At Ṛuma 8
8
Tilelli i aɣ-d-iwwi Ṛṛuḥ imqeddes
(Gal 3.13-14; 5.16-25)
1Ihi ass n lḥisab ulac lɛiqab ɣef wid yumnen s Yasuɛ Lmasiḥ. 2Axaṭer asaḍuf n Ṛṛuḥ n tudert di Yasuɛ Lmasiḥ isellek-iyi seg usaḍuf n ddnub akked lmut.
3 Ṭawrat n Musa ur tezmir ara ad teɣleb ddnub axaṭer ṭṭbiɛa-nneɣ tekkes-as tazmert. Ayen akken ur tezmir ara ṭawrat n Musa ad t-texdem, d ayen i yexdem Yillu mi d-iceggeɛ Mmi-s s ṣṣifa n wemdan, i d-yusan s tfekka am tin n yimdanen yellan meṛṛa d imednuben, i wakken ad ifk iman-is d asfel s wayes ara yeḥkem ɣef ddnub i ten-izedɣen. 4S wakka ihi ara yettwakemmel deg-neɣ wayen i d-tenna ṭawrat n Musa, nekni yettɛicin s tezmert n Ṛṛuḥ imqeddes mačči s ṭṭbiɛa-nneɣ.
5Wid ittɛicin s ṭṭbiɛa n wemdan ttqelliben kan ɣef wayen iɛnan lebɣi n wemdan, ma d wid ittɛicin s Ṛṛuḥ imqeddes ttqelliben ɣef wayen iɛnan lebɣi n Ṛṛuḥ imqeddes. 6Wid ittɛicin s ṭṭbiɛa n wemdan tteddun ɣer lmut, ma d wid ittɛicin s lebɣi n Ṛṛuḥ imqeddes tteddun ɣer tudert d lehna. 7Axaṭer wid ittabaɛen lebɣi n wemdan uɣalen d iɛdawen n Yillu, imi ur ḍuɛen ara asaḍuf-ines, axaṭer ṭṭbiɛa n wemdan ur tezmir ara ad tḍuɛ asaḍuf n Yillu. 8Wid temlek ṭṭbiɛa-nsen ulamek ara ɛeǧben i Yillu.
9Ma d kunwi mačči s ṭṭbiɛa n wemdan i tetteddum lameɛna tetteddum s lebɣi n Ṛṛuḥ imqeddes axaṭer Ṛṛuḥ n Yillu izdeɣ deg-wen. Win deg ur izdiɣ ara Ṛṛuḥ n Lmasiḥ ur illi ara d ayla-s. 10Ma yella Lmasiḥ deg-wen, ɣas ad temmet tfekka ɣef sebba n ddnub, ṛṛuḥ-nwen ad yidir ɣef ddemma n lḥeqq. 11Ma yezdeɣ deg-wen Ṛṛuḥ n Yillu i d-isseḥyan Yasuɛ si gar lmeyytin, win i d-isseḥyan Yasuɛ si gar lmeyytin, izmer daɣen s Ṛṛuḥ-is izedɣen deg-wen, ad d-yerr tudert i tfekka-nwen ara yemmten.
12S wakka ihi ay atmaten, nettwalas lameɛna mačči ɣer lebɣi n ṭṭbiɛa-nneɣ, ur ilaq ara ad nidir akken tebɣa tfekka-nneɣ. 13Ma tettidirem s lebɣi n tfekka-nwen atan ad temmtem, lameɛna ma tɣelbem lebɣi n ṭṭbiɛa-nwen s Ṛṛuḥ imqeddes, ad tidirem. 14Axaṭer wid itteddun s Ṛṛuḥ n Yillu, d arraw n Yillu. 15Ṛṛuḥ i wen-d-ittunefken mačči d Ṛṛuḥ ara kkun-irren d aklan i wakken ad tɛicem di tuggdi, meɛna d Ṛṛuḥ imqeddes i kkun-irran d arraw n Yillu, s yis i nezmer ad nessiwel i Yillu : A baba-tneɣ ! 16D Ṛṛuḥ imqeddes s yiman-is i d-iwekkden i ṛṛuḥ-nneɣ d akken nekni d arraw n Yillu. 17Ihi ma yella d arraw-is i nella, d nekni daɣen i d iwṛiten : D iwṛiten n Yillu, d iwṛiten akked Lmasiḥ, meɛna ma nenɛettab yid-s, i wakken ad nili daɣen yid-s di tmanegt-is.
