Matta 16
16
Ifariziyen akked isaduqiyen ssuturen lbeṛhan
(Mq 8.11-21)
1 Ifariziyen d isaduqiyen qeṛṛben ɣer Yasuɛ, ssutren-as lbeṛhan i wakken ad t-jeṛṛben. 2Yasuɛ yerra-yasen : Mi ara yeɣli yiṭij, twalam igenni d azeggaɣ, teqqarem ad ilhu lḥal. 3Akken daɣen taṣebḥit, teqqarem ad d-iwwet ugeffur axaṭer yella usigna. Amek ! Tessnem ad tfehmem lḥal n igenni, ur tezmirem ara ad tfehmem licaṛat yeɛnan lweqt-agi !
4Lǧil am wagi ijehlen ixeddɛen Illu, issutur lbeṛhan ! Meɛna ur as-d-ittunefkay ara lbeṛhan nniḍen anagar win n nnbi Yunes !
Dɣa iṛuḥ, iǧǧa-ten.
5Mi zegren agemmaḍ i yilel, inelmaden-is ttun ur wwin ara yid-sen aɣṛum. 6Yasuɛ yenna-yasen : Ḥadret iman-nwen seg temtunt n ifariziyen d isaduqiyen ! 7Inelmaden xemmemen deg yiman-nsen, nnan : Ahat imi ur d-newwi ara yid-neɣ aɣṛum i aɣ-d-yenna akka ! 8Yasuɛ iẓra ɣef wacu i ttxemmimen yenna-yasen : A wid i ixuṣṣen di liman ! Tɣilem imi ur d-tewwim ara aɣṛum i wen-d-nniɣ akka ? 9Mazal ur tefhimem ara ? Ɛni tettum yakan xemsa n teḥbulin-nni n weɣṛum i bḍiɣ i xemsa alaf n yirgazen ? D wacḥal n iqecwalen i d-iggran ? 10Ur tecfim ara daɣen ɣef sebɛa teḥbulin-nni n weɣṛum i bḍiɣ i ṛebɛa alaf n yimdanen, d wacḥal n iqecwalen i d-terram ? 11Amek akka ur tefhimem ara d akken mačči ɣef weɣṛum i wen-d-ttmeslayeɣ ? Ḥadret iman-nwen seg temtunt n ifariziyen d isaduqiyen ! 12Imiren inelmaden-is fehmen d akken mačči ɣef temtunt i sen-d-immeslay, lameɛna ad ḥadren iman-nsen ɣef uselmed n ifariziyen d isaduqiyen.
Anwa-t Yasuɛ ?
(Mq 8.27-30; Lq 9.18-21)
13Mi yewweḍ Yasuɛ ɣer tmurt n Qiṣarya n Filibus, isteqsa inelmaden-is, yenna-yasen : D acu i d-qqaren medden ɣef Mmi-s n wemdan ? 14Rran-as : Kra qqaren d Yeḥya Aɣeṭṭas, wiyaḍ qqaren d nnbi Iliya, wiyaḍ daɣen d nnbi Irmiya neɣ d yiwen si gar lanbiya. 15Yasuɛ yenna-yasen : I kunwi, d acu-yi ɣuṛ-wen ? 16Buṭrus yerra-yas : Kečč d Lmasiḥ, Mmi-s n Yillu yeddren ! 17Inṭeq ɣuṛ-s yenna-yas : Amarezg-ik, a Buṭrus a mmi-s n Yunes, axaṭer mačči s tmusni-inek i tfehmeḍ ayagi, meɛna d Baba yellan deg igenwan i ak-t-id-isbeggnen. 18Ihi nekk ad ak-iniɣ : Kečč a Buṭrus d aẓru, yerna ɣef weẓru-agi ara bnuɣ tamezdayt-inu, ula d tinezmarin n lmut ur ttaṭṭafent ara zdat-s ! 19Ad ak-fkeɣ tisura n tgelda n igenwan, ayen ara teqqneḍ di lqaɛa ad ittwiqqen deg igenwan, ayen ara tserrḥeḍ di lqaɛa ad ittwiserreḥ deg igenwan. 20Imiren yumeṛ i yinelmaden-is ur qqaren ula i yiwen d akken d netta i d Lmasiḥ.
Yasuɛ ixebbeṛ-d ɣef lmut-is
(Mq 8.31-38; Lq 9.22-27)
21Seg imiren, Yasuɛ ibda issefham i yinelmaden-is d akken ilaq ad yali ɣer temdint n Urucalim, anda ara yenneɛtab aṭas gar ifassen n imṛayen, d imseflen imeqqranen akked imusnawen n ṭawrat, ad ḥekmen fell-as s lmut, ass wis tlata ad d-iḥyu si gar lmeyytin. 22Buṭrus ijbed-it weḥd-s, yenna-yas : Ad ak-imneɛ Yillu a sidi, awer d-iḍru wayagi yid-k ! 23Yezzi ɣuṛ-s Yasuɛ yenna-yas : Beɛɛed akkin fell-i a cciṭan ! Tebɣiḍ ad tiliḍ d ugur deg webrid-iw ! Ixemmimen-ik ur d-kkin ara sɣuṛ Yillu, lameɛna d ixemmimen n yimdanen.
24Imiren Yasuɛ yenna i yinelmaden-is : Kra win yebɣan ad iddu yid-i, ilaq ur ittḥebbiṛ ara ɣef yiman-is, ad ibibb amidag-is wa yi-tbeɛ. 25Kra win yebɣan ad isellek taṛwiḥt-is, ad as-tṛuḥ ; ma d win isebblen taṛwiḥt-is ɣef ddemma-w ad yuɣal ad tt-yaf. 26D acu n lfayda ara yesɛu wemdan di rrbeḥ n ddunit meṛṛa, ma yesṛuḥ taṛwiḥt-is ? Neɣ d acu i yezmer ad t-ifk wemdan i wakken ad d-ifdu taṛwiḥt-is ? 27Axaṭer Mmi-s n wemdan ad d-yas netta d lmalayek-is di lɛaḍima n Baba-s, ad ifk i yal yiwen ayen yuklal, yal yiwen ɣef leḥsab n lefɛayel-is. 28Ad wen-iniɣ tidett : Llan kra seg wid yellan dagi, ur ttmettaten ara alamma ẓran Mmi-s n wemdan yusa-d d agellid.
Currently Selected:
Matta 16: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.