1 Pedro 2
2
1Chan'eesa 'ónaxaic qomle da' 'axañíiñi ỹima jen' ỹodapecachi sa nó'inpi. 'Ená'te 'auqovínaxañiitac, qataxa sa 'te dos naua' 'oquíitapee'to, qataxa sa 'te 'ap'aguíñiitac ga' 'adaqaỹai, qataxa sa 'te 'ami n'aqtaqa ló'ol. 2'Ami 'oñí'ỹamo' qomle ga' nootolec ỹímta da' niỹíñi da' ỹátaqta 'ansóxochii da' l'aqtac ñi' Dios 'me 'ená'am ga' ỹátaqta nedot'a't lóchi' jaga' lat'e qaidi jeda'me 'ami 'uañaxaiqa qa'e'n, qataxa 'ami ỹivídaxatalo da' 'anec'alỹíiỹi. 3Lamá'asa qomle ỹátaqta 'auaỹáchiñii so' qadesaliaxanec da' ỹátaqta sóxodaic.
So' Cristo 'ená'am ga' qa' 'me nec'alétaiỹi
4Chan'eesa 'anchíquiiuo qomle so' qadesaliaxanec Jesús 'me 'ená'am ga' qa' 'me ỹátaqta nec'alétaiỹi. Sójo' qa' l'otánec joca'li jen' siỹaxadipi, qaláxasa ñi'me Dios liquiỹac qataxa ỹátaqta lauotaxat. 5Nataq'en 'ami 'oñí'ỹam qomle ga' qa' 'me ỹátaqta nec'alétaiỹi, chan'eesa ỹátaqta 'anañiiỹot ñi' Dios, da' qaidi 'ami d'onataxanalo da' n'oxoséguem jaga' mai'chi netamnaxaqui 'me sa di'ỹoq, qataxa da' ỹauo'oi 'ami letaxaỹáxanaxanqa jen' siỹaxadipi da' 'autaqaỹápegue' jiñi'me, qataxa sétaaque da' 'auañiitapecot jaga' mai'chi 'adachítaqtaxanaqchii 'me sa di'ỹoq, qana'chi jaga'me ỹátaqta ỹiỹamaxadéeta jiñi'me, qá'a 'uo da' 'adip'iỹáxaquii so' Jesucristo. 6Qá'a naua' nidii's l'aqtaqa ñi'me Dios nataq'en 'enáacjo':
Jaỹim sanánỹi di' laiñi di' noic let'ádaic Sión
ga' 'ená'am ga' qa' 'me d'añapeeguet qa'en ga' 'emec;
jega'me ỹiquiỹac qataxa ỹátaqta ỹauotaxat.
Ga' ỹ'amaqten jega'me, qana'chi sa n'aloxola't.
7'Ami 'me 'au'amaqténataxañii, qana'chi jega'me qa' ỹátaqta 'uo 'aviñii da' li'ỹoxodic; qaláxasa jen'me sa 'te d'amaqténataxan, qana'chi ỹipaquíchiilo naua' nidii's n'aqtaqa 'me 'enáacjo':
Jeso'me qa' 'me ỹasaxáiỹi jocalia'cho' jeso'me 'emec ló'olpi,
jeso'me naqaiso naỹi so' d'añapeeguet qa'en so' 'emec.
8Qataxa nataq'en di' laqáỹa nedétañi n'aqtac 'eet'oi:
Jeso' qa' polégaxan qa'en ga' siỹaxaua, qataxa qachiláxan qa'en.
Qá'a jen'me siỹaxadipi polégaxan ỹasouaxat da' sa ỹ'amaqten da' n'aqtaxanaxac. Qá'a ñi'me Dios nataq'en na'chi 'ená'ac jen' siỹaxadipi.
Jen'me lalémaxasetpi ñi' Dios
9Qaláxasa 'ami ỹátaqta 'ami liquiỹacpi ñi' Dios, qataxa 'ami letaxaỹáxanaxanqapi qa'en jen' siỹaxadipi da' 'autaqaỹápegue' jiñi'me 'me qadet'a, qataxa 'ami ỹoqovíte' qa'e'n, qataxa 'ami lalémaxase'te. Naqaida da' 'éet'ec jiñi'me sétaaque 'ami 'au'axáchii jen' l'onatacpi 'me ỹ'oxodaq, ñi'me 'ami ỹachiỹoxotaavlo jen' n'álaxa, da' qaidi 'aunoxoñiuó'o da' l'edáxa 'me qaỹa 'te 'ená'am da' li'ỹoxodic. 10'Ami joca'li sa 'ami lalémaxase'te ñi'me Dios, qaláxasa naỹi, qaa'le ỹátaqta 'ami lalémaxase'te. Joca'li qaỹa 'te 'uo ga' 'ami ỹichoxodeet'ape, qaláxasa naỹi jiñi'me ỹátaqta 'ami ỹichoxode'n.