Tamanegt i d-iteddun
(Yuḥ 10.27-30)
18Ihi leɛtab i nesɛedday tura, ur nezmir ara ad t-nmettel ɣer tmanegt ara d-ibeggen Yillu deg-neɣ. 19Taxelqit meṛṛa tḥar melmi ara d-banen warraw n Yillu. 20Axaṭer taxelqit teɣli seddaw leḥkem n lbaṭel, mačči s lebɣi-ines, lameɛna s lebɣi n win i tt-isseɣlin. 21Meɛna taxelqit-agi tessaram ad tettwisellek si twaɣit i tt-isfesden, i wakken ad tekki di lɛaḍima n tlelli n warraw n Yillu. 22Neẓra tura d akken taxelqit meṛṛa tenɛettab, tettnazaɛ am tmeṭṭut iṭṭfen addud. 23Mačči d taxelqit kan, meɛna ula d nekni yesɛan Ṛṛuḥ imqeddes, yellan d amur amezwaru n tikciwin i aɣ-iwɛed Yillu, nettnazaɛ deg iman-nneɣ di leɛḍil ad aɣ-yerr Yillu d arraw-is, feddu n tfekka-nneɣ. 24Axaṭer leslak-nneɣ d ayen i nessaram ; ma nesɛa ayen i nessaram, ayagi mačči d asirem : Anwa ara yessirmen ayen yesɛa ? 25Meɛna ma nessaram ayen ur nesɛi, nettṛaǧu-t s ṣṣber.
26Akken daɣen Ṛṛuḥ imqeddes ittas-d ad aɣ-iɛiwen nekni ixuṣṣen di tezmert, axaṭer ur nessin ara ad neẓẓall akken ilaq ; lameɛna Ṛṛuḥ imqeddes s yiman-is ideɛɛu ɣef ddemma-nneɣ, s nnhati ur izmir yimi ad tent-d-yini s imeslayen ; 27imiren Illu yessnen ulawen, iẓra d acu i yessutur Ṛṛuḥ imqeddes, imi s lebɣi n Yillu i ideɛɛu ɣef wid ixtaṛ.
28Neẓra d akken Illu issufuɣ kullec ɣer lxir i wid i t-iḥemmlen, wid ixtaṛ s lebɣi-ines. 29Axaṭer wid akk i yextaṛ Yillu si zik, iqsed si tazwara ad ten-irr am Mmi-s i wakken ad yili d amenzu n waṭas n watmaten. 30Wid i yextaṛ Yillu si zik, d wid iwumi i d-issawel ; wid-nni iwumi yessawel irra-ten d iḥeqqiyen zdat-s, wid irra d iḥeqqiyen ifka-yasen amkan di tmanegt-is.
Leḥmala ur nesɛi tilas
31Acu ara d-nernu ihi ? Ma yella Illu yid-neɣ, anwa ara yilin mgal-nneɣ ? 32Netta iqeblen ad isebbel Mmi-s ɛzizen, ifka-t d asfel fell-aɣ meṛṛa, amek ur aɣ-d-ittak ara daɣen kullec yid-s ? 33Anwa ara icetkin ɣef wid ixtaṛ Yillu ? D Illu i ten-ittarran d iḥeqqiyen ! 34Anwa i izemren ad iḥkem fell-asen ? Yasuɛ Lmasiḥ d win immuten yerna iḥya-d si gar lmeyytin, yuli ɣer tama tayeffust n Yillu i wakken ad icafeɛ fell-aɣ ! 35Anwa i izemren ad aɣ-ifṛeq ɣef leḥmala n Lmasiḥ ? Ɛni d ddiq neɣ d ccedda, d leqheṛ neɣ d laẓ, d leɛra neɣ d ayen issagaden neɣ d ajenwi ? 36Am akken yura deg udlis n Ihellilen :
Ɣef ddemma-inek i nettqabal lmut yal ass,
ḥesben-aɣ am ulli i ttawin ɣer tmezliwt # 8.36 Walit
Ihellilen
44.23 ; 1 At Kurintus 15.30..
37Meɛna deg wannect-agi meṛṛa d nekni i iɣelben s Lmasiḥ i aɣ-iḥemmlen. 38Axaṭer ttekleɣ d akken ulac ayen i izemren ad aɣ-ifṛeq ɣef leḥmala n Yillu, di Yasuɛ Lmasiḥ Ssid-nneɣ : Ama d lmut neɣ d tudert, d lmalayek neɣ d tigeldiwin, d leḥwayeǧ n tura neɣ d tid ara d-yasen, 39ama d ayen ɛlayen neɣ d ayen lqayen, ama d tizemmar n igenwan neɣ d tid n lqaɛa neɣ ayen akk yellan di txelqit.
Currently Selected:
At Ṛuma 8: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.