Matta 13
13
Lemtel n win izerrɛen
(Mq 4.1-12; Lq 8.4-10)
1Ass-nni kan, iffeɣ-d Yasuɛ seg wexxam, iṛuḥ ad iqqim rrif n yilel, 2d izumal n lɣaci i as-d-izzin, dɣa yuli ɣer teflukt, iqqim. Lɣaci ibedd ɣef rrif n yilel, 3netta ibda isselmad-iten s lemtul iqqar-asen : Yiwen ufellaḥ iffeɣ ad izreɛ.
4Mi izerreɛ, ɣlin-as kra n iɛeqqayen rrif n webrid, usan-d igḍaḍ (ifṛax igenni) ččan-ten. 5Kra iɛeqqayen nniḍen ɣlin deg wakal yeččuṛen d iẓra, mɣin-d s lemɣawla axaṭer ulac aṭas n wakal. 6Mi yebda wezɣal, izlef imɣan-nni dɣa qquren, axaṭer ur sɛin ara iẓuran lqayen. 7Kra iɛeqqayen nniḍen ɣlin gar isennanen. Isennanen-nni gman dɣa ɣummen-ten. 8Meɛna kra iɛeqqayen ɣlin deg wakal yelhan : Fkan-d tigedrin, ta tefka-d meyya n iɛeqqayen, ta settin, tayeḍ tlatin. 9Win yesɛan imeẓẓuɣen isel-d !
10Inelmaden-is qeṛṛben ɣuṛ-s, nnan-as : Acimi i sen-theddṛeḍ s lemtul ? 11Yerra-yasen : Kunwi yettunefk-awen ad tissinem lbaḍna n tgelda igenwan, ma d wiyaḍ, ur sen-d-ittunefk ara. 12Axaṭer win yesɛan ad as-nernu alamma yella di tawant, ma d win ur nesɛi ara, ad as-nekkes ula d ayen yesɛa. 13Daymi i sen-ttmeslayeɣ s lemtul, axaṭer ttmuqulen ur ttwalin, ttḥessisen ur sellen, ur fehhmen. 14S wakka, iḍra-d yid-sen wayen i d-ixebbeṛ fell-asen nnbi Icaɛya :
Ad tsellem s imeẓẓuɣen-nwen, ur tfehhmem ara,
ad tettmuqulem s wallen-nwen, ur tettwalim ara,
15 Imi agdud-agi qquren wulawen-nsen,
qeflen imeẓẓuɣen-sen, qqnen allen-nsen,
i wakken ur ttwalin, ur sellen ; sseɣṛen
ulawen-nsen, ugin ad fehmen, axaṭer
lemmer tuben, uɣalen-d ɣer webrid, tili
sseḥlaɣ-ten # 13.15 Walit
Icaɛya
6. 9-10 ; Yuḥenna12.40 ; Lecɣal n Imceggɛen 28. 26-27..
16Ma d kunwi amarezg-nwen ! Axaṭer allen-nwen ttwalint, imeẓẓuɣen-nwen sellen. 17Aql-i nniɣ-awen tidett, aṭas si lanbiya akked imdanen iḥeqqiyen i yebɣan ad walin ayen tettwalim, ur t-walan, ad slen ayen tsellem, ur t-slin.
Lmeɛna n lemtel n win izerrɛen
(Mq 4.13-20; Lq 8.11-15)
18Ad wen-d-iniɣ lmeɛna n lemtel n win izerrɛen : 19Mi ara isel wemdan i wawal yeɛnan tagelda n igenwan, ur t-ifhim ara, ittemcabi ɣer yiri n webrid i ɣer tɣelli zzerriɛa ; d cciṭan i d-ittasen ad iqleɛ ayen izerɛen deg ul-is. 20Wayeḍ ittemcabi ɣer wakal-nni yeččuṛen d iẓra anda teɣli zzerriɛa. Mi ara isel i Wawal n Yillu, iqebbel-it s lfeṛḥ, 21meɛna ur t-ittaǧǧa ara ad iger iẓuran deg-s, ur ittaṭṭaf ara. Mi ara d-tas lmeḥna neɣ aqehheṛ ɣef ddemma n Wawal n Yillu, ad iǧǧ imiren kan liman-is. 22Wayeḍ daɣen ittemcabi ɣer zzerriɛa yeɣlin gar isennanen. Mi ara isel i Wawal n Yillu, iɣeblan n ddunit d ṭṭmeɛ n rrbeḥ ttɣummun awal-nni, dɣa ur d-ittak ara lfakya. 23Wayeḍ icuba daɣen ɣer zzerriɛa yeɣlin deg wakal yelhan, mi ara isel i Wawal n Yillu, ifehhem-it, daymi i d-ittak lfakya ! Yal aɛeqqa ittak-d : Wa tlatin, wa settin, wa meyya n tɛeqqayin.
