena'ama qo'mi. Qaláxasa jeso'me qaỹa ga' lasouaxaset. 16Chan'eesa ỹátaqta qaỹa qomle ga' qad'óictaaque da' ñoqchíỹaxa'uo ga' nes'ónaqa' jiñi'me qadet'a Dios 'me sóxodaic, qaidi jiñi'me ỹañoxot da' qo'mi ỹichoxode'n, qataxa ỹachiỹoxotaỹi da' lauo'chi da' qo'mi lecochiỹalo da' 'uo ga' souénaqtaaque.
Currently Selected:
Hebreos 4: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
