Matta 9
9
Ukrif iḥlan
(Mq 2.1-12; Lq 5.17-26)
1Yuli Yasuɛ ɣer teflukt, izger ilel yuɣal ɣer temdint n Kafernaḥum. 2Wwin-as-d yiwen wukrif iḍleq ɣef wusu. Mi iwala liman n yimdanen-agi, yenna i wukrif-nni : Ur ttaggad ara a mmi, ttwaɛfan-ak ddnubat-ik. 3Llan dinna kra n imusnawen n ṭawrat ttxemmimen deg wulawen-nsen qqaren : Argaz-agi yekfeṛ ! 4Yasuɛ i yeẓran ayen i ttxemmimen, yenna-yasen : Acuɣer yir axemmem-agi deg ulawen-nwen ? 5D acu i isehlen ad t-id-iniɣ : Ttwaɛfan-ak ddnubat-ik neɣ kker telḥuḍ ? 6Meɛna ilaq ad teẓrem d akken Mmi-s n wemdan yesɛa tazmert di ddunit-agi ad iɛfu ddnubat. Yenna i wukrif-nni : Kker, ddem usu-inek tṛuḥeḍ ɣer wexxam-ik ! 7Imiren, argaz-nni yekker, iṛuḥ ɣer wexxam-is. 8Mi walan ayagi, lɣaci akk ikcem-iten lxuf, ttḥemmiden Illu, imi i d-ifka tazmert am tagi i yimdanen.
Yasuɛ issawel i Matta
(Mq 2.13-17; Lq 5.27-32)
9Mi iɛedda zdat n wexxam anda ttxelliṣen tabzert (lemkes), iwala Yasuɛ yiwen umekkas n tebzert isem-is Matta, yenna-yas : Ddu-d yid-i ! Imiren kan ikker Matta, idda yid-s.
10Mi llan tetten deg wexxam n Matta, aṭas n imekkasen n tebzert akked yir imdanen i d-yusan, qqimen akked Yasuɛ d inelmaden-is, tetten yid-sen. 11Ifariziyen mi walan ayagi nnan i yinelmaden-is : Acuɣer Ssid-nwen itett akked imekkasen n tebzert d yir imdanen ? 12Yasuɛ yesla i wayen i d-nnan, yerra-yasen : Mačči d wid iṣeḥḥan i yeḥwaǧen ṭṭbib, meɛna d wid ihelken. 13Meyyzet ɣef lmeɛna n wawal-agi yellan di Tira Iqedsen : D ulawen yeṣfan i bɣiɣ mačči d iseflawen n lmal. Axaṭer ur d-usiɣ ara ad ssiwleɣ i yiḥeqqiyen i wakken ad d-uɣalen ɣer webrid, meɛna i yimednuben.
Asteqsi ɣef uẓummu
(Mq 2.18-22; Lq 5.33-39)
14Inelmaden n Yeḥya Aɣeṭṭas usan-d ɣer Yasuɛ nnan-as : Acuɣer nekni akked ifariziyen nettuẓum ma d inelmaden-ik ur ttuẓumen ara ? 15Yasuɛ yerra-yasen : Ɛni inebgawen n tmeɣṛa zemren ad ilin di leḥzen skud yella yesli yid-sen ? Ad d-yas wass i deg ara sen-ittwikkes yesli, imiren ad uẓumen. 16Ur nezmir ara ad nxiḍ tafawett tamaynut i uceṭṭiḍ aqdim, axaṭer tafawett-nni tamaynut ad tejbed aceṭṭiḍ-nni aqdim, acerrig-nni ad innerni. 17Ur nettɛemmiṛ ara daɣen iyeddiden iqdimen s ccṛab amaynut, neɣ ma ulac ad fellqen, ccṛab ad inɣel, iyeddiden ad xesṛen ; meɛna ad nerr ccṛab amaynut deg iyeddiden imaynuten, akkenni ccṛab d uyeddid ad ttwiḥerzen.