Ỹátaqchiiñi 'au'onataxañiỹot ñi' Dios
11'Ami ỹaqai'ỹolqa, 'ami 'me 'ená'am qasen ga' sa naqtelégue ga' lañoqo', 'ami ñachoxodeetoovlo da' 'ena't qomle da' 'auauóỹaaque ga' ledáqa' ga' 'éetapeec sa nó'in da' 'adapáchiỹaxaquii 'me ỹilóiquiaxaatac da' 'ad'óiỹaxaquii. 12Ỹátaqta 'ónaxaic qomle 'aviñii da' 'adasoxoquii da' 'oñíitanỹi jena'me sa ỹaateton ñi' Dios. Qaidi jen'me siỹaxadipi ỹilá'a jega'me ỹiỹamqáchiiñi 'av'íchiitac, qana'chi ỹi'ỹoxoden ñi' Dios qomle ỹivíta ga' nolo' da' jiñi'me nimiténa, temaqaidi naỹi da' sa ỹiỹamadídiñi naua' letaxaỹaxaco da' 'ami 'eetapegalo, qaa'le 'ená'am qa'en ga' jalcote ga' ỹasouaxat.
13Qá'a ỹasouaxat da' 'auauochíỹic so' qadesaliaxanec, qana'chi 'ami ỹiuen da' ỹátaqta 'aualaqaiỹet ỹima na' net'alpi 'me ỹanaséguem jen' siỹaxadipi, lamá'a ga' net'a 'me ỹátaqta ỹáiseguem, 14'uootaxa jen' net'alpi 'me lamaxa'spi jega'me, da' qaidi ỹa'uo ga' ne'uaxánaguec ga'me ỹ'étetac ga' sa nó'in, qataxa da' ỹi'ỹoxoden jega'me ỹí'et ga' ỹiỹamqáchiiñi. 15Qá'a ñi'me Dios sétaaque da' 'ami 'av'íchii ga' ỹiỹamqáchiiñi, qaidi qaỹa ga' ladic qa'en ga' l'aqtac jen'me qaỹa ga' ỹaỹátenaac qataxa chiỹoxoseca't.
16'Ami 'oñiit'amo' qomle ga' siỹaxaua ỹátaqta huesóta, qaláxasa sa 'av'iuóxoñiỹa da' 'ami huesóte' da' 'av'íchii ga' sa nó'in. Na'chidato' da' 'aviñí'ỹam da' ỹátaqta 'ami lelatáqa ñi'me Dios. 17Qaỹa qomle ga' 'anapaquiỹalégue ỹima na' siỹaxadipi. Qataxa ỹátaqta 'auauochíỹic jen' 'ad'amaqténataxanaxauaipi, qataxa ỹátaqta 'au'óiỹa ñi' Dios, qataxa 'aualaqaiỹet ga' net'a 'me ỹátaqta ỹáiseguem.
Qoỹilolégue da' ne'queténaxac so' Cristo
18'Ami namaxa'spi, ỹátaqta 'amachiỹalégue qomle da' 'aualaqailégue na' 'adadípaipi, lamá'asa da' soxodaicpi qataxa pogáxadenaxaicpi, qataxa na'chi 'ená'am da' qalhuaxaic. 19Qá'a ỹátaqta ỹiỹamqáchiiñi ga' siỹaxaua da' n'añaxateguet jen' ne'queténaxacpi 'me 'chi qoỹ'améetapeec ỹasouaxat da' hueenatet'ot ñi' Dios. 20Qá'a da' 'uootaxa 'ami 'av'íchii ga' sa nó'in, qana'chi qoỹa'uo ga' 'ane'uaxánaguiquii, qaláxasa ¿jái'chogamaxa náỹi da' 'uootaxa 'aneuálaxaiñii'ỹi' da' 'an'añaxachiiỹet jeda'me? Qaláxasa da' 'uootaxa 'an'quichíñiiỹi ỹasouaxat da' 'av'íchiitac ga' 'ónaxaic, qana'chi ỹátaqta 'aneuálaxaiñii da' 'an'añaxachiiỹet, jeda'me ỹátaqta 'ónaxaic, ỹiỹamaxaden ñi' Dios. 21Qá'a naqaida da' 'uo da' 'ami ỹiỹaxanalo ñi'me Dios. Qá'a so' Cristo 'uo da' ne'queténaxac ỹasouaxat da' 'oñíita, da' qaidi 'ami 'auloilégue jeso'me qataxa 'oquiit'egue da' ladíquiaxac. 22Jeso'me qaỹa 'te ga' loic, qataxa sa nauá'ne' da' 'uootaxa doqovínaxan. 23Qataxa joca'li qoỹisouéetac, qaláxasa sa ỹ'iỹílaxat'aguet da' nesouenaguec, qataxa joca'li qoỹa'uo da' ne'queténaxac, qaláxasa sa dadénaxaatac. Na'chidáta da' ỹip'axan'ot ñi'me Dios 'me sa depatenáxan da' nimit ga' nasouaxac. 24So' Cristo mai'chi ỹáchi ỹima jen' qadoicpi da' nipiiséguem joca'li qoỹitouoxolégue jaso' nesodooso, qaidi qolqá'ai da' n'etaxalóxoc, ỹim, qana'chi qolaxague da' ỹoqovíta n'óiỹaxac. Jen' ne'uaxánecpi jeso'me joca'li qoỹi'uaxaatalégue, jen'me naqáina náỹi da' 'ami qonatade'n. 25Qá'a 'ami joca'li 'oñí'ỹam jaga' n'aanaxate 'me ỹisómtac, qaláxasa naỹi sóxote 'av'iỹílaqaiỹa so' Cristo 'me 'ami netelalo da' 'ená'am ga' n'aanaxate nouatoqo't, qataxa ỹilo'ogue da' 'ad'óiỹaxaquii.
Currently Selected:
1 Pedro 2: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
