At Ṛuma 7
7
Ayen yeɛnan asaḍuf
(Ifs 5.25; Gal 2.19-20)
1Ay atmaten ur teẓrim ara d akken asaḍuf iḥkem ɣef wemdan skud mazal-it idder ? Heddṛeɣ-d akka i wid yessnen asaḍuf. 2Ad wen-d-fkeɣ yiwen n lemtel : Tameṭṭut tettwarez ɣer wergaz-is s usaḍuf skud mazal-it idder, meɛna ma yemmut wergaz-is iserreḥ-as usaḍuf ma tebɣa ad tɛiwed zzwaǧ ; 3ma tuɣ wayeḍ skud mazal argaz-is idder, ittusemma tezna ; meɛna ma yemmut wergaz-is iserreḥ-as usaḍuf ad tɛiwed zzwaǧ, ayagi ur ittusemma ara d leḥṛam. 4Ula d kunwi ay atmaten, temmutem ɣef wayen iɛnan asaḍuf s lmut n Lmasiḥ, akken ad teṭṭfem deg win i d-iḥyan si gar lmeyytin i wakken ad txedmem ayen i iɛeǧben i Yillu. 5Axaṭer d asaḍuf i d-isbeggnen amek i nteddu s lebɣi n tnefsit-nneɣ d ccehwat-nneɣ n diri ; d netta daɣen i d-isbeggnen amek ixdem ddnub-agi deg-neɣ, armi i aɣ-iṣṣaweḍ ɣer lmut. 6Lameɛna tura nettusellek seg usaḍuf imi nettusemma nemmut ɣef wayen iɛnan asaḍuf-nni i aɣ-yurzen, s wakka i nezmer tura ad nḍuɛ Illu s lɛeqliya tamaynut n Ṛṛuḥ imqeddes, mačči am zik s lɛeqliya-nni taqdimt mi nella seddaw n usaḍuf.
D acu n nnfeɛ yellan deg usaḍuf ?
7Acu ara d-nini ihi, ɛni asaḍuf deg-s ddnub ? Xaṭi ! Lameɛna lemmer ulac asaḍuf tili ur ttissineɣ ara d acu i d ddnub. Axaṭer lemmer ur d-inni ara usaḍuf : Ur ṭṭamaɛ ara#7.7 Walit Tuffɣa 20.17., tili ur ẓriɣ ara d akken ṭṭmeɛ d leḥṛam ? 8Ddnub ifuṛes tagnitt s lameṛ n usaḍuf ; isnulfa-d deg-i mkul ṣṣenf n ṭṭmeɛ n diri ; axaṭer mebla asaḍuf ur d-ittban ara d acu i d ddnub. 9Zik, asmi ulac asaḍuf lliɣ ttɛiciɣ s nneya, mi d-iffeɣ lameṛ n usaḍuf, ddnub yuki-d deg-i, yessaweḍ-iyi ɣer lmut. 10S wakka, lameṛ i ilaqen ad iyi-ssiweḍ ɣer tudert, iwwi-yi ɣer lmut 11axaṭer ddnub yufa abrid iɣuṛṛ-iyi s lameṛ, yewwi-yi s yis ɣer lmut. 12Ihi, asaḍuf deg iman-is iṣfa, lumuṛat yellan deg-s ṣfan, lhan yerna d lḥeqq. 13Ɛni yuɣal-iyi wayen ilhan d sebba n lmut ? Xaṭi ! D ddnub i yi-ssawḍen ɣer lmut s wayen ilhan, i wakken s lameṛ, ad d-tban acḥal meqqret tezmert n ddnub.
14Neẓra d akken asaḍuf ittunefk-d s Ṛṛuḥ n Yillu. Ma d nekk, d amdan kan i lliɣ yerna imlek-iyi ddnub. 15Ur ẓriɣ ara acu i xeddmeɣ, ayen bɣiɣ ad t-xedmeɣ ur t-xeddmeɣ ara lameɛna d ayen akken keṛheɣ i xeddmeɣ. 16Ma yella ayen i xeddmeɣ d ayen akken ur bɣiɣ ara ad t-xedmeɣ, tḥeqqeqeɣ d akken asaḍuf ilha. 17Tura ihi mačči d nekk i ixeddmen ayagi, meɛna d ddnub izedɣen deg-i. 18Axaṭer ẓriɣ d akken ayen ilhan ur izdiɣ ara deg-i nekk yellan d amdan. Ɣas akken ibɣa wul-iw ad ixdem lxir, nekk ur zmireɣ ara ad t-xedmeɣ, 19axaṭer ur ssawḍeɣ ad xedmeɣ lxir i bɣiɣ, meɛna d cceṛ ur bɣiɣ ara i xeddmeɣ ; 20ma xeddmeɣ ayen ur bɣiɣ ara ihi mačči d nekk i t-ixeddmen meɛna d ddnub-nni izedɣen deg-i. 21Ihi atan wayen fehmeɣ deg iman-iw : Mkul mi ara bɣuɣ ad xedmeɣ lxir ad afeɣ d cceṛ kan iwumi zemreɣ. 22Deg telqay n wul-iw ḥemmleɣ asaḍuf n Yillu, 23meɛna ttafeɣ deg iman-iw yiwen n usaḍuf nniḍen ittnaɣen d usaḍuf wukud temtafaq lefhama-yinu, yerra-yi d ameḥbus n usaḍuf n ddnub yellan deg-i. 24A nekk yellan d ameɣbun ! Anwa ara iyi-d-issukksen si tfekka-agi i yettawin ɣer lmut ? 25Ad neḥmed Illu, s Yasuɛ Lmasiḥ Ssid-nneɣ ! S wakka ihi, s lefhama-inu ḍuɛeɣ asaḍuf n Yillu, meɛna s ṭṭbiɛa n wemdan ḍuɛeɣ asaḍuf n ddnub.
Currently Selected:
At Ṛuma 7: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.