Matta 14
14
Lmut n Yeḥya Aɣeṭṭas
(Mq 6.14-29; Lq 9.7-9)
1Di lweqt-nni, Hirudus i iḥekmen ɣef tmurt n Jlili mi yesla s Yasuɛ, 2yenna i yiqeddacen-is : D Yeḥya Aɣeṭṭas ! D netta i d-iḥyan si gar lmeyytin, daymi i yesɛa tazmert s wayes ixeddem lbeṛhanat.
3D agellid Hirudus i yefkan yakan lameṛ ad qqnen Yeḥya s snasel, ad t-rren ɣer lḥebs. Ayagi ɣef sebba n Hirudyad, tameṭṭut n Filibus yellan d gma-s n Hirudus. 4Axaṭer Yeḥya yella yeqqar i Hirudus : D leḥṛam fell-ak ad tesɛuḍ Hirudyad d tameṭṭut-ik ! 5Seg imiren, Hirudus ittqellib ad ineɣ Yeḥya, meɛna ikukra agdud n wat Isṛail axaṭer ḥesben-t akk d nnbi. 6Ass n lɛid n umulli n Hirudus, yelli-s n Hirudyad tecḍeḥ zdat inebgawen, tɛeǧb-as aṭas i Hirudus, 7armi i as-iɛuhed, ad as-ifk ayen ara as-d-tessuter. 8Tweṣṣa-tt yemma-s ad as-tini : Awi-yi-d ɣer dagi aqerruy n Yeḥya Aɣeṭṭas deg uḍebsi. 9Agellid Hirudus iḥzen aṭas, immuɣben, lameɛna ɣef ddemma n limin i yeggull zdat inebgawen-is, issendeh ad as-t-id-awin. 10Iceggeɛ ad as-kksen aqerruy i Yeḥya Aɣeṭṭas di lḥebs ; 11wwin-as-t-id i teqcict-nni deg uḍebsi, nettat tefka-t i yemma-s. 12Inelmaden n Yeḥya usan-d ad awin lǧetta-s i wakken ad tt-meḍlen ; imiren ṛuḥen ssawḍen-as lexbeṛ i Yasuɛ.
Yasuɛ issečč xemsa alaf n yimdanen
(Mq 6.30-44; Lq 9.10-17; Yuḥ 6.1-14)
13Mi yesla Yasuɛ s lexbeṛ n Yeḥya, yuli ɣer teflukt, iṛuḥ yeɛzel iman-is deg wemkan yexlan. Akken slan lɣaci s waya, ffɣen-d si tudrin, tebɛen-t ɣef wuḍar. 14Mi i d-yers Yasuɛ si teflukt, iwala annect-nni n lɣaci dɣa ɣaḍen-t, yerna yesseḥla imuḍan-nsen.
15Mi yeɣli yiṭij, inelmaden n Yasuɛ qeṛṛben ɣuṛ-s, nnan-as : Amkan-agi ixla yerna iṛuḥ lḥal ; ini-yasen i lɣaci-yagi ad ṛuḥen ɣer tudrin i wakken ad d-aɣen ayen ara ččen. 16Yasuɛ yerra-yasen : Acuɣer ara ṛuḥen, fket-asen kunwi ad ččen ! 17Nnan-as : Ɣuṛ-neɣ anagar xemsa n teḥbulin n weɣṛum, d sin iselman. 18Yerra-yasen : Awit-ten-id ɣer dagi ! 19Yenna i lɣaci ad qqimen ɣef leḥcic, iddem-d xemsa-nni n teḥbulin n weɣṛum d sin-nni n iselman, irfed allen-is ɣer igenni, iḥmed Ṛebbi. Ibḍa aɣṛum-nni, ifka-t i yinelmaden-is, feṛqen-t i lɣaci. 20Ččan akk armi ṛwan, yerna inelmaden-is ččuṛen-d tnac iqecwalen n wayen i d-iggran. 21Ad ilin azal n xemsa alaf n yirgazen i yeččan, mebla tilawin d warrac.
Yasuɛ ileḥḥu ɣef waman
(Mq 6.45-52; Yuḥ 6.15-21)
22Imiren kan, Yasuɛ iḥreṣ inelmaden-is ad alin ɣer teflukt i wakken ad zwiren ɣer rrif nniḍen n yilel, ma d netta ad irr lɣaci-nni. 23Mi ṛuḥen akk lɣaci-nni, yuli ɣer wedrar, iḍerref iman-is i wakken ad iẓẓall ; mi d-yeɣli yiḍ yufa-t-id lḥal weḥd-s.
24Taflukt-nni tella di tlemmast n yilel, lemwaji kkatent-tt axaṭer iqubel-iten-id waḍu. 25Mi qṛib ad yali wass, ataya Yasuɛ iteddu-d ɣef wuḍar s ufella n waman. 26Akken i t-walan ileḥḥu ɣef waman, inelmaden-is xelɛen qqaren : D lexyal ! Bdan ttɛeggiḍen s lxuf. 27Meɛna imiren kan Yasuɛ yenna-yasen-d : Ur xellɛet ara, d nekk ! Ur ttaggadet ara ! 28Dɣa Buṭrus yenna-yas : A sidi, ma yella d keččini, efk-d lameṛ ad n-aseɣ ɣuṛ-k ɣef wuḍar s ufella n waman. 29Yasuɛ yenna-yas : As-d ! Buṭrus yers-d si teflukt, ileḥḥu ɣef waman, iteddu ɣer Yasuɛ. 30Meɛna mi iwala ikker-d waḍu, ikcem-it lxuf, ibda izedder, dɣa iɛeggeḍ : A sidi, sellek-iyi ! 31Imiren kan, Yasuɛ iḍleq afus-is, ijbed-it-id yenna-yas : A win iwumi ixuṣṣ liman ! Acuɣer i ak-ikcem ccekk ? 32Ulin ɣer teflukt di sin, dɣa ires waḍu-nni. 33Inelmaden-nni yellan di teflukt seǧǧden zdat n Yasuɛ nnan-as : D tidett, d kečč i d Mmi-s n Yillu !
34Zegren ilel-nni, armi wwḍen ɣer tmurt n Jiniṣarit. 35Imezdaɣ n ljiha-nni ɛeqlen Yasuɛ, dɣa ceggɛen ɣer yal ljiha n tmurt, wwin-as-d imuḍan-nsen meṛṛa. 36Ḥellelen-t i wakken ad ten-iǧǧ ad nnalen ɣas ula d tacḍaṭ uqenduṛ-is. Wid akk i t-innulen, ḥlan.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.