At Ṛuma 2
2
Illu ittḥasab s lḥeqq
(Mt 7.1-5; Yaɛ 2.12-13)
1Ulac fell-ak ssmaḥ a win ittḥasaben wiyaḍ, axaṭer akken tebɣuḍ tiliḍ, mi tettḥasabeḍ wiyaḍ, d iman-ik i tḥusbeḍ, imi kečč i ten-ittḥasaben txeddmeḍ am nutni. 2Neẓra d akken Illu iḥekkem s lḥeqq ɣef wid ixeddmen lecɣal-agi. 3I kečč i yettḥasaben wid ixeddmen lecɣal-agi, ma txeddmeḍ am nutni, tɣileḍ ad tmenɛeḍ i lḥisab n Yillu ? 4Ɛni tḥeqṛeḍ leḥnana d ṣṣber i yesɛa Yillu mebla ceḥḥa ? Ur teẓriḍ ara d akken iṣebber-ak s leḥnana-s i wakken ad tbeddleḍ tikli ? 5Lameɛna kečč yesɣaṛayen ul-ik tugiḍ ad tbeddleḍ tikli, tettheggiḍ i yiman-ik lɛiqab ameqqran i wass n lḥisab, ass i deg ara d-ibin wurrif akked lḥeqq n Yillu 6ara yerren i mkul yiwen ayen ixdem. 7Ad ifk tudert n dayem i wid ixeddmen lxir s ṣṣber, ittnadin ɣef lɛezz d lḥeṛma akked tudert n dayem. 8Ma d wid yellan d imcumen, ikeṛhen tidett, ixeddmen lbaṭel, ad d-isseɣli fell-asen urrif d twaɣit ; 9ad d-isseɣli daɣen ccedda d twaɣit ɣef yal amdan ixeddmen cceṛ, di tazwara ɣef wat Isṛail, ad d-ḍefren leǧnas nniḍen. 10Meɛna ad d-ittunefk lɛezz d lḥeṛma akked lehna i kra n win ixeddmen lxir, i wat Isṛail uqbel, ad d-ḍefren leǧnas nniḍen.
Wid yessnen ṭawrat
11Ɣer Yillu ulac lxilaf gar yimdanen. 12Wid ara idenben mebla ma ssnen ṭawrat, asmi ara mmten ur tḥekkem ara fell-asen ; ma d win ara idenben yili yessen ṭawrat, d ṭawrat ara t-iḥasben. 13Axaṭer mačči d wid ismeḥsisen i usaḍuf i yettwaḥesben d iḥeqqiyen ɣer Yillu, meɛna d wid i ixeddmen ayen i d-yenna. 14Leǧnas ur nessin ara asaḍuf, i ixeddmen s nneya-nsen ayen i d-yenna, uɣalen d asaḍuf i yiman-nsen ɣas akken ur t-sɛin ara. 15Beggnen-d s tikli-nsen d akken ayen i d-yenna usaḍuf, deg ulawen-nsen i yura. D ulawen-nsen i d-ittbegginen annect-a axaṭer axemmem-nsen tikwal ittḥasab-iten, tikwal ittḥuddu fell-asen. 16D annect-agi ara d-ibanen asmi ara iḥaseb Yillu s Yasuɛ Lmasiḥ, ayen akk xeddmen yimdanen s tuffra am akken yella di Lexbeṛ n Lxir i ttbecciṛeɣ.
Ṭawrat akked wat Isṛail
17Kečč iḥesben iman-ik si dderya n wat Isṛail, tettekleḍ ɣef usaḍuf, tettzuxxuḍ s Illu-yik ; 18kečč yessnen lebɣi-s, teẓriḍ d acu i yelhan imi tessneḍ asaḍuf ; 19kečč iɣilen tzemreḍ ad teṭṭfeḍ afus i yiderɣalen, ad tiliḍ d tafat n wid yellan di ṭṭlam ; 20kečč iḥesben iman-ik tzemreḍ ad tesfehmeḍ wid ur nessin, neɣ ad tiliḍ d ccix n warrac axaṭer tufiḍ di ṭawrat tamusni akked tidett ! 21Tesselmadeḍ wiyaḍ, meɛna ur tesselmadeḍ ara iman-ik, tnehhuḍ wiyaḍ ur ttakren ara, kečč s yiman-ik tettakreḍ ; 22tnehhuḍ wiyaḍ ur zennun ara, kečč s yiman-ik tzennuḍ ! Tkeṛheḍ ssadatt kečč tettakreḍ lemqamat-nsen ! 23Tettzuxxuḍ s ṭawrat, meɛna tesseɣlayeḍ lqima n yisem n Yillu imi ur txeddmeḍ ara ayen i d-teqqar ! 24Axaṭer akken yura di Tira Iqedsen : Ɣef ddemma-nwen i yettwargem yisem n Yillu gar leǧnas#2.24 Walit Icaɛya 52.5 ; 12.14 ; 2 Ṣamwil 12.14 ; Ḥizqiyal 36.20. .
25D tidett, ṭṭhaṛa tenfeɛ ma tettabaɛeḍ asaḍuf, meɛna ma ur txeddmeḍ ara ayen i d-yenna usaḍuf, am akken ur teḍhireḍ ara. 26Win ur neḍhir ara, itebɛen asaḍuf, ɛni ur ittwaḥsab ara ɣer Yillu am akken yeḍher ? 27Netta ur neḍhir ara di tfekka-s, ixeddmen ayen i d-yenna usaḍuf, izmer ad ak-iḥaseb kečč iḍehṛen, yessnen asaḍuf meɛna ur txeddmeḍ ara ayen i d-iqqar. 28Win yellan s tidett n wat Isṛail, mačči s uqemmuc kan, neɣ s ṭṭhaṛa i d-ittbanen deg weglim-ines ; 29meɛna mmi-s n wat Isṛail n tidett, d win i t-illan deg ul-ines ; ṭṭhaṛa n ṣṣeḥ, d tin n wul ɣef leḥsab n Ṛṛuḥ imqeddes, mačči ɣef leḥsab n usaḍuf. Asṛayli n tidett, d Illu i t-ittɛuzzun mačči d imdanen.
Currently Selected:
At Ṛuma 2: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.