1 Timoteo 5
5
Da' 'éeta ga' nasoxola' da' ỹilolégue na' 'amaqténataxanaxaicpi
1'Ená'te 'audolégue ga' netaxaỹaxac co'ỹaq ga' ỹ'axaicáchiỹi. Jaldáta da' 'auodíitac da' 'auenapéga, 'auéet'em ga' 'adet'ása. Qataxa da' 'auenapéga ga' nesoqolec, 'auéet'em ga' mai'chi 'adanogaxaua. 2Qataxa da' 'auenapéga jaga' ỹ'axáina', 'auéet'em jaga' mai'chi 'adat'ésa. Qataxa da' 'auenapéga jaga' q'añole, 'auéet'em jaga' mai'chi 'adanogaxaua, qaidi qaỹa 'te 'an'aqtaguec ga' sa ỹiỹamaxañi.
3'Alcochiỹa jaga' p'ai da' ỹátaqta 'uo da' louénaxanaxa. 4Qaláxasa jaga' p'ai da' 'uo ga' lec'óxot 'uootaxa laual, gaa'me 'me 'uáidiñi da' ỹaỹáte'n da' ỹiloteguet qataxa mai'chi lecochita jaga' l'a'j, ỹ'iỹílaxatrelégue da' lecochaxa'j saua' chiỹoxogueta let'al. Qá'a naqaida 'me ỹátaqta ỹiỹamqáchiiñi, qataxa ỹiỹamaxaden ñi' Dios. 5Qá'a da' 'uo jaga' p'ai da' 'uootaxa nedóchiiñi qataxa qoỹiimapega't, qaláxasa sóxote huet'ot ñi'me Dios da' naquitaxac, qataxa quet'ot da' netamnaxac naua' noloqo'te qataxa naua' pi'ỹáxadi. 6Qaláxasa jaga' p'ai da' ñaneguet da' sa netelela't, temaqaidi da' nec'alétaiỹi, qaláxasa sóxote ma'le sega'me da' ỹileu. 7Chan'eesa 'auamaxasoxolégue da'me séetapeec, qaidi jaga' p'ai sa 'te sa ỹiỹamaxañi ga' n'aqtaguec. 8Qá'a ga'me siỹaxaua da' sa 'te noouaqapeelégue na' mai'chi lalémaxaset, ga'me siỹaxaua na'chi sa nateneguet da' 'enapéga lip'iỹáxac. Lamá'asa da' 'uootaxa sa 'te noouaqapeelégue ga' mai'chi lalémaxaset lec'óqo'tepi. Ga'me ỹátaqta p'asaỹima'te da' napacalégue ga' sa d'amaqténataxan.
9Jaga' lemalate na' lenaxat jan' p'ai nedot'a't qoỹin jan' sóxote ỹovi't naua' sesenta 'uóidi, qataxa 'oonolec qa'en ga' chiỹoqotelégue loua. 10Qataxa qoỹ'amaqa'a't da' l'onataxanaxac ỹiỹamqáchiiñi. Jeda'me n'aqtaguec jaga'me: qomle nó'in da' lec'óxoc, qataxa da' ỹilo'oguet ga' nesápichaq, qataxa qaỹa 'te ga' ỹauáaque da' ỹilo'oguet na' 'amaqténataxanaxaicpi, qataxa da' 'uootaxa sóxote da' lecochiỹa ga' laqáỹa da' 'uootaxa 'uo ga' huápiỹi, qataxa da' sóxote ỹacoolégue da' ỹiỹamqáchiiñi laqáỹa.