Ḥeggu n yelli-s n Jayrus, ḥellu n yiwet n tmeṭṭut
(Mq 5.21-43; Lq 8.40-56)
18Mazal Yasuɛ ittmeslay, yusa-d yiwen n ccix n lǧameɛ iseǧǧed zdat-s, yenna-yas : Tura kan i temmut yelli, di leɛnaya-k as-d ad tesserseḍ afus-ik fell-as, ad d-teḥyu ! 19Ikker Yasuɛ yedda yid-s netta d inelmaden-is.
20Attaya yiwet n tmeṭṭut yuḍnen ssiq tnac yiseggasen aya, tekka-yas-d si deffir, tennul tacḍaṭ n ubeṛnus-is, 21axaṭer teqqar deg ul-is : Lemmer zemreɣ ad nnaleɣ ɣas ula d tacḍaṭ n ubeṛnus-is, ad ḥluɣ. 22Yasuɛ yezzi ɣer deffir, mi tt-iwala yenna-yas : Ur ttaggad a yelli, liman-inem isseḥla-kkem. Seg imiren tameṭṭut-nni teḥla.
23Mi yewweḍ Yasuɛ ɣer wexxam n ccix-nni, yufa lɣaci ttmeǧǧiden, yerna nhewwalen meṛṛa. Yenna-yasen : 24Ffɣet syagi, taqcict ur temmut ara, d iḍes kan i teṭṭes. Dɣa smesxiṛen fell-as. 25Mi ssufɣen lɣaci, ikcem, iṭṭef-d taqcict-nni seg ufus, dɣa tekker-d. 26Iffeɣ lexbeṛ-agi di tmurt meṛṛa.
Ḥellu n sin iderɣalen
27Mi iṛuḥ Yasuɛ syenna, tebɛen-t sin iderɣalen, ttɛeggiḍen : A mmi-s n Dawed, ḥun fell-aɣ ! 28Mi yewweḍ ɣer wexxam, iderɣalen-nni kecmen ɣuṛ-s, dɣa yenna-yasen Yasuɛ : Tumnem d akken zemreɣ ad wen-xedmeɣ ayen i yi-d-tessutrem ? Rran-as : Ih a sidi numen ! 29Innul allen-nsen, yenna : Ad wen-ittwixdem ɣef wakken yella liman-nwen ! 30Dɣa yuɣal-asen-d yeẓri. Iggull deg-sen Yasuɛ yenna-yasen : Ɣuṛ-wat ad iffeɣ lexbeṛ ɣef wayagi ! 31Meɛna akken kan ffɣen, bdan aberreḥ, lexbeṛ-nni yekka-d meṛṛa tamurt.
Ḥellu n win yesgugem uṛuḥani
32Mi ṛuḥen sin-nni, ha-ten-aya wiyaḍ wwin-as-d yiwen wergaz i yesgugem uṛuḥani. 33Akken issufeɣ Yasuɛ aṛuḥani-nni, agugam-nni ibda ittmeslay. Lɣaci akk tɛeǧǧben, qqaren : Leɛmeṛ neẓri ayagi di tmurt n wat Isṛail ! 34Lameɛna ifariziyen qqaren : S tezmert n ugellid n leǧnun i ten-issufuɣ.
Wid iḍaɛen
(Mq 6.34; Lq 10.2)
35Yasuɛ ikka-d ɣef temdinin d tudrin meṛṛa, isselmad di leǧwameɛ-nsen, ittbecciṛ Lexbeṛ n Lxir n tgelda, isseḥlay mkul aṭṭan d mkul lɛib.
36Mi iwala Yasuɛ annect-nni n lɣaci ɣaḍen-t axaṭer feclen yerna ḍaɛen am ulli ur nesɛi ameksa. 37Dɣa yenna i yinelmaden-is : Tamegra meqqret, meɛna drus ifellaḥen i yellan. 38Ḥellelet ihi bab n tmegra ad d-iceggeɛ ixeddamen ɣer tmegra-s.
Currently Selected:
Matta 9: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.