Lemtel n ukerfa
24Yefka-yasen-d Yasuɛ lemtel nniḍen : Tagelda n igenwan tcuba ɣer yiwen wergaz i izerɛen irden deg iger-is. 25Yiwen yiḍ mi ṭṭsen akk medden, yusa-d weɛdaw-is izreɛ akerfa gar yirden, imiren iṛuḥ. 26Mi d-gman yirden-nni fkan-d tigedrin, akerfa-nni ula d netta igma-d. 27Iqeddacen n bab n iger-nni, usan-d ɣuṛ-s nnan-as : A sidi, ɛni mačči d irden i tzerɛeḍ deg iger-ik ? Ansi i d-ikka ihi ukerfa-agi ? 28Yerra-yasen : D yiwen weɛdaw i ixedmen akka ! Iqeddacen-nni nnan-as : Ihi tebɣiḍ ad nṛuḥ ad neqleɛ akerfa-agi ? 29Yerra-yasen : Xaṭi ! Axaṭer mi ara tekksem akerfa, tzemrem ad d-teglum s yirden. 30Anfet-asen ad gmun di sin alamma d tamegra. Ass-nni, ad sen-iniɣ i wid imeggren : Qelɛet-d uqbel akerfa, cuddet-tt d tadliwin i wakken ad tent-nesseṛɣ ma d irden jemɛet-tten-id ɣer ikufan-iw.
Lemtel n uɛeqqa n uxerdel
(Mq 4.30-32; Lq 13.18-19)
31Yeka-yasen-d Yasuɛ lemtel nniḍen : Tagelda n igenwan tcuba ɣer yiwen uɛeqqa n uxerdel i d-iddem yiwen wergaz i wakken ad t-izreɛ deg iger-is. 32Aɛeqqa-yagi d netta i d amecṭuḥ meṛṛa gar zzerriɛat yellan, lameɛna mi yettwazreɛ, igemmu ittali alamma ikka-d sennig akk yemɣan n tebḥirt, iggar-d ifurkawen d imeqqranen, ula d ifṛax n igenni, bennun leɛcuc-nsen s ufella-s#13.32 Walit Ḥizqiyal17.23..
Lemtel n temtunt
(Lq 13.20-21)
33Yenna-yasen-d Yasuɛ lemtel nniḍen : Tagelda n igenwan tettemcabi ɣer temtunt ara d-teddem tmeṭṭut ad tt-tessexleḍ i tlata n lkilat n uwren, s wakka arekti-nni meṛṛa ad yali.
34Yasuɛ ittmeslay-d i lɣaci anagar s lemtul, ur sen-iheddeṛ ara mebla lemtul. 35Ittmeslay-asen-d akka i wakken ad iḍru wayen i d-nnan lanbiya :
Ad sen-mmeslayeɣ s lemtul,
ad sen-beccṛeɣ tiɣawsiwin
yeffren seg wasmi i d-texleq ddunit # 13.35 Walit
Ihellilen
78.2..