11Qaláxasa 'ená'te 'audé'uo jaga' lemalate na' nenaxat jaga' p'ai da' sa ỹovi't naua' sesenta 'uóidi. Qá'a sa ỹiuénaaque da' cai'ỹi da' loqopi'chi, qana'chi ỹaxanéegue so' Cristo, qá'a sétaaque da' ỹitaxa huó'on. 12Qana'chi 'uo da' lesamaxataxac, qá'a sa ỹipaguelégue da' ñanot so' Cristo. 13Qataxa da' tate'ualo naua' 'emáqa, cha ỹivíd'a da' qaỹa 'te ga' ỹacoñíỹi. Sa na'chidáta da' qaỹa 'te ỹacoñíỹi, nataq'en taỹa da' n'aqtaqa ló'o' qataxa nesenaxai, qataxa ỹ'axátetac ga'me sa qoỹiỹamaxaden. 14Chan'eesa jan' p'ai 'me maliaxa sa ỹ'axáina', n'óota da' ỹitaxa huó'on, qaidi decó'o, qataxa qaidi ỹilo'ogue ga' l'acháqa'. Qaidi qaỹa 'te liiuo ga' nep'aguénoqo't da' 'uootaxa ỹasaxalégue ga' sa ỹiỹamaxañi. 15Qá'a sóxote 'uo jan' p'ai 'me cá'ai so' Cristo da' 'equegue so' paiỹac Satanás.
16Ga' 'amaqténataxanaxaic, 'uootaxa jaga' 'amaqténataxanaxai, da' 'uo jaga' laqáỹa p'ai, n'óota da' lecochiỹa qomle, qaidi jaga'me sa 'te da' ỹimalégue ỹima na' 'amaqténataxanaxaicpi, qaidi jen'me lecochiỹa jaga' p'ai 'me ỹ'oqóchiỹi qaỹa 'te ga' p'iỹá'a.
17Ga' nasoxola' da' ỹátaqta ỹaỹáten da' ỹilo'ogue na' 'amaqténataxanaxaicpi, ga'me ỹátaqta qoỹauotec qomle qataxa qolcochiỹa. Lamá'a da' nañaneguet da' ỹ'axat da' n'aqtac qataxa dapaxaguenataxanec. 18Qá'a na'chi nedétrañi naua' nidii's l'aqtaqa ñi' Dios, 'eet'oi: “'Ená'te 'auanáỹi ga' limic jaga' necointáxaqui ga' 'adauégaxanaxala' huaca da' 'auapiỹaxalégue na' trigo da' qonaqtétac jan' jala.” Nataq'en 'enaac: “Qoỹiseeténec ga' mai'chi laso'vi ga' 'onataxanaxaic.”
19'Ená'te da' 'auqo'cha ga' 'chi nep'aguénaguec ga' lasoxola' na' 'amaqténataxanaxaicpi, jaldáta da' 'uootaxa dos, 'uootaxa tres gaua' d'aqtaxa'n. 20Qaláxasa ga' sa ỹaxadíñi naua' loico, qana'chi ỹátaqta 'auaconé'uo ga'me, ỹauáachiỹi 'auen ỹima na' siỹaxadipi da' 'auenapéga, qaidi ỹima jen'me ma'le dó'i. 21Da' ỹaqátaxac 'am sanem naỹi ỹátaqta qo'mi ỹic'atéet'ape ñi' Dios qataxa so' qadesaliaxanec Jesucristo, nataq'en na' chiỹaqséguem Dios lamaxa'spi 'me liquiỹacpi. Ỹátaqta 'aualaxalco' qomle da' ỹaqátaxac. Qaỹa 'te ga' 'amatalégue da' 'adauotaxat na' siỹaxadipi, qataxa sa 'anquiỹáỹi. 22'Ená'te pasá'a da' 'audéuo ga' lasoxola' na' 'amaqténataxanaxaicpi, qá'a sa qoue da' 'am ỹisepaxanaqtet ga' loiquiaxaset ỹaqá'a. 'Anetela'agueto' ỹima qomle na' sa ỹiỹamaxañi.
23Qá'a na'chi 'eeta't da' 'adec'onaxaset na' 'adauel, naỹi 'ená'te nedot'a't na' noxop da' 'aniỹómỹi, jaldáta da' nataq'en 'aniỹómỹi na' latáxa, qaláxasa 'chi 'auchict'aguet.
24Qá'a sóxote 'uo na' di'ỹo't naua' loico, lochiỹá'a da' qonimit. Qaláxasa 'uo na' laqáỹa 'me maliaxása da' sa di'ỹo't naua' loico, cha ỹivíd'a qomle qonimit. 25Nataxa 'ená'am ga' 'ónaxaicaloic di'ỹoqóta. Qaláxasa qomle maliaxása sa 'te di'ỹoq, qaláxasa sa 'te 'eeta't da' sa di'ỹaxa.
Currently Selected:
1 Timoteo 5: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
