Lecɣal n Imceggɛen 26
26
Bulus idufeɛ ɣef yiman-is
(Lcɣ 9.1-30; 22.1-21)
1Aɣribas yenna i Bulus : Atan ɣuṛ-k wawal, tzemreḍ ad tdafɛeḍ ɣef yiman-ik.
Bulus yerfed afus-is i wakken ad idafeɛ ɣef yiman-is, yenna :
2Feṛḥeɣ aṭas ay agellid Aɣribas imi zdat-k ara ɛeddiɣ di ccṛeɛ ass-agi ɣef wayen akk i cetkan fell-i wat Isṛail, 3axaṭer tessneḍ akken ilaq leɛwayed akked imeslayen-nsen ; di leɛnaya-k ihi semḥess-iyi-d s leɛqel.
4At Isṛail ssnen tikli-inu si temẓi-w, axaṭer ttuṛebbaɣ di temdint n Urucalim gar warraw n tmurt-iw. 5Ssnen-iyi si zik ma bɣan ad cehden fell-i. Lliɣ d afarizi, tebɛeɣ leqwanen iweɛṛen yeɛnan ddin-nneɣ di tejmaɛt n ifariziyen. 6Beddeɣ ass-agi di ccṛeɛ axaṭer ssarmeɣ ad tettwikmel lemɛahda-nni i yefka Yillu i lejdud-nneɣ. 7Tnac n iderman-nneɣ i iɛebden Illu am yiḍ am ass, ttṛaǧun ad d-taweḍ lemɛahda-agi i ssaramen. Ɣef usirem-agi i cetkan wat Isṛail fell-i. 8Ay agellid Aɣribas, acuɣer i tɣilem d lmuḥal ad d-isseḥyu Yillu lmeyytin ?
9Nekk s yiman-iw, lliɣ ttxemmimeɣ d akken yewwi-d ad xaṣmeɣ s ttawilat akk yellan, isem-agi n Yasuɛ Anaṣari ; 10d ayen i xedmeɣ di temdint n Urucalim, rriɣ aṭas n imasiḥiyen ɣer lḥebs, yerna d imseflen imeqqranen i yi-d-ifkan ttesriḥ-agi. Mi ara ḥekkmen fell-asen s lmut, nekkini qebbleɣ ; 11qehṛeɣ-ten acḥal d abrid si lǧameɛ ɣer wayeḍ, ḥerṣeɣ-ten ad ṭṭixṛen i webrid-agi n Yasuɛ ; deg urrif-iw ameqqran, ttṛuḥeɣ armi d timdinin tibeṛṛaniyin i wakken ad ten-qehhṛeɣ.
Bulus yeḥka-d amek yumen
(Lcɣ 9.1-19; 22.6-16)
12Ɣef wannect-nni i yi-wekklen imseflen imeqqranen, fkan-iyi-d ttesriḥ s wayes i ṛuḥeɣ ɣer temdint n Dimacq. 13Taswiɛt kan di ttnaṣfa wass ay agellid, walaɣ deg webrid yiwet n tafat i d-ikkan seg igenni, tettfeǧǧiǧ akteṛ n yiṭij, tezzi-yi-d i nekk akked wid yellan yid-i, 14neɣli akk ɣer lqaɛa. Sliɣ i ṣṣut i d-iqqaren s tmeslayt taɛibṛanit : A Cawul, a Cawul ! Acuɣer i yi-tqehhṛeḍ ? Yewɛeṛ fell-ak ad tɛaṣiḍ inezlan. 15Rriɣ-as : Anwa-k a sidi ? Yenna-yi-d : Nekkini d Yasuɛ-nni i tqehhṛeḍ ; 16kker fell-ak, bedd ɣef yiḍarren-ik, baneɣ-ak-d i wakken ad ak-rreɣ d aqeddac-iw, d anagi ɣef wayen twalaḍ ass-agi d wayen ara ak-d-ssekneɣ sya d asawen. 17Xtaṛeɣ-k-id si gar wat Isṛail akked leǧnas nniḍen uɣuṛ ara ak-ceggɛeɣ. Ad sen-teldiḍ allen 18i wakken ad d-ffɣen si ṭṭlam ɣer tafat, si tezmert n cciṭan ɣer tezmert n Yillu, ad amnen yis-i, i wakken ad asen-ɛfuɣ ddnubat-nsen, ad sɛun amkan gar imqeddsen n Yillu.
19Daymi, ay agellid Aɣribas, ur ɛuṣaɣ ara aweḥḥi i yi-d-yusan seg igenni. 20Bdiɣ abecceṛ di Dimacq akked Urucalim, beccṛeɣ daɣen di tmurt n Yahuda meṛṛa, di taggara, beccṛeɣ i wat leǧnas ur nelli ara seg wat Isṛail, nhiɣ-ten ad tuben, ad d-uɣalen ɣer webrid n Yillu, ad xedmen lecɣal i d-ittbegginen d akken tuben s wul-nsen. 21Ɣef wannect-agi i yi-ṭṭfen wat Isṛail deg ufakan, ɛerḍen ad iyi-nɣen. 22Lameɛna s lemɛawna n Yillu, ddreɣ armi d ass-a, ttbecciṛeɣ i yimdanen meṛṛa, ama d ameɣbun ama d ameṛkanti ; yerna ayen i d-qqareɣ, d ayen akken i ɣef d-caren lanbiya akked Musa : 23Yeɛni Lmasiḥ ad iɛteb, d netta i d amezwaru ara d-iḥyun si gar lmeyytin, ad ibecceṛ tafat i wegdud n wat Isṛail akked leǧnas nniḍen.
Tagwa n Bulus zdat n ugellid Aɣribas
24Akken yella Bulus yettdafaɛ ɣef yiman-is, Fistus yenṭeq-d s leɛyaḍ, yenna : Iffeɣ-ik leɛqel a Bulus ! Lketṛa n tmusni-inek tessufeɣ-ak leɛqel !
25Bulus yerra-yas : Ur iyi-yeffiɣ ara leɛqel a Fistus ameqqran ! Ayen akka i d-qqareɣ d imeslayen n tidett yesɛan ṣṣwab. 26Ula d agellid Aɣribas, yeɛlem s wayagi ; daymi i d-mmeslayeɣ zdat-s ɛinani, imi mačči s tuffra i yeḍra wannect-a. 27Ay agellid, tumneḍ s wayen i d-nnan lanbiya ? Ẓriɣ tumneḍ yis-sen !
28Aɣribas yenna i Bulus : Lemmer ad ternuḍ kra, ad iyi-tqennɛeḍ ad uɣaleɣ d amasiḥi ! 29Bulus yenna-yas : A win yufan a Ṛebbi, mačči d keččini kan, lameɛna ula d wid akk i yi-d-ismeḥsisen ass-agi, ad tuɣalem am nekk tura neɣ deg ussan i d-iteddun, ḥaca snasel-agi i yi-cudden !
30Dɣa agellid Aɣribas, lḥakem Fistus, Birinis d wid akk yeqqimen yid-sen, kkren-d. 31Mi kkren ad ṛuḥen, nnan wway gar-asen : Argaz-agi ur ixdim ula d acemma yuklalen lmut neɣ lḥebs. 32Aɣribas yenna i Fistus : Argaz-agi izmer ad ittuserreḥ lemmer ur yerẓi ara ccṛeɛ ɣer Qayṣar.
Currently Selected:
Lecɣal n Imceggɛen 26: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.