Matta 8
8
Amdan iḥlan si lbeṛs
(Mq 1.40-45; Lq 5.12-16)
1Mi d-yuder Yasuɛ seg udrar, aṭas n lɣaci i t-d-itebɛen. 2Ataya yiwen wemdan ihelken lbeṛs yusa-d ɣuṛ-s, iseǧǧed zdat-s, yenna-yas : A sidi, ma tebɣiḍ, tzemreḍ ad iyi-tesseḥluḍ. 3Yessers Yasuɛ afus-is fell-as, yenna-yas : Bɣiɣ ! Ḥlu ! Imiren kan iḥla wergaz-nni si lbeṛs-ines, iṣfa weglim-is. 4Yasuɛ yenna-yas : Ḥader ad teḥkuḍ ula i yiwen ɣef wayagi, meɛna ṛuḥ ɣer yiwen seg imseflen ad ak-iẓer, ad iwali d akken teṣfiḍ, tefkeḍ lweɛda-nni n tezdeg s wayes i wen-d-yumeṛ nnbi Musa, i wakken ayagi ad sen-yili d ttbut.
Aqeddac n lḥakem aṛumani
(Lq 7.1-10)
5Akken i yekcem Yasuɛ ɣer temdint n Kafernaḥum, ataya yiwen umeqqran n lɛeskeṛ aṛumani iqeṛṛeb-d ɣuṛ-s, iḥellel-it, yenna-yas : 6A sidi, aqeddac-iw inṭer, atan iḍleq deg wexxam, ikref ! 7Yasuɛ yenna-yas : Ad ṛuḥeɣ ad t-sseḥluɣ. 8Yerra-yas umeqqran n lɛeskeṛ : A sidi, ur uklaleɣ ara ad tkecmeḍ ɣer wexxam-iw, meɛna ini-d kan yiwen n wawal, aqeddac-iw ad iḥlu. 9Axaṭer nekk s yiman-iw akken i sɛiɣ wid iḥekkmen fell-i, i sɛiɣ wid yellan seddaw n leḥkem-iw. Ad iniɣ i yiwen ṛuḥ ad iṛuḥ, ad iniɣ i wayeḍ aṛwaḥ ad d-yas, ad iniɣ daɣen i uqeddac-iw : Xdem aya, ad t-ixdem. 10Mi yesla Yasuɛ imeslayen-agi itɛeǧǧeb, yenna i wid yellan dinna : Ad wen-iniɣ tidett, gar wat Isṛail meṛṛa ur ufiɣ ara liman am wagi. 11Ad wen-iniɣ daɣen : Aṭas ara d-yasen seg usamar d umalu, ad ṭṭfen imukan ɣer tama n Ibrahim, n Isḥaq akked Yaɛqub di tgelda n igenwan. 12Meɛna aṭas seg wid i iɣilen ad weṛten tagelda ara yettwiḍeggren ɣer beṛṛa, ɣer ṭṭlam anda ara ilin imeṭṭawen, nndama tameqqrant akked weqṛac n tuɣmas. 13Yenna Yasuɛ i umeqqran-nni n lɛeskeṛ : Ṛuḥ, imi tumneḍ atan wayen i tḍelbeḍ ad ak-d-yaweḍ ! Di teswiɛt-nni, iḥla uqeddac-is.
Yasuɛ isseḥlay imuḍan
(Mq 1.29-34; Lq 4.38-41)
14Iṛuḥ Yasuɛ ɣer wexxam n Buṭrus, yufa taḍeggalt n Buṭrus deg usu tuɣ-itt tawla. 15Innul afus-is, dɣa teffeɣ-itt tawla-nni. Imiren kan tekker-d, tebda tqeddec-asen.
16Mi yeɣli yiṭij, wwin-d i Yasuɛ aṭas n yimdanen ittwamelken. S wawal-is, issufeɣ seg-sen leǧnun yerna isseḥla imuḍan meṛṛa. 17Ixdem ayagi i wakken ad ittwikemmel wawal i d-yenna nnbi Icaɛya : Yewwi leɛyub-nneɣ, iɛebba lehlakat-nneɣ#8.17 Walit Icaɛya 53.4..
Win ibɣan ad iddu d Yasuɛ
18Mi iwala Yasuɛ annect-nni n lɣaci yezzi-yas-d, yumeṛ i yinelmaden-is ad zegren ɣer ugemmaḍ n yilel. 19Yiwen n umusnaw n ṭawrat iqeṛṛeb ɣer Yasuɛ yenna-yas : A sidi, anda teddiḍ ad dduɣ. 20Yasuɛ yerra-yas : Uccanen sɛan lɣiṛan, ifṛax n igenni sɛan leɛcuc, ma d Mmi-s n wemdan ur isɛi ara anda ara yessers aqerruy-is. 21Yiwen seg inelmaden-is, yenna-yas : A sidi, semmeḥ-iyi ad ṛuḥeɣ ad meḍleɣ baba. 22Yasuɛ yerra-yas : Ddu yid-i eǧǧ lmeyytin ad meḍlen lmeyytin-nsen.
Tabuciḍant
(Mq 4.35-41; Lq 8.22-25)
23Yuli Yasuɛ ɣer teflukt, ddan yid-s yinelmaden-is. 24Deg yiwet n teswiɛt, tekker-d tbuciḍant deg ilel armi tɣumm teflukt-nni s lemwaji. Yasuɛ yella iṭṭes. 25Qeṛṛben ɣuṛ-s inelmaden-is, ssakin-t-id, nnan-as : A sidi, sellek-aɣ ma ulac ad nemmet ! 26Yenna-yasen : Acimi tuggadem, a wid iwumi ixuṣṣ liman ! Imiren ikker, yumeṛ i waḍu d yilel ad rsen dɣa ters-d talwit d tameqqrant. 27Wid iḥedṛen, tɛeǧǧben qqaren : Anwa-t wagi ? Ula d aḍu d yilel ttaɣen-as awal !
Tarbaɛt n leǧnun
(Mq 5.1-20; Lq 8.26-39)
28Mi yewweḍ Yasuɛ agemmaḍ i yilel, ɣer tmurt n wat Ǧadara, ha-ten-aya sin n yirgazen ittwazedɣen, ffɣen-d si tmeqbeṛt, mmugren-t-id. Yiwen ur izmir ad iɛeddi seg webrid-nni axaṭer weɛṛen aṭas. 29Bdan ttɛeggiḍen : D acu i tebɣiḍ ɣuṛ-neɣ a Mmi-s n Yillu ? Tusiḍ-d i wakken ad aɣ-tɛettbeḍ uqbel lweqt ?
30Di lejwahi-nni, tella yiwet n tqeḍɛit tameqqrant n yilfan i ikessen dinna. 31Leǧnun-nni ttḥellilen deg Yasuɛ, qqaren-as : Ma tqeccɛeḍ-aɣ, ceggeɛ-aɣ ɣer tqeḍɛit-ihina n yilfan. 32Yasuɛ yenna-yasen : Ṛuḥet ! Ffɣen si sin-nni n yimdanen, kecmen deg yilfan-nni. Imiren kan, grarben ɣer daxel n yilel, ɣeṛqen, mmuten akk. 33Imeksawen-nni rewlen, ṛuḥen ɣer temdint ad ḥkun ayen akk iḍran d yirgazen-nni yettwamelken. 34Imezdaɣ akk n temdint ffɣen-d ɣer Yasuɛ ; mi d-wwḍen ɣuṛ-s, ḥellelen-t ad iffeɣ si tmurt-nsen.
Currently Selected:
Matta 8: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.