Yasuɛ issefhem-d lemtel n ukerfa
36Mi yekfa Yasuɛ ameslay, lɣaci ṛuḥen, netta ikcem ɣer wexxam. Inelmaden-is qeṛṛben ɣuṛ-s nnan-as : Ssefhem-aɣ-d lemtel n ukerfa deg iger. 37Yerra-yasen-d : Win izerrɛen irden d Mmi-s n wemdan ; 38iger, d ddunit ; irden, d wid ittekkan di tgelda n igenwan ; ma d akerfa, d widak ittekkan d cciṭan ; 39aɛdaw i izerrɛen akerfa, d cciṭan ; tamegra, d taggara n ddunit ; ma d wid imeggren, d lmalayek. 40Akken i qellɛen akerfa ḍeggiren-t ɣer tmes, akken daɣen ara teḍru di taggara n ddunit. 41Mmi-s n wemdan ad d-iceggeɛ lmalayek-is, ad ssufɣen si tgelda-s wid akk yesseɣlayen wiyaḍ di ddnub akked wid ixeddmen cceṛ, 42dɣa ad ten-ḍeggren ɣer tmes anda ara yilin imeṭṭawen d nndama tameqqrant ; 43ma d wid iḍuɛen Illu, ad feǧǧeǧen am yiṭij di tgelda n Baba-tsen. Win yesɛan imeẓẓuɣen isel-d !
Lemtel n ugerruj yeffren
44Tagelda n igenwan tettemcabi ɣer ugerruj yeffren deg yiwen n yiger. Yiwen wergaz yufa-t, yuɣal iffer-it. Si lfeṛḥ-nni i yefṛeḥ, iṛuḥ izzenz ayen akk yesɛa i wakken ad yaɣ iger-nni.
Lemtel n tɛeqquct
45Tagelda n igenwan tettemcabi daɣen ɣer yiwen n ttajer ittqelliben tiɛeqcin ifazen. 46Mi yufa yiwet ifazen ɣef tiyaḍ, iṛuḥ izzenz ayen akk yesɛa, yuɣal-d yuɣ-itt.
Lemtel n ucebbak
47Tagelda n igenwan tettemcabi daɣen ɣer ucebbak ittwaḍeggren ɣer yilel, i wakken ad d-iṭṭef iselman (lḥut) n mkul ṣṣenf. 48Mi ara yeččaṛ, iḥewwaten ad t-id-jebden ɣer rrif n yilel, dɣa ad qqimen i wakken ad fernen iselman, ad jemɛen wid yelhan, ad ḍeggren wid n diri. 49Akka ara teḍru di taggara n ddunit : Lmalayek ad d-asen ad d-ddmen imcumen si gar iḥeqqiyen, 50i wakken ad ten-ḍeggren ɣer tmes anda llan imeṭṭawen d nndama tameqqrant.
51Yasuɛ yenna-yasen : Tfehmem ayagi meṛṛa ? Rran-as : Ih a sidi, nefhem !
52Yenna-yasen : Ihi, yal amusnaw n ṭawrat ara ifehmen tagelda n igenwan, icuba ɣer bab n wexxam i d-ittekksen seg ugerruj-is tiɣawsiwin timaynutin, akked tɣawsiwin tiqdimin.
Ulac nnbi yettwaqeblen di tmurt-is
(Mq 6.1-6; Lq 4.16-30)
53Mi d-yenna Yasuɛ lemtul-agi, iṛuḥ syenna. 54Irra ɣer taddart i deg ittuṛebba. Isselmad di lǧameɛ-nsen, lɣaci akk iḥedṛen wehmen, qqaren : Ansi i as-d-tekka tmusni-yagi akked tezmert s wayes ixeddem lbeṛhanat-agi ? 55Mačči d netta i d mmi-s n uneǧǧaṛ-nni ? Ɛni yemma-s mačči d tin iwumi qqaren Meryem ? Atmaten-is mačči d Yaɛqub, Yusef, Semɛun akked Yuda ? 56Issetma-s daɣen, mačči gar-aneɣ i llant ? Ansi i as-d-ikka ihi wannect-agi ? 57Ɣef wayagi akk i sen-illa d sebba n tuccḍa, ugin ad amnen yis. Dɣa yenna-yasen Yasuɛ : Nnbi ittwaḥqaṛ anagar di tmurt-is akked wexxam-is. 58Yasuɛ ur ixdim ara aṭas n lbeṛhanat dinna, axaṭer ugin ad amnen.
Currently Selected:
Matta 13: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.