1 Pedro 5
5
Da' naqátaxac jen' 'amaqténataxanaxaicpi
1Naỹi 'ami saqatalo 'ami lasoxola'te jen' 'amaqténataxanaxaicpi, qá'a na'chi sena'ama 'ami jaỹim nasoxola', qataxa sauáachiỹi ỹima na' ne'queténaxacpi so' Cristo, qataxa na'chi sena'ama 'ami ñiuána'uo da' ni'ỹoxodic 'me maliaxa nata't da' qoỹaloxon. 2Da' ỹaqátaxac 'eet'oi: Ỹátaqta 'auloỹiỹi qomle jen' 'amaqténataxanaxaicpi 'me 'ami ỹipataxagueta ñi' Dios da' 'auloỹiỹi. 'Auadénaxachii ga' nouatoqo't jaga' n'aanaxate. Ỹátaqta 'anp'átaxadiñiilégue, qá'a naqaida da' 'éetapeec ñi'me Dios. Sa 'chi 'ami qoỹamaqat'ape, qataxa sa 'chi 'anaquichíit'a jaga' laicaua. Na'chidáta da' ỹátaqta 'ansapáchiitelégue da' 'ad'onataxanaxaquii. 3Qataxa sa 'te da' 'ami maxasóxonaxaiqa da' 'ami 'auamaqáitac jen' 'ami qoỹipataxagueta 'amaqténataxanaxaicpi. Na'chidato' da' 'ami laloqténaxanaqa'te jen'me, 4qaidi qomle ỹivíta da' n'iỹílaq jeso'me ỹilot'ague ỹima jen' lasoxola'pi jen' 'amaqténataxanaxaicpi, qana'chi 'ami 'auacoñiiỹet jaga' 'adasiichii 'me qaỹa 'te ga' 'ená'am da' lodiac, sa 'ená'am jaga' leseeténaxanaqte ga' 'chi siỹaxaua 'me ỹañoxot da' daqaxaỹáñi, 'ená'am jan' laỹoqte jaga' 'epaq.
5Na'chi 'ená'am nataq'en 'ami soxodipi ỹátaqta 'aualaqaiỹet qomle ga' 'enaac jen' ỹ'axaicpi. Qataxa ỹima jen' siỹaxadipi ỹiuen da' ñi' 'oonolec ỹátaqta nañanguet da' ỹalaxaguet ga' laqáỹa qataxa sa ỹ'oxodénaxaic. Qá'a naua' nidii's n'aqtaqa 'enáacjo':
Ñi' Dios nichaata'aguet ga' ỹ'oxodénaxaic,
qaláxasa ỹichoxoden da' lecochiỹa ga' sa ni'ỹoxoden.
6Chan'eesa sa 'te qomle da' 'ani'ỹoxodíñii, ỹátaqta 'anañiiỹot da' 'uañaxaic louaq ñi' Dios, da' qaidi jiñi'me 'ami nichaalataxaadíñi qomle ỹivíta ga' nolo' 'me laloqtenec. 7Qataxa ỹima jen' 'aueenachiitapega ỹátaqta 'amachiỹo'ot ñi' Dios, qá'a jiñi'me ỹátaqta 'ami ỹoqocha'alo.
8Ỹátaqta 'anaỹáchiñiitela't, qataxa 'anlóiteegue, qá'a coléetac jeso'me 'ami ỹip'agueet'ape qadó'o paiỹac, nimitétaaque ga' loxonec, 'ená'am ga' di'quiỹaac da' doqótac. 9Qaláxasa ỹátaqta 'anchaachiiỹa'aguet, qataxa sa 'te da' 'axañíiñi da' 'adip'iỹáxaquii, qá'a 'ami 'auaỹáchiñiitac da' ỹima jen' 'amaqténataxanaxauaipi 'me net'alo naua' laqáỹa' 'ale'u, qana'chi 'ená'am da' ne'queténaxac dójo'. 10Qaláxasa qomle ỹim da' 'ami cada'acolec 'uo da' 'an'queténaxaquii, qana'chi ñi' Dios ỹátaqta 'ami nalóchidiñi qa'e'n, qataxa 'ami sa nedámchidiñi, qataxa 'ami 'uañaxaiqa, qataxa qaỹa ga' 'ami ỹadiỹo't. Qá'a naqaiñi ñi' Dios jiñi'me qo'mi ỹanema da' qanchoxodénataguec, qataxa qo'mi ỹiỹaxanalo da' ñiuánaqa'uo da' li'ỹoxodic 'me qaỹa 'te loiquiaqa', qataxa soqotaqáta'uo so' Jesucristo. 11Jiñi'me 'me lalémaxaset da' li'ỹoxodic qataxa da' l'añaxac 'me qaỹa 'te loiquiaqa'. Já'a, na'chi naq'áita dójo'.
Da' p'áteegue nip'iỹénataxanaxac
12Jan' ỹide 'me sedelégue da' 'ami samaxalo, chiỹoqóchiỹi da' ỹidíñi qasen ñi' Silvano 'me ỹaqáỹa 'me ỹátaqta ỹipé'et. Da' 'ami saqatalo qataxa da' di'ỹoqóta 'eesa qasen da' 'anchoxodénataỹiquii 'me 'auacoñiiỹet, jeda'me naqaida da' ỹátaqta 'eesa qasen da' lauo'chi ñi'me Dios. Jeda'me ỹátaqta 'oquiit'egue qomle.
13Jen' 'amaqténataxanaxaicpi 'me néta'ña na' noic Babilonia, jen' liquiỹacpi ñi' Dios 'me 'ena'ama 'ami, jen'me 'ami ỹamaxalo da' lip'iỹénataxanaxac, qataxa nataq'en jiñi'me 'ená'am da' ỹalec Marcos. 14Ñi' 'oonolec qomle da' 'oñíita ỹátaqta nec'ouoq ga' laqáỹa da' nip'iỹé'ne', qataxa ỹátaqta 'anchoxodiñiỹa't.
Qataxa ñi' 'oonolec da' 'oñíita ỹaconguet qomle da' n'emáxac, jen'me mai'chi lalémaxasetpi so' Jesucristo. Já'a, na'chi naq'áita dójo'.
Currently Selected:
1 Pedro 5: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
